வாஷிங்டன்: வருகிற 2024 ஜனாதிபதி தேர்தலில் தனக்கு எதிராக சிஎன்என்(CNN) பிரசாரம் செய்யவிருப்பதாக அமெரிக்க முன்னாள் ஜனாதிபதி டொனால்டு டிரம்ப் குற்றஞ்சாட்டியுள்ளார். இதற்கு நஷ்ட ஈடாக 475 மில்லியன் அமெரிக்க டாலரை டிரம்ப் கேட்டுள்ளார். இதுகுறித்து ஃபெடரல் நீதிமன்றத்தில் சிஎன்என்-ற்கு எதிராக வழக்கு ஒன்றை அவர் தொடர்ந்துள்ளார். தன்னை அரசியலில் தோற்கடிக்க தவறான செய்திகளைப் பார்வையாளர்களுக்கு பரப்புவதாக அந்த வழக்கில் குற்றஞ்சாட்டியுள்ளார்.
மேலும், தன்னை ஹிட்லருடன் ஒப்பிட்டும், நிறவெறியர், ரஷ்ய அடிமைபோல் காட்டுவதாகவும் அதில் குறிப்பிட்டுள்ளார். வருகிற 2024 அமெரிக்க ஜனாதிபதி தேர்தலில் தான் ஜனாதிபதி ஆகிவிட வாய்ப்புள்ள நிலையில், காழ்ப்புணர்ச்சியில் இத்தகைய செயலை இந்நிறுவனம் செய்துவருவதாகக் குற்றஞ்சாட்டினார்.
டொனால்டு டிரம்பைப்பொறுத்தவரை தான் தொழிலதிபராக இருந்த காலகட்டத்திலும் சரி, அரசியல்வாதியாக இருந்த காலகட்டத்திலும் சரி ஊடக நிறுவனங்களை அச்சுறுத்துவதை வாடிக்கையாகவே வைத்து வருகிறார். கடந்த 2020இல் தனது இடைத்தேர்தல் பிரசாரத்தில் 'நியூ யார்க் டைம்ஸ்', 'தி வாஷிங்டன் போஸ்ட்' போன்ற ஊடக நிறுவனங்களுக்கு எதிராக வழக்குத் தொடர்ந்தார்.
மேலும், கடந்த 2019இல் சிஎன்என் நிறுவனத்தை அச்சுறுத்தும் வகையில் வழக்குத் தொடர்ந்தார். இந்த அச்சுறுத்தலையும் சிஎன்என் நிறுவனமே அப்போது கடுமையாக விமர்சித்தது. இதற்கிடையில், சிஎன்என் நிறுவனத்திற்கு எதிராக டிரம்பின் சட்ட வல்லுநர் குழு, வழக்கு தொடர்ந்த அடுத்த நாளே பல செய்தி ஊடக நிறுவனங்களின் மீதும் வழக்குத்தொடரப்பட்டது என்பதும் குறிப்பிடத்தக்கது.
இந்நிலையில், தற்போது இதுகுறித்து அவர் வெளியிட்ட அறிக்கையில், அடுத்து எந்த ஊடக நிறுவனங்களுக்கு எதிராகத் தான் வழக்குத்தொடர உள்ளேன் என சொல்லமாட்டேன் எனவும், ஆனால் 2020 தேர்தலில் தவறான தகவல்களைப் பரப்பியவர்கள் மீது நிச்சயம் வழக்குத்தொடரப்படும் எனத் தெரிவித்துள்ளார்.
இதையும் படிங்க: ஜப்பான் கடல் எல்லையில் வடகொரிய ஏவுகணை - பொதுமக்களுக்கு எச்சரிக்கை
