கடந்த 11 ஆண்டுகளில் இல்லாத அளவுக்கு, பெருந்தொற்று காலத்தில் ஜப்பானில் தற்கொலை சம்பவங்கள் அதிகரித்துள்ளன. இந்நிலையில், இப்பிரச்சனைக்கு முற்றுப்புள்ளி வைக்கும் வகையில் ஜப்பானில் தனி அமைச்சகம் உருவாக்கப்பட்டுள்ளது. அதுமட்டுமின்றி, நாட்டில் குறைந்து வரும் பிறப்பு வீதத்தை அதிகரிக்க செய்யவும், பொருளாதாரத்தை மீட்டெடுக்கவும் புதிய அமைச்சகம் உருவாக்கப்பட்டுள்ளது.
இந்த அமைச்சகங்களை அமைச்சர் டெட்சுஷி சாகாமோட்டோ கூடுதலாக கவனிப்பார் என ஜப்பான் பிரதமர் யோஷிஹைட் சுகா அறிவித்துள்ளார். பதவியேற்றதை தொடர்ந்து முதல் முறையாக செய்தியாளர் சந்திப்பில் கலந்துகொண்ட சாகாமோட்டோ, "பெருந்தொற்றில் அதிகரித்துவரும் பெண்களின் தற்கொலை சம்பவங்கள் உள்பட நாட்டின் முக்கிய பிரச்னைகளை தீர்க்க தனி அமைச்சகம் உருவாக்கப்பட்டுள்ளது. இத்துறையின் அமைச்சராக நான் நியமிக்கப்பட்டுள்ளேன்.
இப்பிரச்னையை ஆய்வு செய்து சம்பந்தப்பட்ட அமைச்சகங்களுடன் ஒன்றிணைந்து விரிவான செயல்திட்டத்தை தயாரிக்க சுகா என்னை கேட்டு கொண்டுள்ளார். சமூக தனிமையின்மை மற்றும் தனிமைப்படுத்தலை தடுத்து மக்களிடையேயான உறவை மேம்படுத்த நடவடிக்கை எடுக்கப்படும்” என்றார்.
கரோனா பெருந்தொற்று காலத்தில் குழந்தைகளிடையே நிலவும் ஏழ்மையும் அதிகரித்துள்ளது. கடந்த பிப்ரவரி 19ஆம் தேதி, இம்மாதிரியான பிரச்னைகளை கட்டுப்படுத்தும் நோக்கில் அமைச்சகங்களில் அலுவலகம் தொடங்கப்பட்டுள்ளது. ஜப்பானில் 4 லட்சத்து 26 ஆயிரம் பேர் கரோனாவால் பாதிக்கப்பட்டுள்ளனர். அதுமட்டுமின்றி, 7,577 பேர் உயிரிழந்துள்ளனர்.
