ஹாங்காங்கில் தொடரும் சீனாவின் அடக்குமுறை?

சர்ச்சைக்குரிய தேசிய பாதுகாப்புச் சட்டத்தை அமல்படுத்தியதைத் தொடர்ந்து நாட்டின் பாதுகாப்பை உறுதிசெய்யும் வகையில் ஹாங்காங்கில் தேசிய பாதுகாப்பு அலுவலகம் தொடங்கப்பட்டுள்ளது.

ஆங்கிலேயர்களின் காலனி ஆதிக்கத்திற்கு உட்பட்டிருந்த ஹாங்காங், 1997ஆம் ஆண்டு சீனாவின் கட்டுப்பாட்டின்கீழ் வந்தது. 'ஒரு நாடு இரு அமைப்பு' என்ற ஒப்பந்தத்தின் அடிப்படையில் அந்நாடிற்குத் தன்னாட்சி தரப்படும் என ஒப்பந்தத்தில் குறிப்பிடப்பட்டிருந்தது. இருப்பினும், ஹாங்காங்கை சுதந்திர நாடாக அறிவிக்க வேண்டும் என அங்கு தொடர் போராட்டங்கள் நடைபெற்றுவருகின்றன.

அதன் ஒரு அங்கமாக, 'குளோரி டு ஹாங்காங்' என்ற பெயரில் புரட்சிகர பாடல் வெளியிடப்பட்டுள்ளது. ஆனால், அது அரசியல் சார்புடையது எனக் கூறி அப்பாடலுக்கு தடைவிதிக்கப்பட்டுள்ளது. இந்நிலையில், நாட்டின் பாதுகாப்பை உறுதிசெய்யும் வகையில் ஹாங்காங்கில் தேசிய பாதுகாப்பு அலுவலகத்தை சீனா தொடங்கியுள்ளது. இதன் திறப்பு விழாவில், நிர்வாக தலைவர் கேரி லாம், கம்யூனிஸ்ட் தலைவர்கள் பலர் கலந்துகொண்டனர். கொடியேற்ற நிகழ்ச்சியின்போது, அலுவலகத்திற்கு வெளியே சீனக் கொடி ஏற்றப்பட்டது.

இதனிடையே, பிரிவினைவாத, பயங்கரவாத நடவடிக்கைகளைத் தடுக்கவும், வெளிநாட்டின் தலையீட்டைக் கட்டுப்படுத்தும் விதமாகவும் தேசிய பாதுகாப்புச் சட்டத்தை சீனா அமல்படுத்தியது. இது எதிர் கருத்து தெரிவிப்பவர்களின் குரலை ஒடுக்கும் விதமாக இருக்கும் என மக்கள் அஞ்சினர்.

இதனை எதிர்த்து, ஹாங்காங் முழுவதும் போராட்டங்கள் நடைபெற்றுவருகின்றன. "லிபரேட் ஹாங்காங், ரெவல்யூசன் ஆஃப் அவர் டைம்" என்ற கோஷத்தை எழுப்ப தேசிய பாதுகாப்புச் சட்டத்தின் கீழ் தடைவிதிக்கப்பட்டுள்ளது.

இதையும் படிங்க: ‘பயங்கரவாதத்தின் மையம் பாகிஸ்தான்’ - ஆராயச் சொல்கிறது இந்தியா