சீன அதிபர் ஷி ஜிங்பிங்-கின் தலைமை கேள்விக்கு உள்ளாகி ஆட்டம் கண்டுள்ளதா? ஹாங்காங்-ல் இந்திய, அமெரிக்க நலன் பெரும் பாதிப்புக்கு உள்ளாகுமா?
ஹாங்காங் தெருக்களில் மக்களின் போராட்டம் புதிய உத்வேகத்துடன் மீண்டும் வெடித்துக் கிளம்பியுள்ளது. சீன அரசு சென்ற மாதம் கொண்டுவந்துள்ள தேசிய பாதுகாப்பு சட்டத்திற்கு எதிராக மக்கள் தெருக்களில் இறங்கியுள்ளனர். கடந்த ஆண்டு ஜூன் மாதம் கிளர்ந்தெழுந்த வீரியம் மிக்க வெகுஜன போராட்டத்தின் தொடர்ச்சியான இதனைப் பிரிவினைவாத மற்றும் நாசகார சக்திகள் தூண்டிவிடுவதாக சீனா குற்றம் சாட்டுகிறது. ஆனால், இந்த குற்றச்சாட்டை ஜனநாயக ஆதரவு போராட்டத் தலைவர்கள் முற்றாக மறுத்து, சீன அரசின் திசை திருப்பும் முயற்சி என்று வர்ணிக்கிறார்கள்.
150 ஆண்டுகளுக்கும் மேலாக பிரிட்டனின் காலனியாக இருந்த ஹாங்காங், 1997ல் ‘ஒரே நாடு, இருவேறு நிர்வாக அமைப்பு’ என்ற ஒழுங்குமுறை ஏற்பாட்டின்படி, சிறப்பு அந்தஸ்தும் தன்னாட்சியும் உள்ள பிராந்தியமாக சீனாவிடம் கையளிக்கப்பட்டது. இவ்வாறு, சிறப்பு தன்னாட்சி பிராந்தியமாக உதயமான ஹாங்காங், கம்யூனிச சீனாவில் இருந்து வேறுபட்ட தனித்துவமான நீதித்துறை, அரசியல்-சட்ட அமைப்பு ஆகிவயவற்றைக் கொண்டுள்ளது. மேலும், செஞ்சீனத்தைப் போல் அல்லாமல், ஹாங்காங்-கில் பேச்சு சுதந்திரமும், ஒன்றுகூடும் உரிமையும் உண்டு.
சென்ற ஆண்டு ஜூன் மாதம், சீன அரசு கொண்டுவந்த ’குற்றவாளிகளை நாடுகடத்தும் சட்டம்’ (ஹாங்காங்-கில் இருந்து சீனாவுக்கு) பெரும் கொந்தளிப்பை ஏற்படுத்தியது. வரலாறு காணாத அளவிற்கு பத்து லட்சத்திற்கும் அதிகமான மக்கள் தன்னெழுச்சியாக போராட்டத்தில் குதித்தனர். ஹாங்காங் அதிர்ந்து குலுங்கியது. போராட்டத்தின் வீரியத்தைக் கண்டு பின்வாங்கிய சீன அரசு, கடந்த செப்டம்பர் மாதம் அந்த சர்ச்சைக்குரிய சட்டத்தை வேறு வழியின்றி திரும்பப் பெற்றுக் கொண்டது. இந்த சட்டம் அமலுக்கு வந்திருந்தால், ஹாங்காங்-கின் சுதந்திர நீதி பரிபாலன அமைப்பிற்கு வேட்டு வைப்பதுடன், சர்வாதிகார சீன அரசை விமர்சிக்கும் ஜனநாயக மற்றும் மாற்று சிந்தனை செயற்பாட்டாளர்களின் உயிருக்கு உலைவைப்பதாக மிகுந்த ஆபத்தானதாக இருந்திருக்கும் என்ற பெரும் அச்சத்தை அரசியல் நோக்கர்கள் தெரிவித்தனர். சீனா சட்டத்தை திரும்பப் பெற்றுக்கொண்டாலும், போராட்டங்கள் ஓயவில்லை. போராட்டக்காரர்களும், அவற்றை முன்னெடுக்கும் செயற்பாட்டாளர்களும் முழுமையான ஜனநாயகம் கோரி, காவல்துறையின் அத்துமீறல்கள் குறித்த விசாரனை வேண்டியும் களத்தில் உறுதியாக நின்றனர்.
இந்நிலையில், புதிதாக சீன அரசு கொண்டுவந்துள்ள தேச பாதுகாப்பு சட்டம் எரியும் நெருப்பில் எண்ணெய் ஊற்றியது போலாயிற்று. போராட்டம் மேலும் தொடர காரணமாயிற்று. அரசியல் விமர்சகர்களின் பார்வையில், ஹாங்காங் தொடர் போராடங்களால் சீன அதிபர் ஷி ஜிங்பிங்-கின் தலைமையும் அதிகாரமும் கேள்விக்கு உள்ளாகி ஆட்டம் கண்டிருக்கிறது. இந்திய ஆய்வாளர்களின் கருத்துப்படி, இமயமலைப் பகுதியின் எல்லைக் கட்டுப்பட்டு கோட்டை மீறிய சீனாவின் ஆக்கிரமிப்பின் பின்னணியில், ஹாங்காங் மற்றும் தைவான் நிகழ்வுகளின் நிழல் பதிந்துள்ளது. காரணம், இந்த நிகழ்வுகளை ஒட்டி உள்நாட்டில், குறிப்பாக சீன கம்யூனிஸ்ட் கட்சியில், ஷி ஜிங்பின் தலைமைக்கு எதிராக இதுவரை இல்லாத கடும் விமர்சனம் எழுந்துள்ளது.
மூத்த பத்திரிக்கையாளர் ஸ்மிதா ஷர்மா ஹாங்காங் கள நிலவரம் குறித்தும், முதன்மையான கோரிக்கைகள் மற்றும் தொடரும் போராட்டத்தின் சர்வதேச தாக்கம் பற்றியும் குடிமைக் கட்சி தலைவரும் நாடாளுமன்ற உறுப்பினருமான ஆல்வின் யேயுங்-உடன் விரிவான உரையாடலை மேற்கொண்டார். கடந்த நவம்பர் மாதம் நடைபெற்ற ஹாங்காங் உள்ளாட்சித் தேர்தலில் பல கட்சிகளை உள்ளடக்கிய ஜனநாயக இயக்கம் மாபெரும் வெற்றிபெற்றது. மொத்தம் உள்ள 18 உள்ளாட்சி மன்றங்களில், 17 மன்றங்களைக் கைப்பற்றி, முழுமையான ஜனநாயகத்திற்கான போராட்டத்தை தொடர்கிறது.
தனிமனித உரிமைகளை மறுக்கும் தேச பாதுகாப்பு சட்டத்தை முற்றாக நிராகரிக்கும் ஹாங்காங் மக்கள் தங்கள் தன்னாட்சி பிராந்தியத்தின் அடிப்படை சட்டம் உறுதியளித்துள்ளதற்கு ஏற்ப கோரிக்கைகள் முன்வைக்கப்பட்டுள்ளன என்று விளக்குகிறார் ஆல்வின். பெருவாரியான மக்கள் பிரிவினையை ஆதரிக்கவில்லை, மக்களிடையே அது எடுபடாது என்று கூறும் அவர், சீனா என்றுமே ‘ஒரே தேசம் – இருவேறு நிர்வாக அமைப்பு” என்ற திட்டத்தையோ, தன்னாட்சியையோ மதிக்கவில்லை என்று குற்றம் சாட்டுகிறார். மேலும், சீன மேலாதிக்கத்திற்கு எதிராக பேசுவோர், சீன அரசின் கடும் அச்சுறுத்தலையும், கொடூரமான பழிவாங்கும் நடவடிகையையும் எதிர்கொள்ளவேண்டி இருந்தாலும், இந்த ’தலைமையற்ற’ தன்னெழுச்சியான போராட்டம் தொய்வின்றி தொடரும் என்று நம்பிக்கையுடன் தெரிவிக்கிறார்.
இதோ முழுமையான நேர்கானல்:
கேள்வி: புதிய சட்டம் தேச பாதுகாப்பை உறுதி செய்யவும் தீவிரவாதத்தைக் கட்டுப்படுத்தவும் மட்டுமே என சீன அரசு விளக்கம் அளிக்கிறது. இந்த வாதம் ஏற்புடையதா? உங்கள் எதிர்வினை என்ன?
ஆல்வின் யேயுங்: ”ஒரே தேசம் – இருவேறு அமைப்பு” என்ற முறைமையின் அடிப்படையில், ஹாங்காங்-கிற்கு என தனிப்பட்ட சட்ட திட்டங்கள் உண்டு. எம்மை ஆள, எங்களுக்கென்ற தன்னளவிளான சிறு அரசியல் சாசனம் – அடிப்படை சட்டம் - இருக்கிறது. தேச பாதுகாப்பு பற்றி அடிப்படை சட்டத்தில் மிகத் தெளிவாக ஒரு உறுப்பு உள்ளது. அதன்படி, தேச பாதுகாப்பு குறித்து ஹாங்காங் அரசே தகுந்த, தேவையான சட்டங்களை இயற்ற வேண்டும். எனவே, இந்த விஷயம் ஹாங்காங் சிறப்பு தன்னாட்சி பிராந்தியத்தின் கீழ் வருவதாகும். மேலும், இது ஹாங்காங் மக்களே தீர்மாணிக்க வேண்டிய உள்விவகாரம். சீன அரசின் தலையீடு தேவையற்றது. 2003-ஆம் ஆண்டு, ஹாங்காங் அரசு ஒரு சர்ச்சைக்குரிய தேச பாதுகாப்பு மசோதாவைக் கொண்டுவந்தது. அந்த சட்டத்தை எதிர்த்து ஐந்து லட்சத்திற்கும் அதிகமான மக்கள் வீதிகளில் இறங்கிப் போராடினார்கள். அதன் பின்னர் எந்த அரசும் அது போன்றதொரு சட்டத்தைக் கொண்டுவர துணியவில்லை. ஏனென்றால், அந்த சட்டம் அந்த அளவு சர்ச்சைக்குரியது. மேலும், எங்களது உரிமைகளைப் பாதுகாக்க வேண்டியது அத்தியாவசியமாகிறது. காரணம், ஹாங்காங் இன்னும் முழுமையான ஜனநாயகத்தைக் கொண்டிருக்கவில்லை. எமது நாடாளுமன்றத்தில் பாதி இடங்களுக்கு மட்டுமே மக்கள் பங்குபெறும் நேரடி தேர்தல் உண்டு. இது போதும், ஹாங்காங் மக்களுக்கு முழுமையான பாதுகாப்பு இல்லை என்பதைத் தெளிவாகக் காட்ட. எனவேதான், மக்கள் தேச பாதுகாப்பு சட்டத்தினை எதிர்க்கிறார்கள். இந்த சட்டம் நடைமுறைக்கு வந்தால் தங்கள் உரிமைகள் பறிபோகும் என்ற அச்சம் அனைவருக்கும் உள்ளது.
சென்ற ஆண்டில் இருந்தே போராடி வருகிறோம். போராட்டம் தொடங்கியது ‘நாடு கடத்தல்’ சட்டத்தை எதிர்த்து. அப்போதிருந்தே, காவல் துறையின் அராஜகத்தையும் அடக்குமுறையையும் சந்தித்து வருகிறோம். ஆனால், அரசு காவல்துறையின் அத்துமீறல்களைக் கண்டுகொள்ளவில்லை, அதன் விளைவுகளைப் பற்றி கவலைகொள்ளாமல், காவல்துறைக்கு முழு ஆதரவு அளித்துவருகிறது.
அடிப்படை சட்டத்தை முடக்குவது பற்றியோ, வாக்குறுதிகளை நிறைவேற்றுவது குறித்தோ, பெய்ஜிங் அரசுக்கு சிறிதும் கவலையும் அக்கறையும் இல்லை. ஆனால், மக்கள் விருப்பத்தை அறியாமல் தேச பாதுகாப்பு சட்டத்தைத் திணிப்பதில் அதீத தீவிரம் காட்டி வருகிறது. நாடாளுமன்றத்தை உதாசீனப்படுத்தியதுடன், தங்கள் எதிர்ப்பைப் பதிவு செய்ய மக்களுக்கு எந்த ஒரு வாய்ப்பும் வழங்கப்படவில்லை என்பது வேதனையான் ஒன்று.
கேள்வி: ஹாங்காங்-கில் நிலவும் கொந்தளிப்புக்கு ‘வெளி நாட்டு சக்திகள்’ தான் காரணம் என்று குற்றம்சாட்டும் சீனா, ஜனநாயக போராளிகளை தீவிரவாதிகள் என்றும் வன்முறையாளர்கள் என்றும் முத்திரை குத்துகிறதே?
அனைத்து சர்வாதிகார அரசுகளும் அப்படித்தான். தங்கள் குறைகளை மறைத்து மக்கள் மீது பழி சுமத்துவதில் விதிவிலக்குகள் கூட இல்லை. மேலும், இதில், அவர்களுக்கிடையே வேறுபாடு ஏதுமில்லை. எல்லோரையும் குறைகூறுவதே அவர்களின் இயல்பு. எதிர்க்கட்சிகள், பல்கலைக்கழக மாணவர்கள் என அனைவரையும் ‘வெளி நாட்டு சக்க்திகள்’ என்று முதிரை குத்துவார்கள். ஆனால், எந்த ஒரு ஆதாரத்தையும் வெளியிட மாட்டார்கள். தங்கள் செயல்பாடுகளை மறுபரிசீலனை செய்யும் துணிவு சிறிதளவும் இல்லாதவர்கள். இந்த அரசின் பிழை என்னவென்றால், தவறை ஏற்றுக்கொள்ளும் பக்குவமும் பெருந்தன்மையும் இல்லாமையே. ஹாங்காங் மக்களின் கண்களைப் பார்த்து, ஆம் நாங்கள் தவறு செய்துவிட்டோம், எங்கள் ஆட்சியில் குறைபாடு உள்ளது அதனை சீர் செய்வோம் என முன்வரவேண்டும். மாறாக, த்னது குறைகளைக் களைவதை விட்டு அரசின் பிரதான செயல்பாடு எங்கள் ஒவ்வொருவர் மீது குற்றம் சுமத்துவதாகவே உள்ளது.
கடந்த ஆண்டு, சர்ச்சைக்குரிய சட்டத்தை நிறைவேற்ற இயலாமல் பிரச்சனைகளுக்கு வித்திட்டது அரசு. இந்த வருடம், பிரச்சனையை தீர்க்க, முந்தையதை விட மோசமான சட்டத்தைத் திணிக்க முயற்சிக்கிறது.
கேள்வி: போராட்டக்காரர்களின் கோரிக்கைகள்தான் என்ன? சீனாவிலிருந்து தனியே பிரிந்து செல்லும் கோரிக்கையும் உள்ளதா? பிரிவினைக்கு எந்த அளவு ஆதரவு உள்ளது?
ஒரு சிலர் மட்டுமே பிரிவினையை முன்வைக்கிறார்கள். ஆனால், பெருவாரியான மக்களிடம் அதற்கு ஆதரவில்லை. கடந்த ஆண்டில் இருந்தே, ஹாங்காங் மக்கள் ஐந்து முக்கிய கோரிக்கைகளை முன்வைத்து போராடுகின்றனர். அனைவருக்கும் வாக்குரிமை எமக்கான அரசை நாங்களே தேர்ந்தெடுக்கும் உரிமையைத் தருகிறது. ஹாங்காங் அடிப்படை சட்டம் இந்த உரிமையை உத்தரவாதப்படுத்துகிறது.
நாங்கள் நிலவைத் தருமாறு கேட்கவில்லை. காவல்துறை அராஜகம் குறித்த சுதந்திரமான விசாரணை வேண்டுகிறோம். இந்த விசாரணையை மேற்கொள்ள ஒரு உயர்மட்ட குழு அமைப்பதை அரசு நிராகரித்து வருவது பெருத்த ஏமாற்றம் அளிக்கிறது. அரசியல் காரணங்களுக்காக மக்கள்மீது வழக்குகள் பதிவதை அரசு உடனடியாக நிறுத்த வேண்டும். இத்தகைய அரசியல் பழிவாங்கல் முற்றிலும் தவறானது. எமது இந்த கோரிக்கைகள் ஏற்றுக்கொள்ள முடியாதவை என்று யாராவது சொல்ல முடியுமா? இல்லை அல்லவா. சுதந்திர உலகில், மிக சாதாரனமாக, மக்கள் குரல் எழுப்பாமலேயே ஒரு அரசால் நிறைவேற்றப்பட்டிருக்கும்.
அமெரிக்க நிலைப்பாடும் அமெரிக்க நலனும்
கேள்வி: தற்போது அமெரிக்கா உலக அளவில் தனது பங்களிப்பைக் குறைத்துக்கொண்டு, கடமையை விலக்கிக்கொண்டு பன்னாட்டு அமைப்புகளில் இருந்து வெளியேறி வருகிறது. இத்தகைய சூழலில், அமெரிக்க அரசு, ஹாங்காங் குறித்து வெளியிடும் அறிக்கைகள் உங்கள் நிலைப்பட்டுக்கு வலு சேர்க்கிறதா அல்லது நிலைமையை மேலும் சிக்கலாக்குகிறதா?
ஹாங்காங் ஒரு சாதாரன நகரமல்ல, மாறாக புகழ்பெற்ற பன்னாட்டு நகரம். ஹாங்காக்-கில், இந்தியா உட்பட, பல நாடுகளின் நலன் பின்னிப் பினைந்துள்ளது. இங்கு, இந்திய முதலீடுகள் பெருமளவில் உள்ளது. மேலும், கனிசமான இந்தியர்கள் இந்நகரத்தில் வாழ்கின்றனர். அமெரிக்காவுக்கும் பிற உலக நாடுகளுக்கும் இது பொருந்தும்.
கடந்த 150 ஆண்டுகளில், ஹாங்காங் பல்வேறு நாடுகளுடனும் முதலீட்டாளர்களுடனும் நெருங்கிய தொடர்பும் உறவும் கொண்டுள்ளது. அமெரிக்காவும், அவற்றுள் முக்கிய்மான ஒன்று. 1992ல், ஹாங்காங் கொள்கை சட்டம் மூலமாக ஹாங்காங்-க்கு சிறப்பு சலுகை வழங்கியது அமெரிக்கா. ஹாங்காங் தனித்தன்மையுடன் விளங்கினால், அதற்கொப்ப சீனாவை விட கூடுதல் சிறப்பு அந்தஸ்த்து அளிக்கப்படும் என அந்த சட்டம் உத்தரவாதம் அளித்தது. ஆனால், சீனாவுக்கு கையளிக்கப்பட்ட பின்னர், பெய்ஜிங் ‘ஒரு தேசம் – இருவேறு அமைப்பு’ என்பதை மதிப்பதில்லை என்பதை பல்வேறு நிகழ்வுகள் மூலம் நாம் பார்த்து வருகிறோம். மேலும், அதிகப்படியான தன்னாட்சி என்பது சீனாவுக்கு உவப்பனதாக் இல்லை. எனவே, தான் வழங்கியுள்ள சிறப்பு அந்தஸ்தை திரும்பப்பெறுவதாக அமெரிக்கா கூறுகிறது. ஹாங்காங்-கை பொக்கிஷமாகக் கருதி சீனா அக்கறை செலுத்தி, அதன் தனித்தன்மை குன்றாமல், குந்தகம் இல்லாமல் பாதுகாக்கும் என்றால், அதனை செயல்பாட்டில் காட்ட வேண்டும். சீன அரசும், ஹாங்காங் அரசும் குறைந்தபட்சம் சில நடவடிக்கைகளை மேற்கொள்ள வேண்டியது அவசியம். முதலாவதாக, தேச பாதுகாப்பு சட்டத்தைத் திரும்பப் பெற்று, ஹாங்காங்-கை தனித்தன்மையுடன் நடத்துவதை உலகிற்கு தெளிவாக தெரியப்படுத்தி நம்பகத்தன்மையை ஏற்படுத்த வேண்டும்.
கேள்வி: தற்போது அமெரிக்க நகரங்கள் பல பற்றி எரிகின்றன. கறுப்பின இளைஞர் ஜார்ஜ் ஃப்ளாய்ட் மின்னாபொலிஸ் நகரில் காவல் துறை அதிகாரியால் கொல்லப்பட்டதை அடுத்து, இனவெறிக்கு எதிரான போராட்டங்களில் பரவலாக வன்முறை வெடித்துள்ளது. இந்த நிகழ்வை ஒட்டி, சீன அரசின் செய்தித் தொடர்பாளர்கள், அமெரிக்கா மீதான தாக்குதலைத் தொடுத்துள்ளனர். சீன அரசு சார்புடைய ‘குளோபல் டைம்ஸ்’ பத்திரிக்கையின் தலைமை ஆசிரியர் ஹு ஷிஜின், அமெரிக்க போராட்டத்தை ஹாங்காங் போராட்டத்துடன் ஒப்பிட்டு சேற்றை வாரி இறைத்துள்ளார். ”ஹாங்காங்-ன் தீவிரவாத வன்முறையாளர்கள் எப்படியோ அமெரிக்காவில் ஊடுருவி, கடந்த ஆண்டு இங்கு நிகழ்த்தியதைப் போன்ற கலவரத்தை அங்கும் நடத்தியுள்ளனரோ என அவர் எழுதியுள்ளார்.
அமெரிக்க காவல்துறையை விடவும், ஹாங்காங் காவல்துறை கட்டுப்பாடு மிக்கது என்று கூறுவதை எவ்வாறு பார்க்கிறீர்கள்?
சர்வாதிகார அரசின் கீழ் வாழும், பேச்சு சுதந்திரத்தை அனுபவிக்காத, நேர்மையான போராட்டத்தில் எந்தக்காலத்திலும் கலந்துகொள்ளாத ஒருவர் பாரபட்சமற்று கருத்து தெரிவிப்பார் என எதிர்பார்க்கலாமா? குளோபல் டைம்ஸ் தலைமை ஆசிரியரான ஹு போராட்டம் எதிலாவது பங்குபெற்றது உண்டா அல்லது காவல்துறையின் மிருகத்தனமான நடவடிக்கையை எப்போதாவது சந்தித்திருப்பாரா?
இவர் போன்றோர் எமது போராட்டம் குறித்து கருத்து சொல்ல சிறிதளவு தகுதியும் இல்லாதவர்கள். மேலும், சுதந்திர உலகில் நடைபெறும் நிகழ்வுகள் தொடர்பாக விமர்சனம் செய்யும் அருகதை அற்றவர்கள்.
நிலைமையைக் கட்டுக்குள் கொண்டுவர அடக்குமுறை ஏவப்படுமா?
கேள்வி: உங்களுக்கு மிகவும் அச்சம் தருவது எது? எதனைக் குறித்து இனம்புரியாத பயம் உள்ளது? வெளிப்படையாக பேசுவதற்காக, கடுமையான விமர்சனங்களை முன்வைப்பதற்காக மிக கொடூரமான அடக்குமுறை ஏவப்படுமா?
எதனைக் குறித்தும் எனக்கு எந்தவிதமான அச்சமும் இல்லை என்று சொன்னால், ஒன்று நான் ஒன்றுமறியா வெள்ளந்தியாக இருக்கிறேன் அல்லது உங்களிடம் தெரிந்தே பொய் சொல்லுகிறேன் என்பதே உண்மை. இதில் பசப்புவதற்கு ஒன்றுமில்லை.
ஹாங்காங் தான் எனது இல்லம். கடந்த சில ஆண்டுகளாக மக்கள் பணியில் முழு மூச்சுடன் செயல்பட்டு வருவதை எனக்குக் கிடைத்த பெருமையாக கருதுகிறேன். மீண்டும் வாய்ப்பு கிட்டினால், மக்கள் சேவையில் தொடர்ந்து சிறப்பாக இயங்குவேன்.
கடந்த ஓராண்டில் ஹாங்காங் மக்கள், வீரத்தில் தாங்கள் சற்றும் சளத்தவர்கள் அல்ல, எத்தகைய அடக்குமுறைக்கும் அஞ்சாதவர்கள், நெஞ்சுரம் மிக்கவர்கள் என்பதை உலகறியச் செய்துள்ளார்கள். இருப்பினும், இனி வரும் நாட்கள் பெரும் சோதனையாக அமையலாம். யதார்த்தத்தில், இது மிகவும் சவாலான யுத்தம் என்பதில் சந்தேகமில்லை. ஆனால், போராட்டக் களத்தில் எமது ஹாங்காங் மக்கள் அவ்வளவு எளிதில் விட்டுக்கொடுக்க மாட்டார்கள். இதுவரையிலும் தொடரும் போராட்டமே அவர்களின் நெஞ்சுறுதிக்குச் சான்று.
கேள்வி: உங்களது போராட்டம் அமைதியாக, ஆயுதங்கள் ஏதும் இன்றி தொடர என்ன வழிமுறைகளைக் கையாளுகிறீர்கள்?
எமது போராட்டத்திற்கு தனிப்பட்ட அமைப்பு ரீதியான தலைமை என்று எதுவும் இல்லை. தலைவர் என அடையாளப்படுத்தப்பட்ட ஒருவர் இல்லாத இயக்கமாக இதுவரையிலும் தொய்வின்றி செயல்படுகிறது. செயல்பாடுகள் வெளிப்படையாகவே உள்ளன. உள்ளுக்குள் எந்த ஒரு இரகசிய அமைப்போ செயல்பாடோ, திரைமறைவு வேலைகளோ இல்லை. இருபது லட்சம் மக்கள் தெருவில் இறங்கி போராடத் தொடங்கியதில் இருந்தே இது அமைதியான முறையிலேயே நடைபெற்றது. ஆனால், இந்த அரசு, மக்களின் கோரிக்கையை கண்டுகொள்ளாமல் உதாசீனப்படுத்தியது சிலரை விரக்திக்குத் தள்ளியது, காவல்துறை அதிகாரிகளும் கண்ணீர்ப் புகை குண்டுகளையும், ரப்பர் குண்டுகளையும் அப்பாவி மக்கள் மீது பிரயோகித்தனர். இது மக்களை கோபத்தின் உச்சிக்குக் கொண்டு சென்றது. கடந்த ஓராண்டில் அவர்கள் கண்ட போலீஸ் அராஜகமும், மிருகத்தனமான அடக்குமுறையும், திரளான மக்களை வீதிக்கு வவழைத்தது.
எமது போராட்டம் அமைதியாக தொடரவே மிகுந்த பிரயாசைப்படுகிறேன். அதே சமயம், மக்கள் ஏன் வெறியுடன் கடும் கோபத்தில் தெருவில் இறங்கியுள்ளார்கள் என புரிந்துகொள்ள முடிகிறது.
சீனாவின் உள்விவகாரங்களும் ஹாங்காங் மீதான நடவடிக்கைகளும்; இந்திய-சீன எல்லை பிரச்சனை
கேள்வி: சீனாவில் உள்ள சாதாரன மக்களிடம் இருந்து உங்கள் போராட்டத்திற்கு ஆதரவோ தோழமையோ இருக்கிறதா? உங்களுக்கு புலப்படும் வகையில் உள்ளதா? சீனாவில் முன்னெப்போதும் இல்லாத வகையில் அதிபர் ஷி ஜிங்பிங்-ன் தலைமை மீதான விமர்சனம் உள்நாட்டிலேயே எழுந்துள்ள நிலையில் எப்படி பார்க்கிறீர்கள்?
தணிக்கையோ கண்காணிப்போ இல்லாமல், சீனாவில் உள்ள மக்களுடன் அச்சமின்றி நேரடித்தொடர்பு கொள்வது அவ்வளவு எளிதான காரியமல்ல. அந்த அளவு கடும் கண்காணிப்பு வளையம் உள்ளது. இருப்பினும், சீன தாயகத்தில் ஹாங்காங் மக்களின் சுதந்திர போராட்டத்திற்கு தார்மீக ஆதரவு அளிப்போர் இருக்கிறார்கள் என்பதை எம்மால் புரிந்துகொள்ள முடிகிறது. ஆனால், ஹாங்காங்-கில் உள்ளவர்களின் நிலைமையை விட அவர்களின் நிலைமை மிகுந்த பரிதாபத்திற்கு உரியது. அவர்களை விட நாங்கள் சற்றே சுதந்திரக் காற்றை சுவாசிக்க முடிகிறது. எங்களுக்கு இணய வசதி தாராளமாக இருக்கிறது. இணைய பயன்பாடு தடையற்ற ஒன்று. ஆனால், சீனாவில் இணைய பயன்பாட்டிற்கு ஏகப்பட்ட கட்டுப்பாடுகள், தடைகள். இவற்றைக் கடந்து இணையத்தில் செயல்பட VPN போன்றவை தேவை. இவையெல்லாம், மிகவும் கடினம். தடைகளைத் தாண்டிவர அவர்களுக்கு எங்கள் நல்வாழ்த்துக்கள்.
கேள்வி: இந்தியாவுக்கும் சீனாவுக்கும் இடையே இமயமலைப் பகுதியில் உள்ள எல்லைக் கட்டுப்பாட்டுக் கோட்டுப் (LAC) பகுதிகளில் சீன ஆக்கிரமிப்பால் பதற்றம் நிலவுகிறது. இரு தரப்பிலும் படைகள் குவிப்பால், போர் அபாயமும் எழுந்துள்ளது.
சரிந்துவரும் தன் செல்வாக்கையும், தன் தலைமை மீதான கடும் விமர்சனத்தையும் கூர்மழுங்கச் செய்ய, மடைமாற்றவே எல்லைப்பகுதியில் சீன ஆக்கிரமிப்பு என்ற கருத்து மேலோங்கியுள்ளது. தனது இலட்சிய கனவுகளும் திட்டங்களும் உத்வேகம் அற்றுப் போன நிலையில், ஷி ஜின்பிங், உள்நாட்டில் தனது செல்வாக்கை மீட்டெடுக்க, தலைமையைத் தக்கவைக்க இத்தகைய செயல்பாடுகளில் தீவிரம் காட்டுகிறாரா?
இன்றைய உலகில், அதிகாரத்தில் உள்ளவர்களிடம், அவர்கள் யாரக இருப்பினும், நமது கோரிக்கை ஒன்றுதான். நேர்மையான உள்ளத்துடன், அணைத்து பிரிவினருடனும் நேரிய உரையாடலை, தொடர்புகளை மேற்கொள்ளுங்கள். இதனை சீரிய முறையில், உள்ளார்ந்த விருப்புடன் செயல்படுத்துங்கள். இந்த இணைய கால கட்டத்தில், தொழில் நுபம் மிகவும் வளர்ந்துள்ள நிலையில், மக்களுக்கு தகவல் மற்றும் செய்தி விரைவாக சென்று சேர்ந்துவிடுகிறது. எனவே, தலைவர்கள் உடன் உள்ள தலைவர்களுடனும், மக்களுடனும் தொடர்பில் இல்லை என்றாலோ கருத்தைப் பகிர்ந்துகொள்ளவில்லை என்றாலோ, உலக அமைதி என்பதும் பிராந்திய அமைதி என்பதும் கானல் நீராகவே அமையும். காரணம், அமைதிக்கு முதற்படி உரையாடல். அதனைப் பல தளங்களிலும் மேற்கொள்ள வேண்டியது அவசியம்.
