உலகெங்கும் உள்ள 190-க்கும் மேற்பட்ட நாடுகள் கோவிட்-19 தொற்றால் கடுமையாகப் பாதிக்கப்பட்டுள்ளன. கரோனா தொற்றை பல நாடுகள் மோசமாகக் கையாண்டுவருவதாகப் உலகத் தலைவர்களும் விமர்சித்துள்ளனர். இருப்பினும், ஆஸ்திரேலியாவுக்கு அருகேவுள்ள குட்டித்தீவு நாடான நியூசிலாந்தில், கரோனா தடுப்பு நடவடிக்கைகளைப் பிரதமர் ஜெசிந்தா ஆர்டெர்ன் மிகச் சிறப்பாக மேற்கொண்டுவருவதாகப் பலரும் பாராட்டினர்.
இந்நிலையில், நியூசிலாந்து நாட்டில் சிகிச்சைப் பெற்றுவந்த கடைசி கரோனா நோயாளியும் தற்போது குணமாகியுள்ளதால், கரோனா இல்லாத நாடாக நியூசிலாந்து உருவெடுத்துள்ளது. இது குறித்து நியூசிலாந்து பிரதமர் ஜெசிந்தா ஆர்டெர்ன் கூறுகையில், "நியூசிலாந்தில் வைரஸ் (தீநுண்மி) பரவலை இப்போது தடுத்துவிட்டோம் என்றே நாங்கள் நம்புகிறோம். ஒரு தொடர்ச்சியான முயற்சியாலேயே இது சாத்தியமாகியுள்ளது.
நிச்சயமாக நாட்டில் மீண்டும் கரோனா பாதிப்பு ஏற்படக்கூடும் என்று நாங்கள் நம்புகிறோம். அதற்கு நாம் தோற்றுவிட்டதாகப் பொருளாகாது. அதுதான் இந்தத் தீநுண்மியின் இயல்பு. ஆனால் அப்படி நிகழும்பட்சத்தில், நாம் தயார் நிலையில் இருக்க வேண்டும். கடைசி நோயாளியும் குணமடைந்துவிட்டதால், நாட்டில் அமல்படுத்தப்பட்ட கட்டுப்பாடுகளில் பெரும்பாலானவை நீக்கப்படுகின்றன.
திருமணம், இறுதிச்சடங்கு உள்ளிட்ட பொது நிகழ்ச்சிகளை எவ்வித கட்டுப்பாடுகளுமின்றி நடத்தலாம். கடைகளும் வழக்கம்போல செயல்படலாம். பொதுப் போக்குவரத்தும் 100 விழுக்காடு இயங்கும். இருப்பினும் நியூசிலாந்து குடிமகன்களைத் தவிர மற்றவர்கள் வெளிநாடுகளிலிருந்து நுழைய தடைவிதிக்கப்படுகிறது.
நாட்டில் நுழையும் நியூசிலாந்து குடிமகன்களும் நிச்சயம் குறிப்பிட்ட காலத்திற்குத் தங்களை தனிமைப்படுத்திக் கொள்ள வேண்டும். நாட்டில் கடைசி கரோனா நோயாளி குணமடைந்ததைத் கொண்டாடும் வகையில், நானும் எனது மகளும் வீட்டின் வரவேற்பறையில் நடனமாடினோம். எதற்காக நடனமாடுகிறோம் என்று எனது மகளுக்குப் புரியவில்லை என்றாலும், அவள் உற்சாகமாக என்னுடன் நடனமாடினாள்" என்று தெரிவித்துள்ளார்.
நியூசிலாந்தில் 1504 பேருக்கு கோவிட்-19 உறுதிசெய்யப்பட்டது. அவர்களில் 22 பேர் உயிரிழந்தனர். நியூசிலாந்தில் கடைசியாக 17 நாள்களுக்கு முன்னர் ஒருவருக்கு கரோனா உறுதிசெய்யப்பட்டது. அதன் பிறகே சுமார் 40 ஆயிரம் பேருக்கு பரிசோதனை நடத்தப்பட்டிருந்தாலும், யாருக்கும் புதிதாக கோவிட்-19 உறுதிசெய்யப்படவில்லை.
இதையும் படிங்க: இடம் இல்லை... நியூசிலாந்து பிரதமரை வெளியேற்றிய உணவகம்
