எல்லை பாதுகாப்புக்கான நிதியை திரட்ட டிரம்ப் பல முறை முயன்றும் முடியவில்லை. அமெரிக்கா நாடாளுமன்ற கூட்டு குழு அமர்வு (Congress Joint Session) நிறைவேற்றிய மசோதாவும் டிரம்பின் நிதித் தேவையை பூர்த்தி செய்யவில்லை.
இதனால், டிரம்ப் தேசிய அவசர நிலையை பிரகடனம் செய்து, எல்லைப் பாதுகாப்பு மசோதாவில் கையெழுத்திடுவார் என்றும், இதன் மூலமாக ராணுவ நிதிகளின் உதவியுடன் மெக்ஸிகோ எல்லை சுவர் கட்டப்படும் என வெள்ளை மாளிகை அறிவித்துள்ளது.
இதற்கு அந்நாட்டின் எதிர்க்கட்சிகள் எதிர்ப்பு தெரிவித்து வருகிறது. அந்நாட்டின் ஜனநாயக கட்சித் தலைவர் இந்த நடவடிக்கை குறித்து 'அதிகார துஷ்பிரயோகம்' என்றும், 'சட்டத்துக்கு புறம்பானது' என்றும் விமர்சித்துள்ளார்.
மெக்ஸிகோ எல்லை சுவர் எழுப்புவது டிரம்பின் முக்கியமான தேர்தல் வாக்குறுதி என்பது குறிப்பிடத்தக்கது.
