என் இனிய பொன் நிலாவே...திரைத்துறையில் பன்முகம் கொண்ட பிரதாப் போத்தன்!!

திரைத்துறையில் பன்முகம் கொண்ட நடிகரும், இயக்குனருமான பிரதாப் போத்தன் மறைவுக்கு திரைத்துறையினர் இரங்கல் தெரிவித்துள்ளனர். அவரின் திரைத்துறை பயணம் குறித்து விரிவாக பார்க்கலாம்.

திரைத்துறையில் பன்முகம் கொண்ட நடிகரும் இயக்குனருமான பிரதாப் போத்தன்(69) சென்னையில் உள்ள தனது இல்லத்தில் உடல்நலக்குறைவு காரணமாக இன்று உயிரிழந்தார். பிரதாப் போத்தன் 1979ல் வெளிவந்த அழியாத கோலங்கள் என்கிற தமிழ் படத்தின் மூலம் நடிகராக அறிமுகமானார்.

தமிழ், மலையாளம், தெலுங்கு, ஹிந்தி ஆகிய மொழிகளில் 100க்கும் மேற்பட்ட திரைப்படங்களில் வித்தியாசமான நடிப்பை வெளிப்படுத்தியிருப்பார். அதிலும் குறிப்பாக பாலு மகேந்திரா இயக்கிய மூடுபனி, மகேந்திரன் இயக்கிய நெஞ்சத்தை கிள்ளாதே மற்றும் வறுமையின் நிறம் சிகப்பு ஆகிய திரைப்படங்களில் பிரதாப் போத்தன் நடிப்பு பெரிதும் பேசப்பட்டது.

கமல்ஹாசனுடன் பிரதாப் போத்தன் நடித்த பேசும் படம் (உரையாடல்கள் இல்லாத படம்) மக்களிடையே பெரும் வரவேற்பை பெற்றது. மேலும் பிரதாப் போத்தன் பல திரைப்படங்களை இயக்கியுள்ளார். அவர் இயக்கிய “மீண்டும் ஒரு காதல் கதை” சிறந்த திரைப்படத்திற்கான தேசிய விருது பெற்றார். மேலும் ”கரையெல்லாம் செண்பகப்பூ” என்னும் சுஜாதாவின் நாவலை படமாக்கியுள்ளார்

சீவலப்பேரி பாண்டி, ஜீவா, வெற்றி விழா,மை டியர் மார்த்தாண்டன், மகுடம், ஆத்மா, உள்ளிட்ட தமிழ் படங்களையும் இயக்கியுள்ளார். வெற்றி விழா திரைப்படத்தில் முதன்முதலாக ஸ்டெடி கேமரா தொழில்நுட்பம் பயன்படுத்தப்பட்டது. மேலும் மலையாளத்தில் ‘தாகரா’ ‘சாமரம்’ ‘லாரி’ என பல வெற்றி படங்களை இயக்கியுள்ளார். பிரதாப் போத்தன் கடைசியாக இயக்கிய தமிழ் திரைப்படம் ‘லக்கி மேன்’.

மேலும் ராம், படிக்காதவன், ஆயிரத்தில் ஒருவன், சர்வம், அலெக்ஸ் பாண்டியன், பூஜை, ரெமோ, பொன்மகள் வந்தாள், கமலி ஃப்ரம் நடுக்காவேரி உள்ளிட்ட பல படங்களில் நடித்துள்ளார்

ரசிகர்கள் மற்றும் பிரபலங்கள் பலரும் பிரதாப் போத்தனின் மறைவுக்கு சமூக வலைதளங்கள் வாயிலாக இரங்கல் தெரிவித்து வருகின்றனர்.

இதையும் படிங்க: நடிகர் விஜய் சொகுசு கார் வழக்கு - வரியை செலுத்த உயர்நீதிமன்றம் உத்தரவு