சென்னை: ஏ.ஆர்.கே சரவணன் இயக்கத்தில் ஹிப் ஹாப் ஆதி நடித்துள்ள, வீரன் திரைப்படத்தின் பிரி ரிலீஸ் நிகழ்ச்சி சென்னை ராயப்பேட்டை EA மாலில் நடைபெற்றது. இந்த நிகழ்ச்சியில் நடிகர் ஹிப் ஹாப் ஆதி, நடிகை ஆதிரா வினய், காளி வெங்கட், முனீஸ்காந்த், இயக்குநர் சரவணன் மற்றும் படக்குழுவினர் கலந்து கொண்டனர்.
அங்கு கூடி இருந்த ரசிகர்கள் மத்தியில் ஹிப் ஹாப் ஆதி பாடல் பாடி ரசிகர்களை உற்சாகப்படுத்தினார். அதனைத் தொடர்ந்து, முனீஸ்காந்த் மேடையில் பேசும்போது, “55 வயது தாத்தா கதாபாத்திரமாக தான் இயக்குநர் இந்த கேரக்டரை தேர்வு செய்திருந்தார். பின்னர், நானே அந்த கதாபாத்திரத்தை செய்கிறேன் என்று சொன்னேன். முழுவதும் நகைச்சுவை தான். கதை ஒரு பக்கம் போகும் நானும் காளி வெங்கட்டும் ஒரு பக்கம் போவோம். கதைக்கு சம்பந்தம் இல்லாமல் தான் எங்கள் கதாப்பாத்திரம் இருக்கும்” என்றார்.
அதனைத்தொடர்ந்து, காளி வெங்கட் மேடையில் பேசினார். அப்போது, “முண்டாசுப்பட்டி படத்திற்குப் பிறகு எங்களுக்கு நல்ல இடம் இருந்தது. ஆனால், மரகத நாணயம் படத்தில் நடிக்க முடியவில்லை. முண்டாசுப்பட்டி படத்திற்குப் பிறகு நானும் முனீஸ்காந்த்தும் இணைந்து நடிக்க முடியவில்லை. இந்த படம் (வீரன்) ரொம்ப ஜாலியான படம். இந்தப் படத்தின் மீது ரொம்ப நம்பிக்கை உள்ளது. நான் கேப்டன் மில்லர் படத்திலும் நடித்துள்ளேன்” என்றார்.
அதை தொடர்ந்து பேசிய இயக்குனர் சரவணன், “2017-ல் இந்தக் கதையை எழுதினேன். அப்போதே ஆதி இடம் கதை சொல்லி விட்டேன். இந்த நேரத்தில் ஹீரோவுக்கு நன்றி சொல்லிக் கொள்கிறேன். இந்த கதையை அவர் நம்பினார். தொடக்கத்தில் இருந்து இப்போதுவரை என்னுடன் உள்ளார். அவர் இரண்டு படம் இயக்கி உள்ளார், எப்படி உங்களுடன் ஒத்துப்போகும் எனக் கேட்டார்கள். ஆனால், அவர் அப்படி இல்லை. 80 நாட்கள் பிளான் பண்ணிணோம். ஆனால், முன்னாடியே முடித்து விட்டோம். இந்த கதை ஒரு சூப்பர் ஹீரோ கதை” என்றார்.
மேலும், “நெய்வேலியில் நடந்த ஒரு உண்மை நிகழ்ச்சியை சேர்த்து தான் இந்தக் கதையை உருவாக்கினேன். மின்னல் முரளி படத்தின் ஃபர்ஸ்ட் லுக்(First look) வெளியான போதே, இந்தப் படத்தின் வேலையை நாங்கள் தொடங்கி விட்டோம். அந்தப் படக்குழு உடன் இணைந்து எங்கள் கதையை நாங்கள் ஆய்வு செய்து பார்த்தோம். இரண்டும் வேறு வேறு கதை. படம் பார்த்தால் உங்களுக்கு வித்தியாசம் தெரிந்து விடும்.
நான் இயக்குநராக கதை எழுத மாட்டேன். ஒரு ரசிகனாக தான் கதையை எழுதுவேன். ஒரு 5, 6 வருடங்கள் கழித்து ஏதாவது ஒரு படம் தான் நமக்கு மனதில் நிற்கும். அந்த ஃபீல் (Feel) இந்தப் படத்தில் கிடைத்தது. வினய் இறுதி நேரத்தில் தான் படத்தில் வந்தார். அவருடைய கதாபாத்திரம் வேற மாதிரி. அதனால் இந்த படத்திற்காக ஆராய்ச்சி செய்து தான் படத்தை எடுத்தோம்” எனக் கூறினார்.
அதனைத் தொடர்ந்து ஹிப் ஹாப் ஆதி மேடையில் பேசும்போது, “வெற்றி, தோல்வி என்பதை எல்லாம் தாண்டி உங்கள் அன்பு எப்போதும் உள்ளது. எல்லாருக்கும் மிக்க நன்றி. வீரன் திரைப்படம் ஒரு குடும்பத் திரைப்படம். குழந்தைகளுக்கு பிடிக்கிற நிறைய விஷயம் உள்ளது. சக்திமான் நம்ம ஊர் சூப்பர் ஹீரோ, எனக்கு மிகவும் பிடிக்கும்.
இந்த கதையைப் படித்த உடன் நடிக்க வேண்டும் என ஓகே சொல்லிவிட்டேன். 20 ஆண்டுகள் கழித்து நமக்கு ஒரு நிறைவான படம் வேண்டும்; அது வீரனாக இருக்கும்’’ என்றார். ’’நான் பண்ண 5 படங்களில் இது தான் பெரிய படமாக இருக்கும். சத்ய ஜோதி தியாகராஜன் மற்றும் தயாரிப்பு நிறுவனம் எங்களுக்கு மிகப்பெரிய அளவில் ஆதரவாக உள்ளனர். வினய் வந்த பிறகு படம் இன்னும் பெரிய படமாக ஆனது. அனைவருக்கும் நன்றி.
இந்தப் படத்தில் காதல் பாடல்கள் இல்லை. வழக்கமாக என்னுடைய படங்களில் காதல் பாடல்கள் இருக்கும். ஆனால், இந்தப் படத்தில் வேறு ஒரு மாதிரியான காதல் பாடல் இருக்கும். முறைப்படி நாங்கள் இசைப் பயிற்சி எடுத்து வரவில்லை. நிறைய விஷயங்களை பிரேக் செய்துள்ளோம். தனி ஒருவன், இமைக்கா நொடிகள் போன்ற படங்களில் அப்படி பண்ணி உள்ளேன். அந்த மாதிரி இந்தப் படத்தின் ஆர்ஆர் சிறப்பாக இருக்கும்.
மியூசிக்காக இந்தப் படம் மிக சிறப்பாக வரும். குதிரை ஒரு நாள் கேமரா மேல் தாண்டி குதித்தது. குதிரைக்கு ஒன்றும் ஆகாமல் பார்த்துக்கொள்ள வேண்டும். அதுதான் நம்முடைய விதிகள். இரண்டு ஆண்டுகள் கழித்து திரையரங்கிற்கு வருகிறது, இப்படம். குழுவுடன் இணைந்து பார்த்தால் கண்டிப்பாக படம் நன்றாக இருக்கும்” என்றார்.
பின், வீரன் படத்தில் வரும் பவர் போல ஒரு சக்தி உண்மையில் கிடைத்தால் என்ன மாற்றம் செய்ய உள்ளீர்கள் என்ற கேள்விக்கு, “சாதி, மதம், என நிறைய பிரிவுகள் உள்ளன. விளையாட்டில் கூட பிரிவு உள்ளது. அனைத்து பிரிவுகளையும் தவிர்த்து, அன்பு சார்ந்த சமூகமாக மாற வேண்டும் என என் சக்தியால் செய்வேன். ஒரு முறை தான் வாழப்போறோம். அதை சிறப்பாக வாழ வேண்டும். அப்போது வேகம் இருந்தது. தற்போது விவேகம் உள்ளது. வாழ்க்கை ஒரு முறை தான் ஜாலியாக வாழ வேண்டும்” எனக் கூறினார்.
இதையும் படிங்க: பிச்சைக்காரன் 2 ரிலீஸ் எஃபெக்ட் - 2000 ரூபாய் செல்லாதது குறித்து விஜய் ஆண்டனி கருத்து!
