இயக்குநர் விவேக் ரஞ்சன் அக்னிஹோத்ரியின் "தி காஷ்மீர் ஃபைல்ஸ்" திரைப்படம், கடந்த மார்ச் மாதம் வெளியாகி பார்வையாளர்கள் மற்றும் விமர்சகர்கள் மத்தியில் வரவேற்பைப் பெற்றது. வசூல் ரீதியாகவும் வெற்றி பெற்றது.
அண்மையில், தனது அடுத்த படம் குறித்த அறிவிப்பை விவேக் அக்னிஹோத்ரி வித்தியாசமான முறையில் தெரிவித்திருந்தார். படத்தின் தலைப்பு குறித்த யூகத்தை மட்டும் கொடுத்துவிட்டு நெட்டிசன்களை கருத்துக் கூற வைத்தார். இந்த முயற்சி சமூக வலைதளங்களில் கவனத்தை ஈர்த்தது.
இந்த நிலையில், தனது அடுத்த படத்தின் தலைப்பு "தி வேக்சின் வார்" என்று விவேக் அக்னிஹோத்ரி அறிவித்துள்ளார். போஸ்டரில் கரோனா தடுப்பூசி மருந்து கொண்ட குப்பி ஒன்று உள்ளது. மேலும், அதில் 'நமக்கு தெரியாத போரில் பங்கெடுத்து, வென்ற கதை' என்று குறிப்பிடப்பட்டுள்ளது. இதை வைத்துப் பார்க்கும்போது, இப்படம் கரோனா தடுப்பூசி கண்டுபிடிப்பு, பயன்பாடு உள்ளிட்டவற்றை பற்றிய கதையம்சம் கொண்டதாக இருக்கும் எனத் தெரிகிறது.
இப்படம் 2023ஆம் ஆண்டு சுதந்திர தினத்தன்று, தமிழ், இந்தி, ஆங்கிலம், குஜராத்தி, பஞ்சாபி உள்ளிட்ட 11 மொழிகளில் வெளியாகவுள்ளது. இப்படத்தை I Am Buddha Productions சார்பில் பல்லவி ஜோஷி தயாரிக்கிறார்.
இதுகுறித்து பல்லவி ஜோஷி கூறுகையில், "இந்தப் படம் நமது விஞ்ஞானிகளின் வெற்றியைக்கொண்டாடுகிறது. தடுப்பூசி போருக்காக அவர்கள் செய்த தியாகம், அர்ப்பணிப்பு மற்றும் கடின உழைப்புக்கு நாம் செலுத்தும் ஒரு அர்ப்பணிப்பாக இந்த திரைப்படம் இருக்கும்" என்றார்.
இப்படத்தில் நடிக்கும் நடிகர்கள் குறித்த விவரங்கள் விரைவில் வெளியாகும் எனத்தெரிகிறது.
