PS-2 Update: சுட சுட வெளியான பொன்னியின் செல்வன் அப்டேட்! என்ன தெரியுமா?

பொன்னியின் செல்வன் இரண்டாம் பாகத்தின் முதல் சிங்கிள் விரைவில் வெளியாகும் என படக்குழு அறிவித்துள்ளது.

Etv Bharat

Published : Mar 9, 2023, 9:19 PM IST

இந்தியாவின் முன்னணி இயக்குனர் மணிரத்னம் இயக்கத்தில் அவரது கனவுப் படமாக உருவான திரைப்படம் பொன்னியின் செல்வன். அமரர் கல்கியின் நாவலை அடிப்படையாகக் கொண்டு இரண்டு பாகங்களாக உருவானது பொன்னியின் செல்வன். வந்தியத் தேவனாக கார்த்தி, குந்தவையாக த்ரிஷா, ஆதித்த கரிகாலனாக விக்ரம், அருள்மொழி வர்மனாக ஜெயம் ரவி, ஆழ்வார்கடியான் நம்பியாக ஜெயராம், நந்தினியாக ஐஸ்வர்யா ராய், பெரிய பழுவேட்டரையராக சரத்குமார், சின்ன பழுவேட்டரையராக பார்த்திபன் உள்ளிட்டோர் முக்கிய கதாபாத்திரங்களில் நடித்து இருந்தனர்.

பொன்னியின் செல்வன் படத்திற்கு ஏ.ஆர்.ரகுமான் இசை அமைத்து இருந்தார். இதன் முதல் பாகம் கடந்த ஆண்டு செப்டம்பர் 30ஆம் தேதி உலகம் முழுவதும் வெளியானது. படம் வெளியாகி மிகப் பெரிய வெற்றியை பெற்றது. பொன்னியின் செல்வன் நாவல் படித்தவர்களும், படிக்காதவர்களும் படத்தை பார்த்து வியந்து பாராட்டினர்.

படத்தில் நடித்த அனைவரது நடிப்பும் பேசப்பட்டது. மேலும் பொன்னியின் செல்வன் முதல் பாகம் 500 கோடி ரூபாய்க்கும் மேல் வசூலித்து உள்ளதாக கூறப்படுகிறது. கடந்த ஆண்டு தமிழில் வெளியான படங்களில் அதிக வசூல் செய்த படம் என்ற சாதனையை பொன்னியின் செல்வன் படைத்தது.

அதுமட்டுமின்றி இந்த படத்தின் முதல் பாகமே, படத்தின் பட்ஜெட்டை மீறி வசூலித்து உள்ளது. இப்படம் 150 நாட்களில் இரண்டு பாகத்திற்குமான படப்பிடிப்பு முடிக்கப்பட்டது குறிப்பிடத்தக்கது. முதல் பாகம் இமாலய வசூல் சாதனை படைத்துள்ளதால் இரண்டாம் பாகத்திற்கு மிகப் பெரிய எதிர்பார்ப்பு ஏற்பட்டுள்ளது.

முதல் பாகத்தில் நாவலில் வருவது போல் அறிமுக காட்சி இல்லை என்றாலும் பல்வேறு காட்சிகள் நாவலில் இருந்தபடியே படமாக்கபட்டிருந்தன. ஆனால் குடந்தை ஜோதிடர் கதாபாத்திரம் இல்லாதது ரசிகர்களுக்கு அதிருப்தியை ஏற்படுத்தியது. பொன்னியின் செல்வன் முதல் பாகத்தில் நந்தினியாக நடித்த ஐஸ்வர்யா ராய் மற்றும் குந்தவையாக நடித்த த்ரிஷா ஆகியோரின் நடிப்பு மிகப் பெரும் வரவேற்பை பெற்றது.

இதனையடுத்து இரண்டாம் பாகம் இந்த ஆண்டு ஏப்ரல் 28ஆம் தேதி வெளியாகும் என்று அறிவிக்கப்பட்டுள்ளது. இதனால் ரசிகர்கள் மிகுந்த எதிர்பார்ப்பில் உள்ளனர். பொன்னியின் செல்வன் படத்தின் இரண்டாம் பாகம் வெளியாக இன்னும் 50 நாட்களே உள்ள நிலையில் புது அப்டேட்டை படக்குழு வெளியிட்டுள்ளது.

படக்குழு இரண்டாம் பாகத்திற்கான விளம்பரப்படுத்தும் பணிகளில் மும்முரமாக இறங்கியுள்ளது. இதனை முன்னிட்டு படக்குழு சார்பில் இன்று வீடியோ ஒன்று வெளியிடப்பட்டது. அதில் குந்தவை கதாபாத்திரத்துக்கு த்ரிஷா தயாராகும் வீடியோவை வெளியாகி உள்ளது.

மேலும் இரண்டாம் பாகத்தில் இருந்து முதல் பாடல் விரைவில் வெளியாகும் என்றும் குறிப்பிடப்பட்டுள்ளது. பொன்னியின் செல்வன் முதல் பாகமே படத்தின் பட்ஜெட்டை வசூலித்துவிட்ட நிலையில் இரண்டாம் பாகமும் வசூலில் சாதனை படைக்கும் என எதிர்பார்க்கப்படுகிறது.