சென்னை: இயக்குநர் அட்லி தமிழ் சினிமாவில் வெற்றிகரமான கமர்ஷியல் இயக்குநராகப் பார்க்கப்படுகிறார். தமிழ் சினிமாவில் வெளியாகி வெற்றி பெற்ற படங்களை காப்பியடித்து படம் எடுக்கிறார் என்று இவர் மீது விமர்சனங்கள் வைக்கப்பட்டாலும் தான் எடுக்கின்ற படங்களில் பல்வேறு பொழுதுபோக்கு அம்சங்களுடன் கூடிய காட்சியை வைத்து ரசிகர்கள் மனதை கவரக்கூடியவர்.
விஜய்யை வைத்து இவர் இயக்கிய தெறி, மெர்சல், பிகில் ஆகிய படங்கள் விஜயின் திரை வாழ்வில் மிகப்பெரிய வெற்றி படங்களாகப் பார்க்கப்படுகின்றன. இப்படி தமிழில் வெற்றிக்கொடி நாட்டிய அட்லி, தற்போது பிரபல பாலிவுட் ஹீரோ ஷாருக்கானை இயக்கி வருகிறார்.
ஜவான் என்று பெயரிடப்பட்டுள்ள இதில் கதாநாயகியாக நயன்தாராவும், வில்லனாக விஜய் சேதுபதியும் நடித்து வருகின்றனர். மேலும் நடிகர் யோகிபாபு, பிரியாமணி என மிகப்பெரிய நட்சத்திர பட்டாளமே நடித்து வரும் இப்படத்திற்கு அனிருத் இசையமைக்கிறார். இப்படத்தை ஷாருக்கானின் ரெட் சில்லீஸ் நிறுவனம் தயாரித்து வருகிறது. இப்படத்தின் படப்பிடிப்பு விறுவிறுப்பாக நடைபெற்று வருகிறது. நடிகர் விஜய் சிறப்பு தோற்றத்தில் நடிக்கிறார் என்றும் பேசப்பட்டு வருகிறது.
இப்படத்தின் டைட்டில் அறிவிப்பு டீஸர் கடந்த ஆண்டு வெளியாகி படத்தின் மீதான எதிர்பார்ப்பை மேலும் அதிகரித்திருந்தது. மேலும் ஜவான் படத்தை வருகிற ஜூன் 2ஆம் தேதி ரிலீஸ் செய்ய உள்ளதாக தெரிவித்து இருந்தனர். இந்த நிலையில் படத்தின் படப்பிடிப்பு இன்னும் முடியவில்லை என்பதால் குறித்த தேதியில் படத்தை வெளியிடுவது முடியாத காரியம் என்கின்றனர்.
படப்பிடிப்பு முடிந்தாலும் கிராஃபிக்ஸ் மற்றும் போஸ்ட் புரொடக்ஷன் பணிகள் இருப்பதால் ஜூன் மாதம் படம் வெளியாக வாய்ப்பில்லை என்று தகவல் வெளியாகியுள்ளது. இதனால் படத்தின் ரிலீஸ் அக்டோபருக்கு தள்ளிப்போகும் எனத் தெரிகிறது. இதனால் விஜய் தரப்பு அதிர்ச்சிக்குள்ளாகியுள்ளது.
லோகேஷ் கனகராஜ் இயக்கத்தில் விஜய் நடித்து வரும் லியோ படம் அக்டோபர் 19ஆம் தேதி வெளியாகும் என்று ஏற்கனவே அறிவிக்கப்பட்டுள்ளது. மேலும் லியோ படம் தமிழ், தெலுங்கு, கன்னடம், மலையாளம், இந்தி என பான் இந்தியா முழுவதும் பான் இந்தியா படமாக ரிலீஸ் செய்யத் திட்டமிட்டு உள்ளனர். இதன் மூலம் இந்தியிலும் விஜய்யின் மார்க்கெட் உயரும் என எதிர்பார்க்கப்பட்ட நிலையில் தற்போது ஜவான் படமும் அக்டோபரில் ரிலீஸ் ஆகும் என்கிற தகவல் லியோ படத்துக்கு சற்று பின்னடைவை ஏற்படுத்தி உள்ளது.
ஷாருக்கான் நடிப்பில் சமீபத்தில் வெளியான பதான் படம் மிகப்பெரிய வெற்றியை பெற்றதோடு ரூ.1000 கோடிக்கு மேல் வசூலையும் அள்ளியது. இதனால் ஜவான் படத்துக்கும் எதிர்பார்ப்பு அதிகரித்துள்ளது. அட்லி முதல் முறையாக இந்திப் படம் இயக்குகிறார் என்ற மகிழ்ச்சியில் இருந்த விஜய் ரசிகர்களுக்கு, தற்போது தர்மசங்கடமான நிலை ஏற்பட்டுள்ளதாக சமூக வலைத்தளங்களில் கிசுகிசுத்து வருகின்றனர்.
இதையும் படிங்க: சந்திரமுகி 2 பட பிடிப்பிலிருந்து கண்ணீருடன் விடைபெற்ற கங்கனா!
