ஹைதராபாத்: அட்லீ இயக்கத்தில் ஷாருக்கான் நடிப்பில் ஜவான் திரைப்படம் கடந்த செப்டம்பர் 7ஆம் தேதி உலகமெங்கும் உள்ள திரையரங்குகளில் வெளியானது. ரெட் சில்லீஸ் நிறுவனம் தயாரித்திருந்த ஜவான் படத்தில் நயன்தாரா, விஜய் சேதுபதி, யோகி பாபு, தீபிகா படுகோனே, ப்ரியாமணி உள்ளிட்ட பலர் நடித்து இருந்தனர். ஜவான் படத்திற்கு அனிருத் இசையமைத்து உள்ளார்.
ஜவான் படம் தென் இந்தியாவில் எதிர்பார்த்த அளவு வரவேற்பை பெறவில்லை என்றாலும், வட இந்தியாவில் பெரும் வரவேற்பை பெற்றது. எனினும் தமிழ் சினிமாவில் ராஜா ராணி, தெறி, மெர்சல், பிகில் ஆகிய படங்களை இயக்கிய அட்லீ பாலிவுட்டில் ஷாருக்கானை வைத்து இயக்கியுள்ள ஜவான் திரைப்படம் உலக அளவில் 1000 கோடி வசூலை நெருங்கி வருகிறது.
முன்னதாக ஜவான் பாலிவுட் பாக்ஸ் ஆபிஸில் 100, 200, 300, 400, 500 கோடி வசூலை மிக வேகமாக செய்த திரைப்படம் என்ற சாதனையை படைத்தது. கடந்த மூன்று வாரங்களாக பாக்ஸ் ஆபிஸில் நிலையான வசூலை பெற்று வந்த ஜவான் நேற்று மூன்றாவது வார இறுதி நாள் வசூலில் 66% சரிவை சந்தித்தது. சாக்னில்க் என்ற சினிமா வர்த்தக இணையதள அறிக்கையின் படி, ஜவான் திரைப்படம் 19வது நாள் பாக்ஸ் ஆபிஸில் 5 கோடி மட்டுமே வசூல் செய்யததாக தகவல் கூறப்பட்டு உள்ளது.
வார இறுதி நாளான நேற்று உலக அளவில் ஜவான் படம் 15 கோடி ரூபாய் மட்டுமே வசூல் செய்துள்ளதாக படக்குழு தரப்பில் தகவல் கூறப்பட்டு உள்ளது. அதேநேரம் ஜவான் திரைப்படம் இந்தியாவை காட்டிலும் வெளிநாடுகளில் நல்ல வரவேற்பை பெற்று வருவதாக கூறப்படுகிறது. ஜவான் திரைப்படம் விரைவில் ஆயிரம் கோடி வசூல் செய்யும் என எதிர்பார்க்கப்படுகிறது.
மேலும் ஜவான், பதான் திரைப்படங்கள் மூலம் ஷாருக்கான் 2 முறை 1000 கோடி வசூல் செய்த முதல் இந்திய நடிகர் என்ற சாதனை படைப்பார் என கூறப்படுகிறது. ஜவான் திரைப்படத்திற்கு பிறகு ஷாருக்கான் ராஜ்குமார் ஹிரானி இயக்கத்தில் டுங்கி படத்தில் நடித்து வருகிறார். டுங்கி திரைப்படம் இந்த ஆண்டு டிசம்பர் மாதம் வெளியாகும் என தகவல் வெளியாகி உள்ளது.
இதையும் படிங்க: இணையத்தைக் கலக்கும் ராகுல் சத்தா - பரினீதி சோப்ரா திருமண புகைப்படங்கள்!
