சென்னை: இயக்குநர் லோகேஷ் கனகராஜ் இயக்கத்தில் விஜய் நடித்துள்ள படம் லியோ. மிகுந்த எதிர்பார்ப்பை ஏற்படுத்தியுள்ள இப்படம் வரும் 19ஆம் தேதி உலகம் முழுவதும் வெளியாக உள்ளது. இப்படத்தில் த்ரிஷா, மன்சூர் அலிகான், மிஷ்கின், அர்ஜுன், கௌதம் மேனன், சஞ்சய் தத் உள்ளிட்ட பலர் நடித்துள்ளனர். லியோ படத்திற்கு அனிருந் இசையமைத்துள்ளார். லியோ படத்தின் டிரெய்லர் சமீபத்தில் வெளியானது. டிரெய்லர் ரசிகர்கள் மத்தியில் மாபெரும் வரவேற்பைப் பெற்று வருகிறது.
இந்நிலையில், லியோ படத்தில் இடம் பெற்ற 'நான் ரெடி' என்ற பாடலுக்கு நடனம் ஆடிய நடனக் கலைஞர்களுக்கு சம்பளம் வழங்கவில்லை என்ற புகார் எழுந்துள்ளது. இப்பாடலில் நடன கலைஞர்களாக பணியாற்றிய சுமார் 1300க்கும் மேற்பட்டோருக்கு படக்குழு சார்பில் இருந்து இதுவரை இன்னும் ஒரு ரூபாய் சம்பளம் கூட கொடுக்கவில்லை என்று நடன கலைஞர்கள் குற்றச்சாட்டு வைத்துள்ளனர்.
இதுகுறித்து நடன கலைஞர் ஒருவர் வெளியிட்ட வீடியோ சமூக வலைதளங்களில் வைரலானது. லியோ படத்தின் ’நான் ரெடி தான்’ பாடலுக்கு நடனமாடுவதற்காக சுமார் 4 மாதங்களுக்கு முன்பு சென்னை வடபழனி பிரசாத் லேபில் ஆடிஷன் வைக்கப்பட்டுள்ளது. இந்த ஆடிஷனில் தேர்வு செய்யப்பட்ட சுமார் 1300 நடன கலைஞர்கள் 8 நாட்கள் கால்ஷீட்டில், ஒரு நபருக்கு 20,000 ரூபாய் பேமெண்ட்டில் நடனமாட வேண்டும் என்றும் படக்குழு சார்பில் தெரிவிக்கப்பட்டுள்ளது.
இந்நிலையில் சென்னை பனையூரில் நடைபெற்ற இந்த பாடலுக்கான படப்பிடிப்பு 8 நாட்கள் திட்டமிடப்பட்டிருந்த நிலையில், 6 நாட்களிலேயே பாடலின் படப்பிடிப்பை படக்குழுவினர் முடித்துள்ளனர். அதேபோல், சொல்லப்பட்ட 8 நாட்களில் 2 நாட்கள் போக மீதி 6 நாட்களுக்கு 16000 ரூபாய் மட்டும் சம்பளம் வழங்குவதாகவும், அதற்காக ஒவ்வொருவரும் அவரவர் வங்கி கணக்கு விவரங்களை கொடுக்குமாறும் படக்குழு சார்பில் நடன கலைஞர்கள் வங்கி விவரங்களை பெற்றுள்ளனர்.
இந்நிலையில் பாடலுக்கான படப்பிடிப்பு முடிந்து 4 மாதங்கள் ஆகியும், திரைப்படம் வெளியாக இன்னும் 2 வாரங்களே உள்ள நிலையில் இதுவரை 1300 மேற்பட்ட நடன கலைஞர்களுக்கு ஒரு ரூபாய் கூட படக்குழு சம்பளம் தரவில்லை என்று தெரிவிக்கின்றனர். தயாரிப்பு நிறுவனம் நான் ரெடி பாடலுக்கு நடனமாடிய நடன கலைஞர்களுக்கு 6 நாட்களுக்கு சுமார் 24 ஆயிரம் ரூபாய் ஊதியமாக தெரிவித்திருந்த நிலையில் ஒரு சிலருக்கு 7000 ரூபாயும் ஒரு சிலருக்கு 2000, 3000 ரூபாய் மட்டுமே ஊதியமாக வழங்கப்பட்டு இருப்பதாகவும் நடன கலைஞர்கள் குற்றம்சாட்டி வருகின்றனர்.
அதே போல் இந்த விவகாரம் தொடர்பாக தயாரிப்பு நிறுவனத்தையும், தங்கள் யூனியனையும் தொடர்பு கொண்ட போது, இதுவரையிலும், இன்னும் ஓரிரு நாட்களில் சம்பளம் வந்து விடும் என்று தெரிவித்ததாகவும், ஆனால் இதுவரை எந்த ஒரு பதிலும் கிடைக்கவில்லை என்று தெரிவித்தனர்.
அதேபோல், இது படத்தின் புரோமோஷனுக்காவோ அல்லது யாருடைய தூண்டுதலின் பேரிலோ நாங்கள் இதை செய்யவில்லை எங்களுடைய சம்பளத்தை கேட்டு நாங்கள் போராடுகிறோம் என்றும் தெரிவித்தனர். இந்த நிலையில் இன்று சென்னை மாநகர காவல்துறை ஆணையர் அலுவலகத்தில் நா ரெடி தான் பாடலில் ஆடிய நடன கலைஞர்கள் புகார் அளிக்க சென்றுள்ளனர்.
ஆனால் நடன கலைஞர்கள் புகாரை காவல்துறை ஆணையர் வாங்க மறுத்துள்ளார். முதலில் உங்களது யூனியனில் சென்று புகார் கொடுங்கள். அவர்கள் நடவடிக்கை எடுக்காத பட்சத்தில் நீங்கள் எந்த பகுதியில் உள்ள படப்பிடிப்பு தளத்தில் நடனம் ஆட அழைத்து செல்லப்பட்டீர்களோ அந்த எல்லையில் வரும் காவல் நிலையத்தில் புகார் அளியுங்கள் என்று கமிஷனர் அலுவலகத்தில் தெரிவித்துள்ளதாக அவர்கள் கூறியுள்ளனர்.
ஏற்கனவே லியோ படத்தின் மீது ஏகப்பட்ட சர்ச்சைகள் சுழன்று வரும் நிலையில் நடனக் கலைஞர்களின் சம்பள புகாரும் படத்திற்கு பிரச்சனையாக உருவெடுத்துள்ளது குறிப்பிடத்தக்கது.
இதையும் படிங்க: 170வது படத்திற்காக புது கெட்டப்பில் நெல்லை வந்த சூப்பர் ஸ்டார்... ரசிகர்கள் உற்சாக வரவேற்பு!
