இயக்குநர் நெல்சன் இயக்கத்தில் விஜய், பூஜா ஹெக்டே, யோகி பாபு உள்ளிட்டோர் நடிப்பில் சமீபத்தில் வெளியான ’பீஸ்ட்’ திரைப்படம் கலவையான விமர்சனங்களைப் பெற்றது.
இந்நிலையில், இப்படம் சில நாட்களுக்கு முன் ஓடிடி தளத்தில் வெளியானது. பின்னர் சமூக வலைதளங்களில் படத்தின் லாஜிக் குறித்து நெட்டிசன்கள் பலரும் தொடர்ந்து விமர்சனம் செய்து வந்தனர்.
இந்த நிலையில் பீஸ்ட் திரைப்படத்தில் பயங்கரவாதிகளுள் ஒருவராக வரும் 'கம்மட்டிபாடம், குருதி, இஷ்க்' போன்ற பல மலையாள படங்களில் நடித்த பிரபல மலையாள நடிகரான ஷைன் டாம் சாக்கோ, சமீபத்தில் ஒரு மலையாள யூ-ட்யூப் சேனலுக்கு அளித்த பேட்டி ஒன்றில் பேசிய அவர், 'பீஸ்ட்' படத்தின் காட்சிகளில் லாஜிக் இல்லை எனக் கூறியுள்ளது ரசிகர்களிடையே சலசலப்பை ஏற்படுத்தியுள்ளது.
இதுகுறித்து அவர் அளித்திருந்த பேட்டியில் தொகுப்பாளர் பீஸ்ட் படத்தின் ட்ரோல்கள் குறித்து கேட்ட போது அவர், 'சாதாரணமாக ஒருவர் அதிக எடையை தூக்கினால், அந்த நபரின் முகத்தில் அதற்கான கஷ்டங்கள் தெரியும். ஆனால், பீஸ்ட் பட இறுதியில் விஜய் வில்லனை தூக்கிக்கொண்டு வரும்போது, அப்படி எதையும் முகத்தில் காட்டவில்லை.
பயங்கரவாதியை ஒரு சூட்கேஸாக எடுத்துச்செல்வது போல் அமைக்கப்பட்ட காட்சிகள் லாஜிக் இல்லாதவை. அதற்கு விஜயை குறை கூறமாட்டேன். படக்குழு தான் காரணம்.
விஜய்யின் 'போக்கிரி' படம் 'பீஸ்ட்' படத்தை விட சிறந்த படம்' எனக் கூறினார். மேலும் படத்தை பார்த்துவிட்டீர்களா என தொகுப்பாளர் கேட்டபோது, 'படத்தை பார்க்கவில்லை. ட்ரோல்களை தான் பார்த்தேன்’ எனக் கூறியுள்ளார்.
முன்னதாக பீஸ்ட் படத்தில் விஜய், ஜெட் ஓட்டும் காட்சிகள் உண்மையான பைலட் சிலரால் ட்ரோல் செய்யப்பட்ட நிலையில், தற்போது சாக்கோ பேசிய பேட்டி சமூக வலைதளங்களில் வைரலாகப் பரவி வருகிறது.
மேலும் விஜயின் ரசிகர்கள் பலரும் சாக்கோவின் இந்த பேச்சினைத் தொடர்ந்து, எதிர் வினையாற்றி வருகிறார்கள்.
இதையும் படிங்க: விக்கி - நயன் ஹனிமூன் க்ளிக்ஸ்
