வேலூர் மக்களவைத் தொகுதியில் போட்டியிடும் திமுக வேட்பாளர் கதிர் ஆனந்த்தை ஆதரித்து அவரது தந்தையும், திமுக பொருளாளருமான துரைமுருகன் நேற்று இறுதிக்கட்ட பரப்புரையில் ஈடுபட்டார்.
வேலூர் மண்டித் தெருவில் நடைபெற்ற பரப்புரை கூட்டத்தில் பேசிய துரைமுருகன், தன் மகன் கதிர் ஆனந்த் வேட்பாளராக அறிவிக்கப்பட்ட நாளிலிருந்து தாங்கள் வேட்டையாடப்படுவதாகக் குற்றம்சாட்டினார்.
"என் வீட்டில் நடத்தப்பட்ட வருமான வரித்துறை சோதனை குறித்து பேசிய அவர், என் வீட்டுப் பெண்களை காவல்துறையினர் கண்காணித்து வருகிறார்கள். அப்படியானால் நாங்கள் என்ன திருடர்கள் கூட்டமா? திமுக பொருளாளராக ஒரு பொறுப்புள்ள பதவியில் இருக்கும் என்னை ஒரு கேடி பட்டியலில் வைத்து காவல் துறையினர் வளைத்துப் பார்ப்பது ஏன்? " என ஆவேசமாகக் கேள்வி எழுப்பினர்.
தொடர்ந்து, "எங்கள் வீட்டில் மட்டும்தான் கத்தை கத்தையாகப் பணம் இருக்கிறதா? வருமான வரித்துறை அலுவலர்கள் என் வீட்டிற்கு வந்து பீரோவை உடைத்து அரிசி மூட்டைகளைத் தள்ளி இரண்டு முறை சோதனை செய்தார்கள். அவர்கள் எடுத்தது என்ன ? வெறும் 10 லட்சம் மட்டும்தானே, 5 பேர் நாங்கள் வரி கட்டுகிறோம் எங்களுக்கு ஆளுக்கு இரண்டு லட்சம் கூட வைத்துக் கொள்ளக் கூடாதா ? ஒரு எம்எல்ஏ கல்யாண விஷேஷத்துற்கு சென்றால் பத்து பைசா கூட இல்லாமல் போக முடியுமா?" என அடுக்கடுக்காக கேள்வி எழுப்பினார்.
பின்னர், தனக்குச் சொந்தமான எல்லா இடங்களிலும் தேர்தல் அலுவலர்கள் சோதனை நடத்தியதாகவும், ஏதோ ஒரு நோக்கத்திற்காக தங்களைச் சோதிப்பதாகக் குற்றம்சாட்டிய அவர், ஒருவேளை இந்த தேர்தலுக்கு பிறகாவது இந்த தொல்லை விட்டு விடுமா என்று பார்க்கிறேன் என வருத்தத்தோடு தெரிவித்தார்.
எனினும், இதற்கெல்லாம் அஞ்சமாட்டோம் என ஆவேசமாகத் தெரிவித்த துரைமுருகன், தன் மகனை எதிர்த்து நிற்கும் வேட்பாளர் வீட்டில் என்றாவது வருமான வரித்துறை அலுவலர்கள் சோதனை நடத்தியதுண்டா ? எனத் தேர்தல் ஆணையத்திடம் கேள்வி எழுப்பினர்.
இவரையடுத்து, திமுக வேட்பாளர் கதிர் ஆனந்த் பேசுகையில், நான் தொகுதி மக்களுக்காக மக்களவையில் குரல் கொடுப்பேன் என்பதை ஆங்கிலத்தில் சில நிமிடங்கள் உரையாற்றினார்.
ஆனால், கூட்டத்திற்கு வந்திருந்த பெரும்பாலானோர் படிப்பறிவில்லாத பாமர மக்களாக இருந்தனர். ஆங்கிலப் பேச்சைக் கேட்டு அவர்கள் கடும் குழப்பத்தில் ஒன்றும் புரியாத போல் அமர்ந்திருந்தனர்.
இந்நிலையில், வேலூரில் தேர்தலை ரத்து செய்யக்கோரி குடியரசுத் தலைவர் ராம்நாத் கோவிந்திடம் தேர்தல் ஆணையம் அளித்த மனு ஏற்றக்கப்பட்டு, வேலூரில் தற்போதைக்கு தேர்தல் ரத்து செய்யப்பட்டுள்ளது.
