சென்னை விமான நிலையத்திற்கு பெரும் அளவில் கடத்தல் பொருட்கள் வருவதாக சுங்கத்துறைக்கு ரகசிய தகவல் கிடைத்தது. இதையடுத்து சுங்கத்துறை அதிகாரிகள் பயணிகளை கண்காணித்தனர். அப்போது துபாயில் இருந்து வந்த 2 விமானங்களில் பயணம் செய்த சென்னையை சேர்ந்த 6 பேரை சந்தேகத்தின் பேரில் நிறுத்தி விசாரித்தனர். அவர்கள் முன்னுக்கு பின் முரணாக பேசியதால் உடைமைகளை சோதனை செய்தனர்.
அதில் எதுவும் இல்லை. தனியறைக்கு அழைத்து சென்று சோதனை செய்த போது உள்ளாடைக்குள் மறைத்து வைத்து கடத்தி வந்த தங்கத்தை கண்டுபிடித்தனர். 6 பேரிடம் இருந்து ரூ.2 கோடியே 34 லட்சம் மதிப்புள்ள 5 கிலோ 267 கிராம் தங்கத்தை பறிமுதல் செய்தனர்.
அதேபோல் அபுதாபியில் இருந்து வந்த 2 விமானங்களில் பயணம் செய்த 2 பேரின் உள்ளாடைகளில் இருந்து ரூ.89 லட்சத்து 97 ஆயிரம் மதிப்புள்ள 2 கிலோ 22 கிராம் தங்கத்தை கைப்பற்றினர்..
மேலும் துபாயில் இருந்து வந்த 4 பேரிடம் இருந்து 2 கிலோ 50 கிராம் தங்கமும், கொழும்பில் இருந்து வந்த 2 பெண்களிடம் இருந்து 730 கிராம் தங்க நகைகளும், பாங்காக்கில் இருந்து வந்த இளைஞரிடம் இருந்து 474 கிராம் தங்கமும் என ரூ.1 கோடியே 45 லட்சம் மதிப்புள்ள 3 கிலோ 250 கிராம் தங்கத்தை கைப்பற்றினர்.
2 நாளில் நடத்திய சோதனைகளில் ரூ.4 கோடியே 68 லட்சத்து 97 ஆயிரம் மதிப்புள்ள 10 கிலோ 539 கிராம் தங்கத்தை பறிமுதல் செய்தனர். இது தொடர்பாக 2 பெண்கள் உள்பட 15 பேரை சுங்கத்துறை அதிகாரிகள் கைது செய்து விசாரணை நடத்தி வருகின்றனர்.
இதையும் படிங்க: திருச்சியில் 21 கிலோ கஞ்சா பறிமுதல்... கஞ்சா வியாபாரி கைது
