சென்னை: சிந்தாதிரிப்பேட்டையில் கடந்த 24ஆம் தேதி பாஜக பிரமுகர் பாலசந்தர் மூன்று பேர் கொண்ட கும்பலால் வெட்டி படுகொலை செய்யப்பட்டார். பெரும் பரபரப்பை ஏற்படுத்திய இந்த கொலை வழக்கில், தலைமறைவான கும்பலை பிடிக்க 4 தனிப்படை அமைத்து போலீசார் தீவிரமாக தேடி வந்தனர். முன்விரோதம் காரணமாக ரவுடிகளான பிரதீப், சஞ்சய் கூட்டாளிகளுடன் இணைந்து பாலசந்தரை கொலை செய்தது தெரியவந்தது.
இதில், நேற்று முன்தினம் (மே 26) தலைமறைவாக இருந்த நான்கு பேரை சேலம் எடப்பாடியில் வைத்து போலீசார் கைது செய்தனர். சிந்தாதிரிப்பேட்டையை சேர்ந்த பிரதீப், சஞ்சய், கலை, ஜோதி ஆகியோரை போலீசார் கைது செய்தனர். கைது செய்யப்பட்ட நான்கு பேரிடமும் விசாரணை நடத்தி சிறையில் அடைத்தனர்.
இதனிடையே கைது செய்யப்பட்ட நபர்களிடம் போலீசார் நடத்திய விசாரணையில் பல திடுக்கிடும் தகவல்கள் வெளியாகின. பாஜக பிரமுகரான பாலசந்தர் தொடர்ந்து தனது தந்தை தர்கா மோகனுக்கும், தங்களுக்கும் தொல்லை கொடுத்து வந்ததாகவும், யாரோ மாமூல் கேட்டதற்கு தங்கள் மீது காவல் துறையில் புகார் அளித்து சிறைக்கு அனுப்பியதாகவும் பிரதீப் தெரிவித்துள்ளார்.
மேலும், பிரதீப், "சிறையிலிருந்து கடந்த வாரம்தான் வெளியே வந்தேன். ஆனால், மறுபடியும் என் மீது பாலசந்தர் பொய் புகார் அளித்து மிரட்டல் விடுத்தார். இதனால், பாலசந்தரிடம் சமரசம் பேசினோம். அதற்கு, ஒத்துவராததால் அவரை தீர்த்துக்கட்ட முடிவு எடுத்தோம். சம்பவம் நடந்த நாளன்று பாதுகாப்பு காவலர் பாலமுருகன் டீக்குடிக்க சென்ற போது இருசக்கர வாகனத்தில் சென்று பாலசந்தரை சரமாரியாக வெட்டிக்கொன்றோம்" என வாக்குமூலம் அளித்தார்.
பின்னர் இருசக்கர வாகனத்தில் ஸ்ரீபெரும்புத்தூர் அருகேயுள்ள ஆற்றில் கொலைக்கு பயன்படுத்திய ஆயுதங்களை வீசி விட்டு, உறவினர் ஒருவர் வீட்டில் துணி மாற்றிக்கொண்டு சென்றதாக போலீசாரிடம் தெரிவித்துள்ளார். இதனையடுத்து, அன்றிரவு கடலூர் பகுதியில் சாலையோரமாக படுத்து உறங்கிவிட்டு, பேருந்து மூலம் சேலம் எடப்பாடியில் உள்ள தெரிந்தவரின் வீட்டிற்கு சென்று பதுங்கியதாக தெரிவித்துள்ளார். நீதிமன்றத்தில் சரணடைய செல்போனை பயன்படுத்தியபோது அதை வைத்து போலீசார் நெருங்கிவிட்டதாக தெரிவித்துள்ளார்.
தற்போது, போலீசார் ஆற்றில் வீசப்பட்ட ஆயுதங்களை தேடும் பணியில் ஈடுபட்டு வருகின்றனர். மேலும் இந்த வழக்கில் பிரதீப்பின் தந்தை தர்கா மோகனுக்கு தொடர்புள்ளதா என விசாரணை நடத்தி வருகின்றனர். கொலையில் வேறு யாருக்காவது தொடர்பு இருக்கிறதா என போலீஸ் காவலில் எடுத்து விசாரணை நடத்த போலீசார் திட்டமிட்டுள்ளனர்.
இந்நிலையில், சிந்தாதிரிப்பேட்டை காவல் ஆய்வாளர் சிவசுப்பிரமணியனை பணியிடை நீக்கம் செய்து சென்னை காவல் ஆணையர் சங்கர் ஜிவால் உத்தரவிட்டுள்ளார். இவர்களுக்குள் ஏற்பட்டுள்ள முன்விரோதம் மற்றும் கொலையை தடுப்பதற்கு முன்னெச்சரிக்கை நடவடிக்கைகளை மேற்கொள்ளாமல் இருந்ததால் காவல் ஆய்வாளர் சிவசுப்பிரமணியன் மீது நடவடிக்கை எடுக்கப்பட்டுள்ளது. சிந்தாதிரிப்பேட்டை காவல் நிலையத்தில் சிவசுப்பிரமணியன் காவல் ஆய்வாளராக பணிக்கு சேர்ந்து 5 நாள்களிலேயே இந்த கொலை நடந்துள்ளது குறிப்பிடத்தக்கது.
இதையும் படிங்க: பாஜக நிர்வாகி கொலை: ரவுடி பிரதீப் கூட்டாளி ஆடியோ வெளியீடு
