திருப்பத்தூர் மாவட்டம் ஆம்பூர் அடுத்த வீராங்குப்பத்தில் ஆண்டுதோறும் மஞ்சுவிரட்டு நடைபெறும். இந்தாண்டு சாமுண்டீஸ்வரி அம்மன் கோயில் திருவிழாவை முன்னிட்டு 178ஆவது மஞ்சுவிரட்டு நடைபெற்றது. இதில் ஆந்திரா, கர்நாடகா எனப் பல்வேறு பகுதிகளிலிருந்து சுமார் 300-க்கும் மேற்பட்ட காளைகள் கலந்துகொள்ள வருகைதந்தன.
மருத்துவக் குழுவின் பரிசோதனைக்குப் பிறகு ஒவ்வொரு காளைகளாக அவிழ்த்துவிடப்பட்டன. இதில் நிர்ணயிக்கப்பட்ட தூரத்தை குறைவான நேரத்தில் கடக்கும் காளைகளுக்கு பரிசுகள் வழங்கப்பட்டன.
இதனடிப்படையில் குறைந்த நொடியில் ஓடிய ஆலங்காயம் பகுதியைச் சேர்ந்த டான் என்ற காளை முதல் பரிசையும், வன்னிநாதபுரம் பகுதியைச் சேர்ந்த காளை இரண்டாவது பரிசையும் என மொத்தம் 25 காளைகளுக்குப் பரிசுகள் வழங்கப்பட்டன.
இந்த மஞ்சுவிரட்டைப் பார்க்க பல்வேறு பகுதிகளிலிருந்த வந்த ரசிகர்களின் கூட்டம் அலைமோதியது. இந்நிலையில் குடிபோதையில் சில இளைஞர்கள் காளைகள் ஓடுவதைத் தடுக்கும்வகையில் வீதியில் நின்று இடையூறு செய்தனர். இதனால் வீதியில் ஓடிக்கொண்டிருந்த ஒரு காளை கூட்டத்தில் புகுந்து அங்குள்ள தடுப்பு வேலியில் சிக்கி கீழே விழுந்தது.
இதையடுத்து காவல் துறையினர் வீதியில் இடையூறு ஏற்படுத்திய இளைஞர்கள் மீது சிறு தடியடி நடத்தி அவர்களை அப்புறப்படுத்தினர். இதனால் சில மணித்துளிகள் நிறுத்திவைக்கப்பட்ட மஞ்சுவிரட்டு போட்டியானது இளைஞர்களை அப்புறப்படுத்திய பிறகு மீண்டும் நடைபெற்று முடிந்தது.
இதையும் படிங்க:
