திருச்சி விமான நிலையத்தில் மதிமுக பொதுச்செயலாளர் வைகோ செய்தியாளர்களைச் சந்தித்தார். அப்போது அவர் கூறுகையில், "நீட் தேர்விற்கு எதிராகத் தமிழ்நாடு சட்டப்பேரவையில் நிறைவேற்றப்பட்ட தீர்மானம் நிராகரிக்கப்பட்டிருப்பது என்பதிலிருந்து இரண்டு ஆண்டுகள் அதிமுக அரசு, நம்மை ஏமாற்றி வந்திருப்பது நன்றாகத் தெரிகிறது. மத்திய அரசு, மாநில அரசை நம்ப வைத்துக் கழுத்தறுக்கிறதா என்கிற கேள்வி எழுகிறது.
இதுகுறித்த தீர்மானத்தை மத்திய அரசு நயவஞ்சகமாகக் குடியரசுத் தலைவருக்கு அனுப்பாமல் இருந்துள்ளது. இது தமிழ்நாட்டுக்கு இழைக்கும் மிகப்பெரும் துரோகமாகும். முகிலன் நலமுடன் இருப்பது மகிழ்ச்சியாக இருக்கிறது. கர்நாடகாவில் ஆளும் கூட்டணிக் கட்சிக்குள் கருத்து வேறுபாடு ஏற்பட்டுள்ளது. அங்கு ஆட்சி நீடிக்குமா என்பது கேள்விக்குறிதான்.
என்னுடைய வேட்புமனு ஏற்கப்படுமா? என்பது குறித்து தற்போது சொல்ல முடியாது. ஜூலை ஒன்பதாம் தேதி வேட்பு மனு பரீசிலனையின் போது தான் தெரியும். வரி உயர்வால் பெட்ரோல், டீசல் விலை உயர்ந்திருப்பதால் நடுத்தர மக்கள் பாதிக்கப்படுவார்கள். இதனால் விலையேற்றம் இருக்கும் இது நிதி அமைச்சருக்கும் புரியும்" என்றார்.
