தூத்துக்குடி: மதுரை மாவட்டம் பெருமாள் மலை பகுதியைச் சேர்ந்தவர் ரகுநாதன். இவர் தனது நண்பர்களுடன் மதுரையிலிருந்து அம்பாசமுத்திரத்திற்கு காரில் சென்றுகொண்டிருந்தார். நள்ளிரவு 2 மணியளவில் (நவம்பர் 27) தூத்துக்குடி மாவட்டம் கோவில்பட்டி தேசிய நெடுஞ்சாலையைக் கடந்து செல்கையில் இடைசெவல் பகுதியில் மழை பெய்துகொண்டிருந்தது.
அப்போது கார் திடீரென ஓட்டுநரின் கட்டுப்பாட்டை இழந்து சாலையோர மின் கம்பத்தில் மோதி கவிழ்ந்து விபத்துக்குள்ளானது. இதில் கார் முழுவதும் சேதமடைந்தது. காரில் பயணித்த மதுரை கரிமேடு பகுதியைச் சேர்ந்த கோபால், முருகன் ஆகிய இரண்டு பேர் சம்பவ இடத்திலேயே உயிரிழந்தனர்.
காரில் பயணித்த ஹரி, ரகுநாதன் ஆகிய இருவரும் பலத்த காயமடைந்தனர். விபத்து குறித்து தகவலறிந்த கோவில்பட்டி காவல் துணைக் கண்காணிப்பாளர் உதயசூரியன், ஆய்வாளர் பத்மாவதி, காவல் துறை, தீயணைப்புத் துறையினர் சம்பவ இடத்திற்கு விரைந்துசென்று விபத்தில் சிக்கி உயிருக்குப் போராடிக் கொண்டிருந்தவர்களை மீட்டு கோவில்பட்டி அரசு மருத்துவமனையில் சிகிச்சைக்காகச் சேர்த்தனர்.
உயிரிழந்த கோபால், முருகன் ஆகியோரது சடலத்தைக் கைப்பற்றி கோவில்பட்டி அரசு மருத்துவமனைக்கு அனுப்பிவைத்தனர். இச்சம்பவம் தொடர்பாக நாலாட்டின்புத்தூர் காவல் நிலையத்தினர் வழக்குப்பதிந்து விசாரணை நடத்திவருகின்றனர்.
