’இணையத்தை நல்லமுறையில் பயன்படுத்த சொல்லித்தர வேண்டும்’

தூத்துக்குடி: குழந்தைகளும் வளரிளம் பருவத்தினரும் இணையத்தை பயனுள்ள வகையில் பயன்படுத்த சொல்லித்தர வேண்டும் என இந்திய மனநல மருத்துவர்கள் சங்க மாநிலத் தலைவர் சபிதா அறிவுறுத்தியுள்ளார்.

இந்திய மனநல மருத்துவர்கள் சங்கம் சார்பில் தூத்துக்குடி, திருநெல்வேலி, கன்னியாகுமரி மாவட்டத்தைச் சேர்ந்த மனநல மருத்துவர்களுக்கான கருத்தரங்கு தூத்துக்குடியில் இன்று நடைபெற்றது. இதில் பங்கேற்றபின் செய்தியாளர்களை சந்தித்த, இந்திய மனநல மருத்துவர் சங்கத்தின் மாநிலத் தலைவர் சபிதா, ”இன்றைய காலகட்டத்தில் குழந்தைகளுக்கும், வளர் இளம் பருவத்தினருக்கும் அதிகரித்துள்ள மனநல பிரச்சனைகள் என்பது, வளர்ந்துவிட்ட தகவல் தொழில்நுட்பத்தினால் ஏற்படுகிறது எனக் கூறலாம்.

குறிப்பாக இணையத்தில் அதிகமாக நேரம் செலவிடுதல், பெற்றோர் கண்பார்வையில் இருப்பதனால் ஏற்படும் அழுத்தம், படிப்பு ரீதியாக ஏற்படும் மன அழுத்தம் ஆகியவற்றால் பெரிதும் பாதிக்கப்படுகின்றனர். எனவே இச்சூழ்நிலையில் உள்ள அவர்களுக்கு சரியான வழிகாட்டுதல் தேவைப்படுகிறது.

குழந்தைகள், வளரிளம் பருவத்தினர் தங்களுக்கு இருக்கக்கூடிய மன அழுத்தத்தை கோபப்படுதல், எதிர்த்துப் பேசுதல், கண்டுகொள்ளாமல் இருப்பது போன்ற வெவ்வேறு காரணிகள்‌ மூலமாக வெளிப்படுத்துகின்றனர். இணையத்தை பயன்படுத்த கூடாது என்று சொல்வதைவிட, பயனுள்ள வகையில் அதனை பயன்படுத்த வேண்டும் என சொல்லித் தர வேண்டும்” என்றார்.

இதையும் படிங்க: தூத்துக்குடியில் அதிநவீன கண்காணிப்பு கேமரா - எஸ்.பி.ஜெயக்குமார்