தமிழ்நாட்டையே பேரதிர்ச்சிக்கு உள்ளாக்கிய தூத்துக்குடி துப்பாக்கிச் சூடு சம்பவம் நடந்து ஓராண்டு ஆன நிலையிலும், மக்கள் மனதில் இன்னும் வடுவாகப் பதிந்துபோனது அந்நிகழ்வு. அதற்குக் காரணமான ஸ்டெர்லைட் ஆலையின் செயல்பாடுகளால் மக்களுக்கு ஏற்பட்ட பாதிப்புகள், அதனால் வெடித்த போராட்டங்கள், போராட்டத்தின் இறுதியாக நிகழ்ந்த துப்பாக்கிச் சூடு, ஆலை மூடல், மீண்டும் திறக்க முயற்சி எனப் பல கலகங்களை உண்டாக்கி இருக்கிறது.
இந்நிலையில், 13 அப்பாவி மக்களைச் சுட்டுக்கொன்று இன்றுடன் ஓராண்டு ஆகிறது. இதற்கான நினைவேந்தல் நிகழ்ச்சி தூத்துக்குடியில் இன்று காவல்துறை அனுமதியுடன் நடைபெறுகிறது. இதற்காகப் பல அமைப்புகள், கட்சிகளைச் சேர்ந்த தலைவர்கள் கலந்துகொள்வதாக இருந்தது. ஆனால் காவல் துறையினர் தலைவர்கள் பலரை வீட்டுக்காவலில் வைத்துள்ளதாகத் தகவல்கள் வெளியாகின.
இந்நிலையில் கூடங்குளம் அணுஉலை எதிர்ப்புப் போராட்டக் குழு, பச்சைத் தமிழகம் கட்சி ஆகியவற்றின் ஒருங்கிணைப்பாளரான சுப உதயகுமார் எந்த முன்னறிவிப்பும் இன்றி நேற்று மாலை முதல் வீட்டுக் காவலில் வைக்கப்பட்டிருந்தார். அதனையடுத்து, இன்று காலை அவரை கைது செய்த காவலர்கள் நாகர்கோவில் கோட்டார் காவல்நிலையத்திற்கு அழைத்துச்சென்றனர்.
இதுமட்டுமில்லாமல் இக்கட்சியின் முக்கிய நிர்வாகியான சங்கரபாண்டியனும் ஆரல்வாய்மொழியில் கைது செய்யப்பட்டிருக்கிறார். நினைவேந்தல் நிகழ்ச்சிக்குச் செல்லவிருந்த தலைவர் கைது செய்யப்பட்ட விவகாரம் பெரும் பரபரப்பை ஏற்படுத்தியிருக்கிறது.
