திருநெல்வேலி: வள்ளியூர் அருகே உள்ள கிழவனேரி கிராமத்தை சேர்ந்தவர் சமீர் ராஜா. இவருக்கு சொந்தமான இரண்டரை ஏக்கர் இடத்தை ஆவணங்களை சரிபார்க்காமல் ராதாபுரம் சார்பதிவு அலுவலர் சரவண மாரியப்பன் போலியாக வேறுநபருக்கு பதிவு செய்து கொடுத்ததாக கூறப்படுகிறது.
இதனிடையே சார்பதிவாளரை கண்டிக்கும் வகையில் சமீர் மற்றும் அவரது நண்பர் பிரசாத் ஆகியோர் சார் பதிவாளர் அலுவலகம் முன் பதாகை வைத்தனர். அதில், இராதாபுரம்திருநெல்வேலி மாவட்டத்தில் எங்கு நிலங்கள் இருந்தாலும்,நிலத்தின் உரிமையாளர் வெளியூரிலோ, வெளிநாட்டிலோ, மிக அருகிலோ இருந்தாலும், அவர்களுக்கு சிரமம் கொடுக்காமல், எந்த வித அசல் ஆவணங்கள் இல்லாமலும், சொத்தின் உரிமையாளர் கையொப்பம் இன்றி சொத்து மதிப்பில் 10 விழுக்காடு கமிஷன் கொடுக்கும் நபருக்கு சார் பதிவாளர் சரவணமாரியப்பன் உடனே கிரைய ஆவணமோ, செட்டில் மெண்ட் ஆவணமோ பதிவு செய்து கொடுத்து பொதுமக்களின் நன் மதிப்பை பெற்று சிறந்து விளங்கி வருகிறார். இந்த சேவை செம்மல் சார்பதிவாளரை வாழ்த்தி வணங்குகிறோம். இவரது பணியை செவ்வனே செய்ய உறுதுணையாக இருந்து வரும் இராதாபுரம் வருவாய் துணை வட்டாட்சியர் அவர்களையும் வாழ்த்தி வணங்குகிறாம்.
பின்குறிப்பு என, எங்களுடைய சொத்தை நான் இல்லாமலும் எனது அசல் ஆவணங்கள் இல்லாமல் ராஜகன்னிமரியாள் செட்டில்மெண்ட் மூலம் சாம் ராஜபிரபு பெயருக்கு ஆவணம் பதிவு செய்ததற்கு ஈடாக எங்களை வாழ வைக்க இராதாபுரம் தாலுகா அலுவலகம், காவல்நிலையம், சார் பதிவாளர் அலுவலகம், உள்ளிட்ட இடங்களை எனது பெயருக்கு உரிமை மாற்றம் செய்து தருவதற்கு ஒப்புக் கொண்டு வாழும் கர்ணணே, சரவணமாரியப்பனே உம்மே வாழ்த்த வயதில்லை, எங்கள் தலைமுறையே தங்களுக்கு நன்றி கடன் பட்டிருக்கிறோம். என அதில் குறிப்பிடப்பட்டுள்ளது.
இதனையடுத்து சார்பதிவாளர் அலுவலகம் வந்த பொதுமக்கள் மத்தியில் பரபரப்பு ஏற்பட்டது, பின்னர் ராதாபுரம் காவல் உதவி ஆய்வாளர் வள்ளிநாயகம் சம்பவ இடத்திற்கு வந்து சமீர் ராஜாவிடம் சமரச பேச்சுவார்த்தை நடத்தியதை தொடர்ந்து பதாகையை திரும்ப கொண்டு சென்றனர்.
இதையும் படிங்க: இனி 24 மணி நேரமும் கடைகளைத் திறந்து வைக்கலாம்... அரசாணை வெளியிட்டது தமிழ்நாடு அரசு!
