புதுடெல்லி: நாடாளுமன்ற வளாகத்தில் பாஜக எம்பிக்களை தாக்கியதாக மக்களவை எதிர்க்கட்சித் தலைவர் ராகுல் காந்தி மீது புகார் பதிவு செய்யப்பட்ட நிலையில் காயம் அடைந்த இரண்டு பாஜக எம்பிக்களிடம் போலீசார் வாக்குமூலங்களை பதிவு செய்ய உள்ளனர். விசாரணைக்கு வருமாறு ராகுலுக்கு அழப்பு விடுக்கவும் போலீசார் திட்டமிட்டுள்ளனர்.
இது குறித்து பேசிய போலீசார், "நாடாளுமன்ற வளாகத்தில் தள்ளுமுள்ளு நடந்ததாக கூறப்படும் இடங்களில் பொறுத்தப்பட்டுள்ள சிசிடிவி கேமராக்களில் பதிவான காட்சிகளை தருமாறு நாடாளுமன்ற செயலகத்துக்கும் கடிதம் அனுப்பப்பட உள்ளது. மேலும் இந்த விசாரணையை உள்ளூர் போலீசாரிடம் இருந்து குற்றப்பிரிவு போலீசாருக்கு மாற்றவும் மூத்த அதிகாரிகள் ஆலோசித்து வருகின்றனர்.
பாரதிய நியாயா சன்ஹிதா சட்டத்தின் பிரிவுகள் 115(தாமாக முன் வந்து காயம் ஏற்படுத்துதல்), பிரிவு 117(தானாக முன்வந்து கடுமையான காயத்தை ஏற்படுத்துதல்), பிரிவு 125(பிறருடைய தனிப்பட்ட பாதுகாப்புக்கு அல்லது உயிருக்கு ஊறு விளைவிக்கும் செயலில் ஈடுபடுதல்), பிரிவு 131 (குற்ற நடவடிக்கை மேற்கொள்ளல்) , பிரிவு 351 (குற்றம் இழைக்கும் நோக்கம்) மற்றும் பிரிவு 3(5) (பொதுவான நோக்கம்) ஆகியவற்றின் கீழ் வியாழக்கிழமையன்று நாடாளுமன்ற தெரு காவல் நிலையத்தில் வழக்குகள் பதிவு செய்யப்பட்டுள்ளன.
இதையும் படிங்க: சென்னை ஐஐடி வளாகத்தை பார்வையிட மாணவர்களுக்கும், பெற்றோருக்கும் அழைப்பு; எந்தெந்த நாட்களில் தெரியுமா?
நாடாளுமன்ற வளாகத்தில் தள்ளுமுள்ளு சம்பவத்தின் போது பாஜக எம்பிக்கள் சந்திரா சாரங்கி, முகேஷ் ராஜ்புத் ஆகியோரை ராகுல் கந்தி தாக்கியதாக புகார் தரப்பட்ட சில மணி நேரங்களில் ராகுல் காந்தி மீது வழக்கு பதிவு செய்யப்பட்டுள்ளது. இந்த சம்பவத்தின் போது உடன் இருந்த எம்பிக்களை சாட்சியாக கொண்டு விசாரணை நடத்தப்படும். புகார்கள் தொடர்பாக ராகுல் காந்தியை விசாரிப்பதற்கும் அழைப்பு விடுக்கப்படும்.
இதே போல தாக்குதலுக்கு உள்ளாகி மருத்துவமனையில் அனுமதிக்கப்பட்டுள்ள சாரங்கி, ராஜ்புத் ஆகியோரின் வாக்குமூலங்களை பதிவு செய்ய காவல்துறையினரைக் கொண்ட குழு செல்ல உள்ளது. எம்பிக்கள் குறித்த மருத்துவ அறிக்கைகளும் பெறப்படும்," என்று கூறினர். பாஜக எம்பிக்கள் மீது ராகுல் தாக்குதல் நடத்தியதாக கூறப்படுவதை காங்கிரஸ் மறுத்துள்ளது. பாஜக எம்எல்ஏக்கள்தான் காங்கிரஸ் தலைவர் மல்லிகார்ஜூன கார்க்கேவைதள்ளி விட்டதாகவும், ராகுல் காந்தியை தள்ளியதாகவும் காங்கிரஸ் தரப்பில் கூறப்படுகிறது. இது தொடர்பாக திக்விஜயசிங், முகுல் வாஸ்னிக், ராஜிவ் சுக்லா, பிரமோத் திவாரி ஆகியோர் அடங்கிய காங்கிரஸ் எம்பிக்கள் போலீசில் புகார் அளித்திருக்கின்றனர்.
