சேலத்தில் நம்ம ஊரு சூப்பரு திட்டத்தை தொடங்கி வைத்த அமைச்சர் கே.என். நேரு

கிராமங்களில் சுற்றுச்சூழல் தூய்மையடைய நம்ம ஊரு சூப்பரு திட்டம் தொடங்கப்பட்டுள்ளது. இந்த திட்டத்தை சேலம் மாவட்டத்தில் அமைச்சர் கே.என். நேரு தொடங்கிவைத்தார்.

சேலம் மாவட்டம் வெள்ளக்கல்பட்டியில் 'நம்ம ஊரு சூப்பரு' என்ற திட்டம் இன்று (ஆக. 20) தொடங்கிவைக்கப்பட்டது. இவ்விழாவிற்கு மாவட்ட ஆட்சியர் கார்மேகம் தலைமை வகித்தார். இதில் சிறப்பு அழைப்பாளர்களாக அமைச்சர்கள் கே.என். நேரு, சக்கரபாணி ஆகியோர் கலந்து கொண்டனர். அப்போது நேரு திட்டத்தை தொடங்கி வைத்தார்.

இந்த விழாவின்போது தூய்மை தொழிலாளர்களுக்கு சீருடை, உபகரணங்கள் மற்றும் மரக்கன்றுகளை அமைச்சர் நேரு வழங்கினார். அதன் பின் சிறப்புரையாற்றிய நேரு, "சுற்றுப்புறம் தூய்மையாக இருக்க 'நம்ம ஊரு சூப்பரு' திட்டம் தொடங்கி வைக்கப்பட்டுள்ளது. நமது வீட்டையும் சுற்றுப்புறத்தையும் தூய்மையாக வைத்துக் கொள்ள வேண்டும்.

கழிவு பொருள்கள் கொட்டும்போது மக்கும் குப்பையை தனியாகவும், மக்காத குப்பை தனியாகவும் கொட்ட வேண்டும். அதுபோல சாக்கடை கழிவுநீர், நீர் நிலைகளில் கலக்காமல் பார்த்துக் கொள்ள வேண்டும். பள்ளிகள் மற்றும் பொது இடங்களில் பப்பாளி மற்றும் முருங்கை போன்ற மரக்கன்றுகளை நடவும் நடவடிக்கை எடுக்கப்பட்டுள்ளது.

கழிவறைகளையும் சுத்தமாக வைத்துக் கொள்ள வேண்டும். வீடு அருகே உள்ள பகுதிகளில் தண்ணீர் தேங்காமல் தூய்மையாக பார்த்துக் கொண்டாலே போதும். நாம் சுகாதாரமாக ஆரோக்கியத்துடன் இருக்க முடியும். மருத்துவமனைக்கு செல்லும் நிலையும் ஏற்படாது" என்றார்.

இதையடுடுத்து அமைச்சர்கள் நேருவும், சக்கரபாணியும் வெள்ளகல்பட்டி அருகே உள்ள குளக்கரையில் ஒரு லட்சம் பனை விதை நடும் திட்டத்தை தொடங்கிவைத்தனர். மேலும் இந்த விழாவில் சேலம் மேயர் ராமச்சந்திரன், நாடாளுமன்ற உறுப்பினர் பார்த்திபன், சட்டப்பேரவை உறுப்பினர்கள் ராஜேந்திரன், இரா. அருள், துணை மேயர் சாரதா தேவி, சேலம் மாநகராட்சி ஆணையாளர் கிருஷ்ணராஜ் மற்றும் அதிகாரிகள் கலந்து கொண்டனர்.

இதையும் படிங்க: தமிழ்நாட்டில் இனி மின்தடை என்ற பேச்சுக்கே இடமில்லை… அமைச்சர் செந்தில் பாலாஜி