டிஎன்பிஎஸ்சி குரூப் 4 தேர்வு கடந்தாண்டு செப்டம்பர் 1ஆம் தேதியில் நடந்தது. இதில் தேர்ச்சிபெற்று, தரவரிசைப் பட்டியலில் முதல் நூறு இடம் பிடித்தோரில் 39 பேர், ராமேஸ்வரம், கீழக்கரை தேர்வு மையங்களில் தேர்வு எழுதியோர் என்பதால் தேர்வில் முறைகேடு நடந்திருக்கக் கூடும் என்ற குற்றச்சாட்டு எழுந்தது.
இதையடுத்து, டிஎன்பிஎஸ்சி நடத்திய விசாரணையில் தேர்வில் முறைகேடு நடந்தது உறுதியானது. இதனைத் தொடர்ந்து, குரூப் 4 தேர்வு முறைகேட்டில் ஈடுபட்ட 99 பேருக்கு அரசு பணி தேர்வெழுத வாழ்நாள் தடை விதிக்கப்பட்டது.
மேலும், முறைகேட்டுக்குத் துணை புரிந்த டிஎன்பிஎஸ்சி ஊழியர்கள் கைது செய்யப்பட்டனர். முறைகேட்டுக்கு மூளையாகச் செயல்பட்டதாக சென்னை புதுப்பேட்டையில் வசிக்கும் காவலர் சித்தாண்டி, இடைத்தரகர் ஜெயக்குமார் ஆகியோர் தேடப்படும் குற்றவாளிகளாக அறிவிக்கப்பட்டனர்.
இந்நிலையில் டிஎன்பிஎஸ்சி குரூப் 4 தேர்வு முறைகேட்டில் மூளையாகச் செயல்பட்ட காவலர் சித்தாண்டியை சிபிசிஐடி காவல் துறையினர் பல்வேறு இடங்களில் தேடிவந்தனர். அவரது செல்போன் அழைப்புகள் மூலம் அவர் இருப்பிடத்தை ஜிபிஆர்எஸ் மூலம் கண்காணித்தனர்.
ராமநாதபுரம் - சிவகங்கை சாலையில் உள்ள செம்மனூர் பகுதியில் உள்ள வீடு ஒன்றில் சித்தாண்டி பதுங்கியிருப்பதாக சிபிசிஐடிக்கு தெரியவந்தது. இதையடுத்து சம்பவ இடத்திற்கு விரைந்த காவல் துறையினர், சித்தாண்டியைச் சுற்றி வளைத்து மடக்கிப் பிடித்தனர். பின்னர், மேல் விசாரணைக்காக அங்கிருந்து சென்னை அழைத்துச் செல்லப்பட்டார்.
இதையும் படிங்க: டிஎன்பிஎஸ்சி தேர்வு முறைகேடு: பத்திரப்பதிவுத்துறையில் 2 பேர் இடைநீக்கம்
