மதுரை: தூத்துக்குடி கந்தன் காலனியைச் சேர்ந்த லூயிஸ் சோபியா, உயர் நீதிமன்ற மதுரைக் கிளையில் மனுத்தாக்கல் செய்திருந்தார். அந்த மனுவில், "நான் கனடாவிலுள்ள மாண்ட்ரீல் பல்கலையில் படித்து வந்தேன். இதனிடையே 2019ஆம் ஆண்டு செப்டம்பர் 3ஆம் தேதி சென்னையில் இருந்து தூத்துக்குடி சென்ற விமானத்தில் பயணித்தேன்.
அதே விமானத்தில், அப்போதைய தமிழ்நாடு பாஜக தலைவர் தமிழிசை சௌந்தரராஜன் பயணித்தார். இருவரும் விமானத்திலிருந்து இறங்கும் நேரத்தில், அவரிடம் ஸ்டெர்லைட் ஆலைக்கு எதிரான போராட்டத்தின்போது துப்பாக்கிச் சூட்டில் உயிரிழப்பு நடந்தது வருத்தமாக இருந்தது என்று தெரிவித்தேன்.
இதனால், தமிழிசை ஆத்திரமடைந்து, என்னை மிரட்டும் நோக்கில் தகாத வார்த்தைகளால் திட்டினார். இதுதொடர்பாக என் மீது தூத்துக்குடி புதுக்கோட்டை போலீசில் புகார் அளித்தார். அதன்படி என் மீது பல்வேறு வழக்குகள் பதியப்பட்டுள்ளன. நான் எந்த தவறும் செய்யவில்லை.
எனவே, என் மீதான வழக்கில் நடவடிக்கை எடுக்க தடை விதிக்க வேண்டும். அத்துடன் ரத்து செய்து உத்தரவிட வேண்டும்" என்று குறிப்பிடப்பட்டிருந்தது. இந்த வழக்கு விசாரணையில், சோபியா மீதான வழக்கை விசாரிக்க உயர் நீதிமன்ற மதுரைக்கிளை தடை விதித்திருந்தது. இந்த நிலையில் நீதிபதி இளங்கோவன் முன்பு நேற்று (ஏப். 25) மீண்டும் விசாரணைக்கு வந்தது.
அப்போது நீதிபதி, தெலங்கான ஆளுநராக தமிழிசை சௌந்தரராஜன் உள்ளதால், இந்த வழக்கில் இருந்து அவர் விடுவிக்கப்பட்டு, அவருக்கு பதிலாக முதலில் புகார் கொடுத்த தூத்துக்குடி விமான நிலைய இயக்குநர் சுப்பிரமணியன் எதிர்மனுதாரராக சேர்க்கப்படுகிறார். ஆகவே, இந்த வழக்கு குறித்து சுப்பிரமணியன் பதில் மனு தாக்கல் செய்ய வேண்டும் என்று உத்தரவிட்டு விசாரணையை ஜூன் 19ஆம் தேதிக்கு ஒத்தி வைத்தார்.
இதையும் படிங்க: ஆளுநராக ஆக்கப்பூர்வமான பணியை செய்கிறேன்- ஆளுநர் தமிழிசை
