மதுரை மாவட்டம் மேலூர் அருகே உள்ளது அட்டபட்டி. இங்கு அம்பேத்கர் நினைவாக சுவரில் அவரது உருவப்படம் வரையப்பட்டுள்ளது. இதன் அருகே விடுதலைச் சிறுத்தைகள் கட்சித் தலைவர் தொல். திருமாவளவனின் உருவப்படமும் வரையப்பட்ட இரும்புப்பலகையும் உள்ளது.
இவை இரண்டிலும் நேற்றிரவு சில சமூக விரோதிகள் வெள்ளை பெயிண்ட் அடித்து அவமதிப்பு செய்துள்ளனர். காலையில் இதனைக் கண்ட பொதுமக்கள், சாலைகள் நடுவே கற்கள், முட்களைப் போட்டு மறியல் செய்தனர். இந்தச் சம்பவத்திற்கு காரணமானவர்களை உடனடியாக கைது செய்ய வேண்டும் எனக் கோரிக்கை வைத்து போராட்டத்திலும் ஈடுபட்டனர்.
இதனையடுத்து, சம்பவ இடத்திற்கு விரைந்துவந்த மேலூர் காவல் துறை துணைக் கண்காணிப்பாளர் சுபாஷ், கீழவளவு காவல் துறையினர் ஆகியோர் மறியலில் ஈடுபட்ட பொதுமக்களிடம் பேச்சுவார்த்தையில் ஈடுபட்டனர்.
சுமார் ஒரு மணி நேரத்திற்கும் மேலாக நடத்திய பேச்சுவார்த்தையில், இன்று மாலைக்குள் உரிய நடவடிக்கை எடுத்து குற்றவாளிகள் கைது செய்யப்படுவார்கள் என்றும், அவமதிப்பு செய்யப்பட்டப் படத்திற்குப் பதிலாக மாற்றுப் படம் வரையப்படும் என்றும் காவல் துறையினர் தெரிவித்ததையடுத்து, சாலை மறியலில் ஈடுபட்டவர்கள் கலைந்துசென்றனர்.
