ராமநாதபுரம் மாவட்டம் திருவாடனை கனட்டான்காட்டைச் சேர்ந்தவர் லெட்சுமி. இவருக்கு நிலமற்ற ஏழைகள் பிரிவில் அரசு சார்பில் 2015ஆம் ஆண்டு 17 சென்ட் நிலம் ஒதுக்கப்பட்டது. அந்த இடத்தை சிலர் ஆக்கிரமித்துள்ளனர். அந்த ஆக்கிரமிப்பை அகற்றி நான்கு எல்லையை நிர்ணயம் செய்யக்கோரி வருவாய் அலுவலர்களுக்கு 2015இல் மனு அளித்திருந்தார். அதற்கு நடவடிக்கை எடுக்கப்படாததால் உயர் நீதிமன்ற மதுரை கிளையில் லெட்சுமி மனு தாக்கல் செய்தார்.
இந்த மனுவை விசாரித்த நீதிபதி சுரேஷ்குமார், "நீதிமன்ற உத்தரவை அதிகாரிகள் மதிக்காதது துரதிர்ஷ்டவசமானது. பொதுமக்களின் கோரிக்கையை தாலுகா அளவிலான வருவாய்த்துறை அலுவலர்கள் எப்படி அணுகுகின்றனர் என்பதற்கு இந்த வழக்கு ஒரு சிறந்த உதாரணமாக உள்ளது.
வருவாய்துறை அலுவலர்கள் நீதிமன்ற உத்தரவை நிறைவேற்ற வேண்டும். பொதுமக்கள் சின்ன சின்ன விஷயங்களுக்கும் நீதிமன்றத்திற்கு வர வேண்டியதுள்ளது. இப்போது நீதிமன்ற உத்தரவை நிறைவேற்றாததை ஒரு வழக்கமாகவே அரசு அலுவலர்கள் வைத்துள்ளனர். இதை ஏற்க முடியாது. இதனை அவர்கள் நிறுத்திக்கொள்ள வேண்டும்.
இதனால் மனுதாரரின் கோரிக்கையை அந்த அலுவலர்கள் நான்கு வாரத்தில் நிறைவேற்ற வேண்டும். தவறினால் அவர்கள் மீது நீதிமன்றம் தாமாக முன்வந்து நீதிமன்ற அவமதிப்பு நடவடிக்கை எடுக்கும். இந்த தீர்ப்பு நிறைவேற்றப்பட்டது தொடர்பாக வரும் ஆகஸ்ட் 13ஆம் தேதி மனு தாக்கல் செய்ய வேண்டும்" என உத்தரவிட்டுள்ளார்.
