திருச்சி மணப்பாறையைச் சேர்ந்த அப்துல்லா உயர்நீதிமன்ற மதுரைக்கிளையில் பொதுநல மனு ஒன்றினை தாக்கல் செய்திருந்தார். அதில், "இந்தியாவில் தமிழகம் மற்றும் பெரும்பாலான பகுதிகளில் விவசாயம் மூலம் அதிக வருமானம் கிடைக்கிறது. விவசாயத்தை நம்பி பல ஏழைகளின் வாழ்வாதாரம் உள்ளது. பயிர்களை பூச்சிகள், நோய் தாக்குதல் ஆகியவற்றில் இருந்து பாதுகாக்க பெரும்பாலான விவசாயிகள் உயிரி உரம், உயிரி பூச்சிக்கொல்லிகளை பயன்படுத்தி வருகின்றனர். இந்த உயிரி உரம், உயிரி பூச்சிக்கொல்லிகளை வெளிநாடுகளில் இருந்து சட்டவிரோதமாக இறக்குமதி செய்யப்பட்ட மூலப்பொருட்களைக் கொண்டு தரமின்றி தயாரிக்கப்படுவதுடன் உரிய உரிமம் இன்றி கூடுதல் விலைக்கு விற்பனை செய்கின்றனர். இதற்கு வேளாண்துறை அதிகாரிகளும் உடந்தையாக இருந்து அப்பாவி விவசாயிகளை ஏமாற்றுகின்றனர்.
தமிழகத்தில் உயிரி உர மருந்துகள் மற்றும் இடுப்பொருட்கள் உற்பத்தி செய்யும் நிறுவனங்கள் உரச்சட்டம் 1985, 2004 சட்டபிரிவு 2 ஏஏ, 2 ஹெச் ஆகியவற்றை மீறுவதாக உள்ளது. இது உயிரி உரம் தரகட்டுப்பாட்டு விதிகளுக்கு எதிரானது. உயிரி உரங்களை விவசாயிகளுக்கு விற்பனை செய்வது மற்றும் உயிரி உரம் விற்பனை உரிமம் தொடர்பாக ஆந்திர மாநிலம் பல வழிமுறைகளை வழங்கியுள்ளது. தமிழக வேளாண்துறை மூலம் தரமான விதைகள், தரமான உரம், தரமான பூச்சி உரங்கள் என அனைத்து விதமான இடுப்பொருள்களையும் தரமானதாக விவசாயிகளுக்கு வழங்க வேண்டும். தமிழகத்தில் தரமான உயிரி உரங்களை நிறுவனங்கள் தயாரிக்க வேண்டும். தமிழகத்தில் தரமற்ற உயிரி உரம், உயிரி பூச்சி கொல்லிகள் ஆகியவற்றை சட்டவிரோதமாக விவசாயிகளுக்கு விற்பனை செய்வதை முறைபடுத்த உத்தரவிட வேண்டும்" எனக் கூறியிருந்தார்.
இந்த மனு இன்று நீதிபதிகள் கிருபாகரன் மற்றும் சுந்தர் ஆகியோர் அடங்கிய அமர்வு முன் விசாரணைக்கு வந்தது. அப்போது, மனுதாரர் தரப்பில் ஆஜரான வழக்கறிஞர், உயிரி உரம் என்ற பெயரில் வேதிப்பொருட்களை கலந்து விற்பனை செய்கின்றனர். இது குறித்து கிராமப்புற விவசாயிகள் அறிந்து கொள்ள வாய்ப்பு இல்லை. அதனை பரிசோதித்து முறையாக அனுமதி வழங்க வேண்டிய மத்திய அரசும் அதை கவனத்தில் கொள்வதில்லை. உயிரி உரங்கள் தயாரிக்கப்படும் போது, அவற்றில் என்னென்ன பொருட்கள் கலந்துள்ளன என்பது குறித்த விவரங்கள் வெளியிடப்படுவதில்லை. இதனால் வேதிப்பொருட்கள் கலந்த உரத்தை இயற்கையான உயிரி உரம் என நம்பி விவசாயிகள் ஏமாந்து போகும் நிலை உள்ளது என தெரிவித்தார்.
அதற்கு, அரசுத் தரப்பில் ஆஜரான வழக்கறிஞர் உயிரி உரங்கள் தொடர்பாக சுற்றறிக்கை அனுப்பப்பட்டு உள்ளது. மேலும், ஒழுங்குபடுத்த நடவடிக்கை எடுக்க, மாநில அளவில் உயர்மட்ட குழுவும் அமைக்கப்பட்டு உள்ளது என தெரிவித்தார். இதையடுத்து நீதிபதிகள், தமிழகத்தில் எவ்வளவு உயிரி உரங்கள் பயன்படுத்தப்படுகின்றன? உயிரி உரங்களில் பயன்படுத்தப்படும் வேதிப் பொருட்களின் அளவு எவ்வளவு, அதனால் விவசாயத்தில் ஏற்படும் பாதிப்புகள் என்னென்ன?, உயிரி உரம் தொடர்பாக அமைக்கப்பட்ட உயர்மட்டக் குழுவின் நோக்கம் என்ன? அதற்காக எடுக்கப்பட்டு வரும் நடவடிக்கைகள் என்ன? என கேள்வி எழுப்பினர்.
தொடர்ந்து, இது குறித்து மத்திய மாநில அரசுகள் பதிலளிக்கவும், உயிரி உரங்களை ஒழுங்குபடுத்துவது தொடர்பாக மத்திய, மாநில அரசுகள் கொள்கை ரீதியாக முடிவெடுத்து நீதிமன்றத்திற்கு தெரிவிக்க உத்தரவிட்டும் வழக்கை ஏப்ரல் 23ஆம் தேதிக்கு ஒத்திவைத்தனர்.
