விருதுநகர் மாவட்டத்தைச் சேர்ந்த காளீஸ்வரி என்பவர் சென்னை உயர் நீதிமன்ற மதுரைக்கிளையில், "நடந்து முடிந்த ஊரக உள்ளாட்சித் தேர்தலில் நரிக்குடி ஒன்றிய பஞ்சாயத்தில் 14 வார்டுகள் உள்ளன. அதில் மூன்றாவது வார்டு கவுன்சிலராகத் திமுகவைச் சேர்ந்த நான் வெற்றிபெற்று ஒன்றியக் குழுத் தலைவர் பதவிக்கு போட்டியிட்டேன். என்னை எதிர்த்து அதிமுகவைச் சேர்ந்த பஞ்சவர்ணம் என்பவர் போட்டியிட்டார்.
இதைத் தொடர்ந்து தேர்தல் நடைபெற்றது, அதில் இருவரும் சமமாக, ஏழு வாக்குகள் பெற்றோம். எனவே, குலுக்கல் முறையில் ஒன்றியக் குழுத் தலைவர் தேர்வு செய்யப்பட வேண்டும். ஆனால் அப்போது, தேர்தல் அலுவலகத்தில் அதிமுகவைச் சேர்ந்த 14ஆவது வார்டு கவுன்சிலர் ரவிச்சந்திரன் திடீரென்று தேர்தல் நடந்த அறையில் கலவரத்தில் ஈடுபட்டார்.
மேலும், அவரது ஆதரவாளர்களைத் தூண்டிவிட்டு ஒன்றிய அலுவலகத்தில் உள்ள பொருள்களைச் சூறையாடினார். மேலும் பாதுகாப்புப் பணியிலிருந்த அருப்புக்கோட்டை காவல் துணை கண்காணிப்பாளரையும் தாக்கினார்கள், இதில் அவர் காயமடைந்தார். இவை அனைத்தும் ஒன்றிய அலுவலகத்தில் உள்ள சிசிடிவி கேமராவில் பதிவாகியுள்ளது.
எனவே, நரிக்குடி ஒன்றியக் குழுத் தலைவர், துணைத் தலைவர் பதவிகளுக்கு மறு தேர்தல் நடத்த உத்தரவிட வேண்டும். மேலும், தேர்தலைக் கண்காணிக்க வழக்கறிஞர் குழு ஒன்றை அமைத்து, கண்காணிப்புப் படக்கருவி மூலம் தேர்தல் நடக்கும் அறை, ஒன்றிய அலுவலகம் முழுவதும் பதிவுசெய்ய உத்தரவிட வேண்டும்" என மனு தாக்கல் செய்திருந்தார்.
இந்த மனு இன்று நீதிபதிகள் துரைசுவாமி, ரவீந்திரன் அமர்வு முன் விசாரணைக்கு வந்தது, அப்போது வழக்கு தொடர்பாக தேர்தல் ஆணையம் பதிலளிக்க உத்தரவிட்டு வழக்கை ஜனவரி 22ஆம் தேதி ஒத்திவைத்தனர்.
இதையும் படிங்க: கூட்டுறவு சங்கத்தின் இடைக்கால தடையை நீக்கக் கோரிய வழக்கு ஒத்திவைப்பு
