’எய்ம்ஸ்க்கான நிலத்தை தமிழக அரசு ஒப்படைக்கவில்லை’

மதுரை: எய்ம்ஸ் மருத்துவமனை கட்டும் பணிக்காக ஜப்பான் நிறுவனத்துடன் கடன் ஒப்பந்தம் இன்னும் கையெழுத்தாகவில்லை என மத்திய அரசு தெரிவித்திருப்பது அதிர்ச்சியை ஏற்படுத்தியுள்ளது.

மதுரை தோப்பூரில் 1,264 கோடி ரூபாயில், 'எய்ம்ஸ்' மருத்துவமனை அமைப்பதற்காக, கடந்த 2019 ஆம் ஆண்டு ஜனவரி மாதம் பிரதமர் மோடி அடிக்கல் நாட்டினார். இதற்கான நிதியை, ஜப்பான் பன்னாட்டு கூட்டுறவு முகமையான ஜிக்கா கடனாக வழங்குவதாகவும், 2022 ஆம் ஆண்டு செப்டம்பரில் இப்பணிகள் முடிக்கப்படும் எனவும் முதலில் அறிவிக்கப்பட்டது. ஆனால், இதுவரை ஜிக்காவிடம் இருந்து நிதி கிடைக்கப்பெறவில்லை. தற்போது வரை அங்கு சாலை மற்றும் சுற்றுச்சுவர் பணிகள் மட்டுமே மேற்கொள்ளப்பட்டு வருகின்றன.

இந்நிலையில் தென்காசி மாவட்டம், பாவூர்சத்திரத்தைச் சேர்ந்த சமூக ஆர்வலர் பாண்டியராஜா, தகவல் அறியும் உரிமைச் சட்டத்தின் கீழ், மதுரை எய்ம்ஸ் குறித்து, பல்வேறு விவரங்களை கோரினார். அதற்கு பதிலளித்த மத்திய அரசு, எய்ம்ஸ்க்கு ஜிக்காவிடமிருந்து கடன் பெறும் நடவடிக்கை இன்னும் முடியவில்லை என்றும், ஒப்பந்தம் கையெழுத்தானால் தான் கடன் விவரம் தெரிவிக்கப்படும் எனவும், கடன் கிடைத்த பின்பே கட்டுமானப்பணி துவங்கும் என்றும் தெரிவித்துள்ளது.

மதுரை எய்ம்ஸ் குறித்து தகவல் அறியும் உரிமைச் சட்டத்தில் மத்திய அரசு அளித்த பதில்...

மேலும், இன்று வரை எய்ம்ஸ் மருத்துவமனை அமைவதற்கான நிலத்தை, மத்திய அரசிடம் மாநில அரசு ஒப்படைக்கவில்லை எனவும் மத்திய அரசு தரப்பில் தெரிவிக்கப்பட்டுள்ளது.

அதேநேரம், தகவல் அறியும் உரிமைச் சட்டத்தில் பாண்டியராஜா கேட்டிருந்த, கட்டுமான பணி தொடங்கும்-முடியும் மாதம், ஜிக்கா கடன் திட்டத்தின் தற்போதைய நிலை, மருத்துவ, நர்சிங் படிப்பு எப்போது துவங்கும், எய்ம்ஸ்க்கு மத்திய - மாநில அரசுகள் சார்பில் அதிகாரிகள் நியமிக்கப்பட்டுள்ளனரா? எய்ம்ஸ் மாதிரி வரைபடம் கிடைக்குமா என்பன உள்ளிட்ட, 17 கேள்விகளை முற்றாக ஒதுக்கிவிட்டு, சில கேள்விகளுக்கு மட்டுமே மத்திய அரசு தரப்பில் பதில் வழங்கப்பட்டுள்ளது.

மத்திய அரசின் இந்த பதிலால், மதுரையில் எப்போது எய்ம்ஸ் அமையும் என்ற கேள்வி எழுந்துள்ளது.

இதையும் படிங்க: சிதம்பரம் ராஜா முத்தையா, பெருந்துறை ஐ.ஆர்.டி. மருத்துவக் கல்லூரிகளின் கல்விக் கட்டணத்தை குறைக்க சீமான் வலியுறுத்தல்!