சென்னை: தமிழ்நாட்டின் பாரம்பரிய பொங்கல் பண்டிகை அடுத்த மாதம் கொண்டாடப்படுவதை அடுத்து வீரம் வாய்ந்த முக்கிய விளையாட்டான ஜல்லிக்கட்டு தொடங்க உள்ளது. இந்த நிலையில் ஜல்லிக்கட்டு காளை மாடுகளின் உரிமையாளர்கள் காளைகளுக்கு கடும் பயிற்சிகளை கொடுக்கத் தொடங்கியுள்ளனர்.
களைகட்டும் காளை தயார் பயிற்சி
வழக்கமாக பொங்கல் பண்டிகைகளைத் தொடர்ந்து இந்த ஜல்லிக்கட்டுப் போட்டிகளை பல மாவட்டங்களில் குறிப்பாக தென், மத்திய மாவட்டங்களில் கண்டுகளிக்கலாம். எனவே இந்தப் போட்டிகளில் பங்குபெறும் காளைகளைத் தயார்ப்படுத்தும் பயிற்சிகள் கிராமங்களில் களைகட்டத் தொடங்கிவிட்டன என்றே சொல்லலாம்.
ஏனெனில், காளைகளுக்குச் சத்தான தீவனம் வழங்குவது முதல் அவற்றின் உடல்நலத்தைத் தொடர்ந்து கண்காணிக்க வேண்டும் என்கின்றனர் காளைகளின் உரிமையாளர்கள். மேலும் பயிற்சிகளைப் பொறுத்தமட்டில் காளைகளுக்கு நீச்சல், நடை பயிற்சி நாள்தோறும் கொடுக்க வேண்டும்.
மாடுபிடி வீரர்கள் வாடிவாசலில் பிடிக்காதவாறு, காளைகளைச் சீறிப்பாயும் வகையில் அவற்றின் கொம்புகளைத் தரையில் குத்தும் வகையில் பயிற்சி அளிக்கப்படுகிறது. மேலும் காளைகளுக்குப் பருத்திக்கொட்டை, சோளத்தட்டை, பச்சையரிசி, உளுந்து, பேரீச்சம்பழம் உள்ளிட்டவற்றை உணவுகளாக அளித்துவருவதாக பயிற்சியாளர்கள் கூறுகின்றனர்.
வசமான வாடிவாசல் எது?
பொதுவாக வெவ்வேறு பகுதிகளில் ஜல்லிக்கட்டுப் போட்டிகள் நடைபெறுவதால், போட்டிகள் நடைபெறும் வாடிவாசல்களின் தன்மைகள் குறிப்பாக இட அளவைப் பொறுத்து, காளை மாடுகளின் உரிமையாளர்கள் குறிப்பிட்ட மாடுகளைப் போட்டிகளில் இடம்பெறச் செய்கின்றனர். குறிப்பாக வாடிவாசல் குறுகியதாக இருந்தால் துள்ளிக்குதிக்கும் மாடுகளைப் பாய விடுகின்றனர்.
இதில் களத்தில் உள்ள வீரர்கள் வாடி வாசலிலிருந்து வெளியே வரும்போதே மாடுகளின் திமிலைப் பிடிக்க வேண்டும். இல்லையெனில் காளைகள் வீரர்களை எதிர்கொண்டு ஓடிவிடும். இதேபோல வாடிவாசல் சற்று அகலமாக இருந்தால் துணிச்சலான காளைகளைப் பயன்படுத்தி மாடுபிடி வீரர்களை மிரளவைக்கின்றனர்.இந்தப் போட்டியில் வீரர்கள் மாடுபிடி களத்தின் மத்தியில் நின்றுகொண்டே மாடுகளை அடக்கலாம்.
காளை பயிற்சியாளர்கள் கருத்து
திருச்சி மாவட்டம், ஸ்ரீரங்கம் வட்டம் அல்லூர் கிராமத்தைச் சேர்ந்த காளை உரிமையாளர், ராஜா கூறுகையில், "எனது காளையை சுமார் எட்டு ஆண்டுகளாக வளர்த்துவருகிறேன். இந்தக் காளையைப் பராமரிப்பதைப் பொறுத்தமட்டில், பருத்திக்கொட்டை, புண்ணாக்கு நாள்தோறும் கொடுக்கப்படுகின்றன.
மேலும் ஜல்லிக்கட்டுப் போட்டிக்கு முன்பு தேவையான பயிற்சிகள் கொடுக்கப்படுகின்றன" எனக்கூறிய அவர், காளைக்கு அல்லூர் அழகர் எனப் பெயர் சூட்டப்பட்ட நிலையில் எந்த மாவட்டத்தில் ஜல்லிக்கட்டுப் போட்டி நடந்தாலும் தன்னுடைய காளை பங்கேற்கும் என்றார் பெருமிதத்துடன்.
ஜல்லிக்கட்டு மாநிலத் துணைத் தலைவர்
இதேபோல தமிழ்நாடு பாரம்பரிய ஜல்லிக்கட்டின் மாநிலத் துணைத் தலைவர் எம். காத்தான் கூறுகையில், "பாரம்பரியமாக ஜல்லிக்கட்டு காளை மாடுகளை வளர்த்துவருகிறோம். ஒரு மாட்டிற்கு குறைந்தபட்சம் நாள்தோறும் 750 ரூபாய் செலவழித்துவருகிறோம்.
பேரீச்சம்பழம், பால், முட்டை உள்ளிட்ட உணவுகளைக் கொடுக்கிறோம்," என்ற அவர், ஜல்லிக்கட்டுப் போட்டிகளில் பங்கேற்கும் மாடுகளை எந்தவித காரணமுமின்றி துன்புறுத்த மாட்டோம் எனக் கூறினார்.
மேலும் இந்தக் காளைகளைச் செல்லமாக வளர்ப்பதால் இது அவருடைய வீட்டில் உள்ள பெண்கள், குழந்தைகள் உள்ளிட்ட அனைவரும் எளிதில் பழக்கக்கூடியதாக இருக்கும். "எங்கள் வீட்டில் உள்ள பெண்கள், சிறுவர்கள் காளைகளை கையசைத்து கூப்பிட்டால், மாடுகள் தானாகவே வரும்" எனப் பெருமிதம் அடைந்தார்.
இரண்டு வகையான பயிற்சிகள்
"ஜல்லிக்கட்டு காளை மாடுகளின் பயிற்சியைப் பொறுத்தவரை இரண்டு வகையாகப் பிரிக்கப்படும். முதலாவதாக திருவிழாக்கள், ஜல்லிக்கட்டுப் போட்டிகள் இல்லாத காலங்களில், அதாவது ஜூன் முதல் நவம்பர் வரை இந்தக் காளை மாடுகளை மேய்ச்சலுக்கு அனுப்பிவைப்பது வழக்கம்
பொதுவாக இந்தக் காலகட்டங்களில் மாடுகளுக்கு ஒரு வேலைதான் தீவனம் கொடுப்போம். மேலும் இந்தக் காலங்களில் மாடுகள் நன்றாக ஓய்வெடுக்கும். ஆனால் ஜல்லிக்கட்டுப் போட்டிகள் நடக்கும் காலங்களில் டிசம்பர் முதல் ஏப்ரல் மாதம் வரை நாள்தோறும் இரண்டு வேலை மாடுகளுக்குத் தீவனம் கொடுப்பது மட்டுமல்லாமல் மேய்ச்சலுக்கு விட மாட்டோம். மற்றபடி வயல் வெளிகளில் அல்லது வேறு இடங்களில் மாடுகளைக் கட்டிவைப்போம்" எனத் தமிழக வீர விளையாட்டு மீட்பு நலச் சங்கத்தின் தலைவர், ஜல்லிக்கட்டு ராஜேஷ் நம்மிடம் தெரிவித்தார்.
குறிப்பாக இந்தக் காலகட்டங்களில் காளை மாடுகளுக்கு வாரம் இருமுறை நீச்சல், நடை பயிற்சி கொடுக்கப்படும். இந்தப் பயிற்சியானது வாடிவாசலில் மாடுபிடி வீரர்களை எதிர்க்க முக்கியப் பங்கு வகிக்கிறது என ராஜேஷ் எடுத்துரைத்தார். பொதுவாக ஜல்லிக்கட்டு காளைகளை இனப்பெருக்கத்திற்குப் பயன்படுத்த மாட்டோம் எனவும் தெரிவித்தார்.
கரோனாவால் தடையான ஜல்லிக்கட்டு
"கரோனா பெருந்தொற்றால் 2020, 2021ஆம் ஆண்டுகளில் ஜல்லிக்கட்டுப் போட்டிகளை நன்றாக நடத்த இயலவில்லை" என வருத்தம் தெரிவித்த அவர், "2022ஆம் ஆண்டு எந்தவிதத் தடைகளும் இல்லாமல் நடக்க அரசு ஒத்துழைப்பு கொடுப்பதாக அறிவித்துள்ளது.
மேலும் இது சம்பந்தமாக விளையாட்டு மீட்பு நலச் சங்கம் சார்பில் அடுத்த வாரத்தில் முதலமைச்சர் மு.க. ஸ்டாலினைச் சந்திக்க உள்ளோம்" என கூறினார்.
மாஸ் காட்டும் மதுரை
தமிழ்நாட்டில் ஒரு சில மாவட்டங்களில் ஜல்லிக்கட்டுப் போட்டிகள் நடைபெற்றாலும், மதுரை மாவட்டத்தில் உள்ள அவனியாபுரம், அலங்காநல்லூர், பாலமேடு பகுதிகளில் நடைபெறும் இந்தப் போட்டிகள் நாடு முழுவதும் புகழ்பெற்றதாக இருந்துவருகிறது.
உலக அளவிலும் மதுரை அலங்காநல்லூர் ஜல்லிக்கட்டு பிரபலமடைந்துள்ளது. இந்த வீர விளையாட்டானது திருச்சி, திண்டுக்கல், சேலம், புதுக்கோட்டை மாவட்டங்களிலும் நடைபெறுகிறது.
இதையும் படிங்க: ஜல்லிக்கட்டில் நாட்டு மாடுகளுக்கு மட்டுமே அனுமதி - அமைச்சர் மூர்த்தி
