இதுதொடர்பாக அவர் வெளியிட்ட அறிக்கையில்," தமிழ்நாட்டில் ஒவ்வொரு நாளும் குறைந்தது 30 ஆயிரம் பேர் கரோனா தொற்று பாதிப்புக்கு உள்ளாகி, மருத்துவமனைகளைத் தேடி அலைந்து கொண்டு இருக்கின்றனர். இந்த நிலையில், ஏற்கனவே கரோனா தாக்கி, மருத்துவம் செய்து நலம் பெற்று மீண்டு வந்தவர்களை கறுப்பு பூஞ்சை (மியூகோர் மைகோசிஸ்) என்ற புதிய தொற்றுத் தாக்குவதாக செய்திகள் வருகின்றன.
மராட்டிய மாநிலத்தில் 64 பேர் இறந்துள்ளனர். புதுடெல்லி மற்றும் கர்நாடகாவிலும் தாக்கி இருக்கின்றது. இதன் அறிகுறிகள் தமிழ்நாட்டிலும் தெரியத் தொடங்கி இருக்கிறது. நேற்று(மே.19) கோவில்பட்டியில் இரண்டு பேர், கறுப்பு பூஞ்சை பாதிப்புக்கு உள்ளாகி இருப்பதாகத் தகவல் வந்தது.
ஏற்கனவே இனிப்பு(நீரழிவு) நோயால் பாதிக்கப்பட்டவர்களை, கறுப்பு பூஞ்சை உடனடியாகத் தொற்றுகின்றது. இது கண்கள், பற்கள் வழியாக குருதியில் கலந்து உயிரைப் பறிக்கும் தன்மை உடையது. இந்த நோய்க்கு, Lipsomal Amphotericin B Injection மருந்தை, இந்தியா முழுமையும் பரிந்துரைக்கின்றனர்.
கரோனா மருந்துகள், உயிர்க்காற்று உருளைகளுக்குக் கடுமையான தேவை ஏற்பட்டு இருப்பதுபோல, அடுத்து இந்த மருந்தும் தேவைப்படுகிறது. எங்கே கிடைக்கும் என மக்கள் தேடுகின்றனர்.
எனவே, தமிழ்நாடு அரசு இதுகுறித்துக் கவனம் செலுத்தி, ஆயத்தப்படுத்திக் கொள்ள வேண்டும்; இந்த மருந்து கிடைக்கும் இடங்கள், இருப்பு குறித்தத் தகவல்களை மாநில அரசு மக்கள் நல்வாழ்வுத்துறை இணையத்தில் வெளியிட வேண்டும் எனக் கேட்டுக் கொள்கின்றேன்.
பொதுமக்கள், சமூக விலகலைக் கடைப்பிடித்து, முகக்கவசம் அணிந்து, மிகுந்த கவனத்துடன் இருக்க வேண்டும். ஐரோப்பிய நாடுகளில் கரோனா இல்லை என அறிவித்து விட்டார்கள். அதுபோல, அனைவரும் தடுப்பு ஊசி செலுத்திக் கொள்ளுங்கள்; அடுத்த ஆறு மாதங்களுக்குள் கரோனாவை ஒழிப்போம்"
இவ்வாறு அந்த அறிக்கையில் வைகோ குறிப்பிட்டுள்ளார்.
