சென்னை வள்ளுவர் கோட்டத்தில் இன்று, இலங்கை கடற்படையால் நான்கு தமிழக மீனவர்கள் கொல்லப்பட்டதை கண்டித்து, மதிமுக பொதுச்செயலாளர் வைகோ தலைமையில் கண்டன ஆர்ப்பாட்டம் நடைபெற்றது. இதில் விடுதலை சிறுத்தைகள் கட்சி தலைவர் திருமாவளவன், திமுக அமைப்புச் செயலாளர் ஆர்.எஸ்.பாரதி உட்பட பலர் கலந்து கொண்டனர்.
அப்போது பேசிய வைகோ, ”மோடி அரசே உனக்கு மனசாட்சியே கிடையாதா? தமிழ்நாட்டு மீனவர்கள் இந்திய நாட்டின் பிரஜை இல்லையா? குஜராத்தி என்றால் விடுவாயா, தமிழன் என்றால் இளக்காரமா? 2 லட்சம் ஈழத்தமிழர்களை படுகொலை செய்த சிங்கள அரசு, கடந்த 40 ஆண்டில் தமிழ்நாட்டு மீனவர்கள் 800 மீனவர்களை கொலை செய்து கொட்டம் அடிக்கிறது.
எங்கள் வரிப்பணத்தில் தான் இந்திய நாட்டு கடற்படை இயங்குகிறது. ஆனால் அது தமிழ்நாட்டு மீனவனை காக்கத் தவறுகிறது. இந்திய, சிங்கள கடற்படை தளபதிகள் குடித்து கும்மாளம் போட ஊக்கமளிக்கிறது இந்திய அரசு. இனி தமிழ்நாட்டு மீனவனை, சிங்களன் தாக்குவதை தடுத்து நிறுத்தாவிட்டால், தமிழ்நாட்டில் அதற்கென தனிப்படை தயாராகும்” என்றார்.
இதையும் படிங்க: வரும் 29 ஆம் தேதி முதல் ’உங்கள் தொகுதியில் ஸ்டாலின்’
