தேர்தல் பணியாளர்கள் தபால் வாக்குகளை செலுத்த முடியும்: சத்யபிரதா சாஹூ

சென்னை: தபால் வாக்குகள் எண்ணப்படும்வரை பெறப்படும் என்பதால் தேர்தல் பணியாளர்கள் தங்களின் வாக்குகளை செலுத்த முடியும் என தமிழ்நாட்டு தலைமைத் தேர்தல் அதிகாரி சத்யபிரதா சாஹூ கூறியுள்ளார்.

தமிழ்நாட்டு தலைமைத் தேர்தல் அதிகாரி சத்தியபிரதா சாஹூ பத்திரிகையாளர்களை சந்தித்தார். அப்போது அவர் பேசுகையில், “தபால் ஓட்டுக்கள் இன்னும் மூன்று மாவட்டங்களிலிருந்து வரவேண்டியுள்ளது. 3,27,903 விண்ணப்பங்கள் இதுவரை தபால் வாக்குகளுக்காக கொடுக்கப்பட்டுள்ளன. 2,38,051 தேர்தல் பணிகளுக்கான சான்றிதழ் கொடுக்கப்பட்டுள்ளது. இந்த சான்றிதழை வைத்துக்கொண்டு அருகாமையில் உள்ள வாக்குச் சாவடியில் வாக்களிக்க முடியும். இதுவரை தபால் வாக்குகள் 47,610 தபால் வாக்குகள் பெறப்பட்டுள்ளன. இன்னும் சில மாவட்டங்களில் தபால் வாக்குகள் வரவேண்டியுள்ளதால் இறுதி எண்ணிக்கை விரைவில் தெரிவிக்கப்படும்.

தபால் வாக்குகள் எண்ணப்படும் வரை பெறப்படும் என்பதால், தேர்தல் பணியாளர்கள் தங்களின் வாக்குகளை செலுத்தமுடியும். காவல்துறையினருக்கு தபால் வாக்குகளும் தேர்தல் பணிக்கான சான்றிதழ்களும் வழங்கப்பட்டுள்ளன. அரசு அதிகாரிகள் மற்றும் அரசுப் பணி அல்லாதவர்களுக்கும் தபால் வாக்குகள் கொடுக்கப்பட்டுள்ளன. தபால் வாக்குகள் செலுத்த இயலாதவர்கள் இ.டி.சி எனப்படும் தேர்தல் பணிக்கான சான்றிதழ் மூலமும் அருகாமையில் உள்ள வாக்கு மையங்களில் வாக்களிக்கவும் ஏற்பாடுகள் செய்யப்பட்டுள்ளன. இந்த தேர்தலை பொறுத்தவரை அனைத்து பணிகளும், இந்திய தேர்தல் ஆணையத்தின் வழிகாட்டுதலில் செயல்படுத்தப்படுகிறது. ரூ.49.03 கோடி இதுவரை வருமானவரித் துறையால் பணம் கைப்பற்றப்பட்டுள்ளது. ரூ.36.79 கோடி தனி நபர்களிடமும், மீதித்தொகை ஒட்டுமொத்தமாகவும் கைப்பற்றப்பட்டுள்ளது” என்றார்.