கரோனா வைரஸ் பரவலைத் தடுக்கும் விதமாக கடந்த மார்ச் மாதம் 21ஆம் தேதி முதல் நாடு முழுவதும் ரயில் சேவைகள் முடக்கப்பட்டுள்ளன. மே 3ஆம் தேதி வரை ஊரடங்கு தொடரும் நிலையில் அடுத்தக்கட்ட முன் பதிவையும் ரயில்வே நிர்வாகம் நிறுத்திவைத்துள்ளது.
மே 3ஆம் தேதிக்குப் பிறகு ஊரடங்கு தளர்த்தப்படுமா, ரயில் சேவைகள் மீண்டும் இயக்கப்படுமா என மத்திய அரசு அறிவிக்கவில்லை. இந்த நிலையில், ரயில் சேவை தொடங்கப்பட்டால் தகுந்த இடைவெளியை கடைபிடிக்க தேவையான கோடுகளை வரையும் பணியில் தென்னக ரயில்வே ஈடுபட்டு வருகிறது. முதல்கட்டமாக, சென்னை எழும்பூர் ரயில் நிலையத்தில் மஞ்சள் நிறத்தில் கோடுகள் வரையும் பணியில் ஊழியர்கள் ஈடுபட்டனர்.
முன்பதிவு செய்யுமிடம், நடைமேடைகள், மேம்பாலங்கள், படிகட்டுகள் என அனைத்து இடங்களில் மக்கள் தகுந்த இடைவெளி விட்டு நிற்கும் வகையில் கோடுகள் வரையப்பட்டுள்ளன. இந்நிலையில், கரோனா வைரஸ் பாதிப்புக்கு இதுவரை மருந்து கண்டுபிடிக்கப்படாத நிலையில், ஊரடங்கு, போக்குவரத்து முடக்கம் போன்ற நடவடிக்கைகள் மூலம் நோய் தொற்று மேலும் பரவுவதைத் தடுக்க முடியும் என சுகாதாரத் துறை வல்லுநர்கள் கூறுகின்றனர்.
இருப்பினும் நீண்ட நாட்களுக்கு போக்குவரத்து முடக்கப்பட்டால் மக்கள் கடுமையான பாதிப்புகளை சந்திப்பார்கள் என்பதால் ஊரடங்கு முடிந்த பின் படிப்படியாக போக்குவரத்து சேவை தொடங்கப்படும் என்று கூறப்படுகிறது. ரயில், பேருந்து சேவைகளை குறைந்த அளவிலான பயணிகளைக் கொண்டு இயக்கப்படும் என எதிர்பார்க்கப்படுகிறது.
இதனிடையே, அருகருகே இருக்கைகள் இல்லாத வகையில் தகுந்த இடைவெளியுடன் பயணிகள் அமரும் வகையில் ரயிகள் இயக்கப்பட வாய்ப்புள்ளதாக ரயில்வே துறை அலுவலர்கள் கூறுகின்றனர். மேலும், ரயில் சேவைகள் மீண்டும் தொடங்கப்பட்டாலும் குளிர்சாதன வசதியில்லாத சாதாரண பெட்டிகளே இயக்கப்படும் என்றும் கூறினர்.
