சென்னை: பிரபல சின்னத்திரை நடிகராக இருந்து பல்வேறு முன்னணி தொலைக்காட்சித் தொடர்களில் நடித்து வருபவர், நைனா முகமது. தனது பெயரை அரணவ் என மாற்றிக்கொண்டு பல்வேறு தொலைக்காட்சித் தொடர்களில் நடித்து வந்த இவர் திவ்யா என்ற தொலைக்காட்சி நடிகையை தீவிரமாக காதலித்து வந்ததாக கூறப்படுகிறது.
ஒரு கட்டத்தில் அரணவை திவ்யாவும் காதலித்த நிலையில் இஸ்லாமிய மதத்திற்கு மாறினால் மட்டுமே தனது வீட்டில் திருமணத்திற்கு ஒப்புக்கொள்வார்கள் என்று அப்பெண்ணிடம் கூறியுள்ளார். திவ்யாவும் இஸ்லாமிய மதத்திற்கு மாறியுள்ளார். இதையடுத்து இந்து முறைப்படியும், இஸ்லாமிய முறைப்படியும் திவ்யாவை அரணவ் திருமணம் செய்து கொண்டதாக கூறப்படுகிறது.
கடந்த ஐந்து மாதங்களாக திருவேற்காட்டில் உள்ள அடுக்குமாடி குடியிருப்பில் இருவரும் வசித்து வந்த நிலையில் திவ்யா மூன்று மாத கர்ப்பிணியாக இருந்து வந்துள்ளார்.
'கரோனா காலகட்டத்தில் வேலையில்லாமல் இருந்த போது தான் வேலைக்குச்சென்று அரணவை பார்த்துக்கொண்டு வீடுகட்ட பணம் கொடுத்தேன். அரணவிற்கு வேறு ஒரு நடிகையுடன் பழக்கம் ஏற்பட்டதாக வந்த தகவலையடுத்து, எங்களது திருமண புகைப்படங்களை சமூக வலைதளங்களில் பதிவிட்டேன். இதனால், இருவருக்கும் இடையே வாக்குவாதம் ஏற்பட்டது.
இதில் தன்னை அரணவ் பிடித்துத்தள்ளி விட்டு, அடித்தார்’ எனக்கூறி சென்னை கீழ்ப்பாக்கம் அரசு மருத்துவமனையில் மூன்று மாத கர்ப்பிணியான தான் அனுமதிக்கப்பட்டு, சிகிச்சைப் பெற்று வருவதாக நடிகை திவ்யா வீடியோ வெளியிட்டுள்ளார்.
இந்தச் சம்பவம் குறித்து மருத்துவமனை நிர்வாகம் திருவேற்காடு காவல் துறையினருக்குத் தகவல் தெரிவித்தனர்.
தகவலின் பேரில் கீழ்ப்பாக்கம் அரசு மருத்துவமனைக்கு சென்று நடந்த சம்பவம் குறித்து நடிகையிடம் விசாரணை செய்ய மகளிர் காவல்துறையினர் சென்றுள்ளனர். இதுகுறித்து எழுத்துப்பூர்வமான புகார்கள் ஏதும் வராத நிலையில் நடிகையின் தரப்பில் இருந்து புகார்கள் அளித்தால் முறையான நடவடிக்கை எடுக்கப்படும் என காவல் துறை தரப்பில் தெரிவிக்கப்பட்டது.
இந்து மதத்தில் இருந்த தன்னை இஸ்லாமிய மதத்திற்கு மதம் மாற்றி திருமணம் செய்து கொண்டு, தற்போது கர்ப்பிணியான தன்னை அடித்ததாக மருத்துவமனையில் சிகிச்சைப் பெற்று வரும் சின்னத்திரை நடிகை கூறியது பரபரப்பினை ஏற்படுத்தியுள்ளது.
இதையும் படிங்க: 8 மாத குழந்தை உள்பட சீக்கிய குடும்பத்தினர் கலிபோர்னியாவில் உயிரிழப்பு
