multi million dollar scam: மதுரையைத் தலைமையிடமாகக் கொண்டு இயங்கும் CPSC அறக்கட்டளையின் கீழ் 'People's Watch' என்ற தொண்டு நிறுவனமும் செயல்பட்டுவருகிறது. 1985ஆம் ஆண்டு தொடங்கப்பட்ட இந்த அறக்கட்டளை வெளிநாடுகளிலிருந்து பெறப்படும் நன்கொடை, பல்வேறு வகையில் நன்கொடையாகக் கிடைக்கப்பெறும் நிதி ஆதாரங்களைக் கொண்டு குழந்தைகள், முதியவர்கள், ஹெச்.ஐ.வி. நோயால் பாதிக்கப்பட்ட குழந்தைகள் எனப் பல்வேறு தரப்பினருக்கு காப்பகங்கள் வைத்து நடத்திவருகின்றனர்.
வெளிநாட்டுப் பங்களிப்பு ஒழுங்குமுறைச் சட்டத்தின்கீழ் வெளிநாடுகளிலிருந்து நன்கொடை பெறும் தொண்டு நிறுவனங்கள் அதற்குண்டான ஆவணங்களைக் காட்டி முறையாக உள் துறை அமைச்சகத்திடம் அனுமதி பெற்றிருக்க வேண்டும்.
ஆனால் Cpse அறக்கட்டளை முறையான அனுமதி பெறாமலும், பல்வேறு முறைகேடுகளில் ஈடுபட்டும் கோடிக்கணக்கில் வெளிநாடுகளிலிருந்து நன்கொடை பெற்றதாகக் குற்றச்சாட்டு எழுந்தது.
இது தொடர்பாக 2012, 2014ஆம் ஆண்டுகளில் ஆய்வுசெய்த உள் துறை அமைச்சக அலுவலர்கள் நன்கொடை பெற்றதில் ஒரு கோடி ரூபாய்க்கு மேல் முறைகேடு நடந்திருப்பதையும், முறையான அனுமதி பெறாததையும் உறுதிசெய்து இதை சிபிஐ விசாரிக்கப் பரிந்துரைத்தது.
அதனடிப்படையில் சிபிஐ இவ்விவகாரத்தில் விசாரணை மேற்கொண்டதில் CPSE அறக்கட்டளை, அதன்கீழ் இயங்கிவரும் 'People's Watch' தொண்டு நிறுவனம் 2005-2006, 2010-2011, 2012-2013 காலகட்டத்தில் வெளிநாடுகளிலிருந்து பலமுறை உள் துறை அமைச்சகத்தின் அனுமதி பெறாமல் கோடிக்கணக்கில் பணம் நன்கொடைப் பெற்றுள்ளதைக் கண்டுபிடித்தனர்.
இந்நிலையில் CPSE அறக்கட்டளை, peoples watch தொண்டு நிறுவனம் மீது இந்திய தண்டனைச் சட்டத்தின்கீழ் இரண்டு பிரிவுகளிலும், வெளிநாட்டுப் பங்களிப்பு ஒழுங்குமுறைச் சட்டத்தின்கீழ் ஆறு பிரிவுகளிலும் சிபிஐ வழக்குப்பதிவு செய்துள்ளது.
இவ்வழக்கு தொடர்பான விசாரணை தொடர்ந்து நடைபெற்றுவருவதாகவும், அறக்கட்டளையின்கீழ் இயங்கிவரும் தனியார் தொண்டு நிறுவனம் முறைகேடு செய்துள்ள பண மதிப்பு குறித்து விசாரணை முடிவுக்குப்பின் தெரிவிக்கப்படும் எனவும் சிபிஐ தரப்பில் தகவல் தெரிவிக்கப்பட்டுள்ளது.
இதையும் படிங்க: நீட் தேர்வுக்கு எதிராகச் சட்டப் போராட்டம் - அனைத்துக் கட்சிக் கூட்டத்தில் தீர்மானம்
