"தமிழ்நாடு அரசு பள்ளிகளின் தரம் மேம்பட்டிருந்தால், நீட் பயிற்சி மையங்கள் எதற்கு"

தமிழ்நாட்டில் உள்ள அரசு பள்ளிகளின் கல்வித்தரத்தை அரசு மேம்படுத்தியிருந்தால், நீட் பயிற்சி மையங்கள் அமைக்கும் தேவையே இருந்திருக்காது என்று சென்னை உயர் நீதிமன்றம் கருத்து தெரிவித்துள்ளது.

சென்னை: மருத்துவ படிப்பில் அரசு பள்ளி மாணவர்களுக்கு 7.5 விழுக்காடு இட ஒதுக்கீடு வழங்க கடந்த அதிமுக ஆட்சியில் சட்டம் இயற்றப்பட்டது. இந்த சட்டத்தை எதிர்த்தும், அரசு உதவி பெறும் தனியார் பள்ளி மாணவர்களுக்கும் 7.5 விழுக்காடு இட ஒதுக்கீடு வழங்கக் கோரியும் உயர் நீதிமன்றத்தில் வழக்குகள் தொடரப்பட்டன.

இந்த வழக்குகள் தலைமை நீதிபதி முனீஷ்வர்நாத் பண்டாரி, நீதிபதி பரத சக்கரவர்த்தி அமர்வில் விசாரிக்கப்பட்டுவருகின்றன. அந்த வகையில் நேற்று மீண்டும் வழக்கு விசாரணைக்கு வந்தது. அப்போது நீதிபதிகள், தமிழ்நாட்டில் 69 விழுக்காடு இட ஒதுக்கீடு அமலிலிருக்கும் நிலையில், மீதமுள்ள 31 விழுக்காடு இட ஒதுக்கீட்டில் அரசுப் பள்ளி மாணவர்களுக்கு 7.5 விழுக்காடு இட ஒதுக்கீடு வழங்குவதால், பொதுப்பிரிவில் உள்ள தகுதியான மாணவர்களுக்கு பாதிப்பு ஏற்படும் என்று மனுதாரர் தரப்பில் அச்சம் தெரிவிக்கப்பட்டுள்ளது. இதற்கு காரணம் என்ன?.

இட ஒதுக்கீட்டால் பயன்பெறுவோரின் குடும்பத்தார்தான் பயன் பெறுகின்றனர். 70 ஆண்டுகளாகியும் பின்தங்கியவர்கள் அப்படியேதான் இருக்கின்றனர். இதை நாடாளுமன்றம் கவனத்தில் கொள்ள வேண்டும் என்று தெரிவித்தனர். இதற்கு தமிழ்நாடு அரசு தரப்பிலிருந்து, பொதுப்பிரிவினருக்கான 31 விழுக்காடு இட ஒதுக்கீட்டில் 7.5 விழுக்காடு இட ஒதுக்கீடு வழங்கப்படவில்லை. மொத்த இடங்களில் தான் 7.5 விழுக்காடு இட ஒதுக்கீடு வழங்கப்பட்டுள்ளது.

பொதுப்பிரிவு மாணவர்களுக்கு எந்த பாதிப்பும் இல்லை

இதனால் தகுதியான பொதுப்பிரிவு மாணவர்களுக்கு எந்த பாதிப்பும் இல்லை. நீட் தேர்வு தகுதி அடிப்படையில்தான் இந்த இட ஒதுக்கீடு வழங்கப்பட்டுள்ளது. குறிப்பாக பொருளாதாரம், கட்டமைப்பு சமநிலையற்ற நிலை என்று அனைத்து அம்சங்களையும் ஆராய்ந்து நீதிபதி குழு அளித்த பரிந்துரையின் அடிப்படையிலேயே இட ஒதுக்கீடு சட்டம் இயற்றப்பட்டது. தனியார் பள்ளி மாணவர்கள் பயிற்சி மையங்களுக்கு சென்று பயிற்சி பெற முடியும். ஆனால், அரசு பள்ளிகளில் படிக்கும் ஏழை மாணவர்களால் பயிற்சி மையங்களுக்கு சென்று பயிற்சி பெற முடியாது. இதனடிப்படையில் இந்த சட்டம் கொண்டுவரப்பட்டது எனத் தெரிவிக்கப்பட்டது.

7.5 விழுக்காடு இட ஒதுக்கீடு நியாயமானது

இதையடுத்து தமிழ்நாடு உயர் கல்வித்துறை தரப்பிலிருந்து, அரசு பள்ளி மாணவர்களுக்கு 7.5 விழுக்காடு இட ஒதுக்கீடு வழங்கியது நியாயமானது. அரசு மற்றும் தனியார் பள்ளிகள் என்று பள்ளிகளை இரு வகையாக பிரிப்பது சட்டப்படி அனுமதிக்கத்தக்கது. அதன் அடிப்படையில் பின் தங்கிய மாணவர்களுக்கு இட ஒதுக்கீடு வழங்க சட்டம் இயற்றப்பட்டது என்று தெரிவிக்கப்பட்டது.

இதைத்தொடர்ந்து அரசு உதவி பெறும் பள்ளிகள் தரப்பிலிருந்து, அரசுப்பள்ளி மாணவர்களின் நிலையை கவனத்தில் கொண்ட அரசு, உதவி பெறும் பள்ளிகளை கவனத்தில் கொள்ள தவறி விட்டது. அரசுப் பள்ளி மாணவர்களுக்கு வழங்குவதைப் போலவே, இலவச சீருடை, காலணி, புத்தகங்கள் உள்ளிட்டவற்றை அரசு உதவி பெறும் பள்ளி மாணவர்களுக்கும் வழங்குகிறது. ஆனால் மருத்துவ படிப்பில் இட ஒதுக்கீடு வழங்கும் விஷயத்தில் பாரபட்சமாக செயல்பட்டுள்ளது எனத் தெரிவிக்கப்பட்டது.

அரசு பள்ளிகளின் தரம் உயர்ந்திருந்தால், நீட் பயிற்சி மையங்கள் எதற்கு

அனைத்து தரப்பு வாதங்களையும் கேட்ட நீதிபதிகள், பொருளாதாரத்தில் பின்தங்கிய முன்னேறிய வகுப்பினருக்கான 10 விழுக்காடு இட ஒதுக்கீடு தமிழ்நாட்டில் அமல்படுத்தப்பட்டுள்ளதா? என்று விளக்கமளிக்க அரசு தலைமை வழக்கறிஞர் விளக்கமளிக்க வேண்டும். அரசு பள்ளிகளின் தரத்தை தமிழ்நாடு அரசு மேம்படுத்தியிருந்தால், நீட் பயிற்சி மையங்கள் அமைக்கும் தேவை இருந்திருக்காது என்று கருத்து தெரிவித்து வழக்குகளின் தீர்ப்பை தேதி குறிப்பிடாமல் ஒத்திவைத்தனர்.

இதையும் படிங்க: நீட் தேர்வுக்கு விலக்கு சட்டமுன்வடிவு - குடியரசுத் தலைவருக்கு விரைந்து அனுப்புவதாக ஆளுநர் உறுதி