சென்னை: தனியார் மருத்துவ கல்லூரிகளில் அரசு ஒதுக்கீட்டில் சேரும் மாணவர்களிடம் நிர்ணயித்த கட்டணத்தைவிட அதிகமாக வசூலிப்பதாகக் கூறி, சென்னையை சேர்ந்த வழக்கறிஞர் பாலமுருகன் உயர் நீதிமன்றத்தில் வழக்கு தொடர்ந்தார். இந்த வழக்கு தலைமை நீதிபதி முனீஷ்வர்நாத் பண்டாரி, நீதிபதி பரத சக்கரவர்த்தி ஆகியோர் அமர்வில் விசாரணைக்கு வந்தது.
அப்போது மனுதாரர் தரப்பில், தனியார் மருத்துவ கல்லூரிகளில் அரசு ஒதுக்கீட்டில் சேரும் மாணவர்களுக்கு 13 ஆயிரத்து 500 ரூபாய் கட்டணம் நிர்ணயிக்கப்பட்டுள்ளது. இருப்பினும் சில கல்லூரிகளில் 7 லட்சத்து 50 ஆயிரம் முதல் 8 லட்சம் ரூபாய் வரை வசூல் செய்யப்படுகிறது எனத் தெரிவிக்கப்பட்டது.
அப்போது நீதிபதிகள், எந்த கல்லூரியில் எவ்வளவு கூடுதல் கட்டணம் வசூலிக்கப்படுகிறது என்ற தகவல் மனுதாரர் தரப்பில் சமர்ப்பிக்கப்படவில்லை. அடிப்படை தகவல்கள் இல்லாதபட்சத்தில் பொதுநல வழக்கு தொடர கூடாது. எனவே இந்த வழக்கு 5 ஆயிரம் ரூபாய் அபராதத்துடன் தள்ளுபடி செய்யப்படுகிறது என்று உத்தரவிட்டனர்.
இதையும் படிங்க: 'வாக்கு எண்ணிக்கையை எங்கு நடத்துவது என்று தேர்தல் ஆணையம் முடிவெடுக்கும்'
