பொது இடங்களில் ஆவி பிடிப்பதை மக்கள் தவிர்க்க வேண்டும் - அமைச்சர் மா.சுப்பிரமணியன்

மருத்துவரின் அறிவுரை இல்லாமல் முகநூல் மற்றும் சமூக வலைதளங்களில் பரப்பப்படுகின்ற ஆவி பிடித்தல் என்ற ஒன்றை சுயமாக எடுத்துக் கொள்ள கூடாது என மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் தெரிவித்துள்ளார்.

சென்னை: லயோலா கல்லூரியில் 100 படுக்கைகள் கொண்ட தனிமைப்படுத்தும் மையத்தை மா.சுப்பிரமணியன்தொடங்கி வைத்தார். அப்போது போது பேசிய அவர், "முதலமைச்சர் உத்தரவின் படி கரோனா தடுப்புப் பணிகள் மேற்கொள்ளப்பட்டு வருகிறது. சென்னையில் ஈஞ்சம்பாக்கம், விருகம்பாக்கத்தில் ஆக்சிஜன் வசதியுடன் கூடிய தலா 100 படுக்கை வசதிகள் மக்களின் பயன்பாட்டிற்கு வந்துள்ளன. லயோலா கல்லூரியில் 100 படுக்கை வசதியுடன் கூடிய தனிமைப்படுத்தும் மையம் திறக்கப்பட்டுள்ளது.

சென்னை மாநராட்சியில் கடந்த 3 நாட்களில் தொற்று எண்ணிக்கை குறைந்து வருவது மனநிறைவைத் தருகிறது.

ஐந்து பொது மருத்துவமனைகளில் 995 ஆக்சிஜன் படுக்கைகள் கூடுதலாக அமைக்கப்பட்டுள்ளன. சென்னை மாநகராட்சி சார்பில் ஏற்கனவே 300 படுக்கைகளும், மேலும் 595 ஆக்சிஜன் செறிவூட்டும் இயந்திரங்களும் இன்று வர உள்ளன. அதனை தேவையான இடங்களில் பொருத்த உள்ளோம்.

சென்னையில் தனிமைப்படுத்திக் கொள்ள வசதி இல்லாத ஏழை எளியவர்கள் கரோனா தனிமைப்படுத்தும் மையங்களைப் பயன்படுத்தலாம். 22 இடங்களில் 6,982 படுக்கைகள் அமைக்கப்பட்டுள்ளன. அவற்றில், தற்போது, 2 , 686 பேர் மட்டும் பயன்படுத்திக் கொண்டுள்ளனர். 4,692 படுக்கைகள் தயாராக உள்ளன.

கரோனா தொற்றை கட்டுப்படுத்துவதற்கு தமிழ்நாட்டில் 70 லட்சம் பேருக்கு தடுப்பூசி போடப்பட்டுள்ளது. சென்னையில் தினமும் சுமார் 30 ஆயிரம் பேருக்கு தடுப்பூசி போடப்பட்டு வருகிறது. மருத்துவம் மற்றும் மக்கள் நல்வாழ்வுத் துறை உலக சுகாதார நிறுவனத்தின் மருத்துவ நெறிமுறைகளின் படி கரோனா நோய் தொற்றுக்கு சிகிச்சை அளிக்கும் வழிமுறைகளை வகுத்துள்ளது.

கரோனா நோய் தொற்றுக்கு அரசு அறிவித்த வழிகாட்டு நெறிமுறைகளின்படி மருத்துவ சிகிச்சை எடுத்துக் கொள்ளவேண்டும். பொது மக்கள் தாங்களாகவே சுய வைத்தியம் என்ற பெயரில் சிகிச்சை எடுத்துக் கொள்வது மிகவும் தவறாகும். அவ்வாறான சிகிச்சை முறைகள் உயிருக்கு ஆபத்தை ஏற்படுத்தும். ஆவி பிடித்தல் என்ற தற்போது பொது மக்களிடையே பரவி வருகிறது. ஆவி பிடித்தல் மூலம் அழுத்தமான காற்று அவர்களின் வாய் வழியே சென்று, நுரையீரலை பாதிக்கும் வாய்ப்பு உள்ளது. அதுமட்டுமல்லாமல் அவர்கள் வாயை திறந்து புகையை உள்ளிழுக்கும் போது வைரஸ் கிருமி அருகில் உள்ளவர்களுக்கு மிக வேகமாக பரவும் வாய்ப்பு உள்ளது.

மருத்துவ நெறிமுறைகளின்படி இதனை மருத்துவ சிகிச்சையாக கருத முடியாது. நோய் தொற்று ஏற்பட்டவுடன் பொதுமக்கள் தாங்களாகவே வீட்டுமுறை வைத்தியம் செய்வதை விட்டு, மருத்துவரை அணுகி முறையான சிகிச்சை மேற்கொள்ள வேண்டும்.

தமிழ்நாடு முழுவதும் கோவிட் 19 நோயாளிகளுக்காக சிறப்பு சித்த மருத்துவ சிகிச்சை நடைபெற்று வருகிறது. இந்த கோவிட் 19 வைரஸ் என்பது புதுமையான நோயாகவும், நேரடியாக நுரையீரலை பாதிக்கும் தன்மை உடையதாக இருப்பதாலும் மருத்துவரின் அறிவுரை இல்லாமல் ஆவிபிடிக்கக் கூடாது.

எனவே மருத்துவரின் அறிவுரை இல்லாமல் முக நூல் மற்றும் சமூக வலைதளங்களில் வரும் ஆவிபிடித்தலை சுயமாக எடுத்துக் கொள்ள கூடாது" என தெரிவித்தார்.

இதையும் படிங்க: அமைச்சர் மா.சுப்பிரமணியன் செய்தியாளர் சந்திப்பு