சென்னை: பெட்ரோல், டீசல் மீதான வரி குறைப்பு தொடர்பான அறிக்கை ஒன்றை தமிழ்நாட்டின் நிதி அமைச்சர் பழனிவேல் தியாகராஜன் (Minister PTR Palanivel Thiagarajan) நேற்று (நவம்பர் 19) வெளியிட்டுள்ளார். அதில், "கடந்த ஏழு ஆண்டுகளாக பெட்ரோல், டீசல் மீது ஒன்றிய அரசு தனது வரியை மிக அதிகமாகப் பலமுறை உயர்த்தி, மக்களின் மீது பெரும் சுமையை ஏற்படுத்தியுள்ள நிலையில், இவ்வாறு உயர்த்தப்பட்டுள்ள வரியைக் குறைக்க வேண்டும் எனத் தொடர்ந்து வலியுறுத்திவந்தோம்.
இதற்கு ஒன்றிய அரசு செவிசாய்க்காத நிலையில், அக்டோபர் 13ஆம் தேதி அன்று தாக்கல்செய்யப்பட்ட வரவு-செலவுத் திட்ட அறிக்கையில் முதலமைச்சர் மு.க. ஸ்டாலின் அறிவுறுத்தலின்படி, தமிழ்நாட்டில் 2.63 கோடி இருசக்கர வாகனங்கள் பயன்படுத்தும் ஏழை எளிய, நடுத்தர மக்கள் பயனடையும் வகையில், நமது நாட்டிற்கே முன்னோடியாக பெட்ரோல் மீதான மாநில வரியை லிட்டர் ஒன்றிற்கு 3 ரூபாய் குறைத்து அறிவித்தோம்.
நிதிக் கொள்ளைக் குழுவின் வலியுறுத்தல்
இதனால், ஆண்டு ஒன்றிற்கு மாநில அரசுக்கு ரூ.1,160 கோடி இழப்பு ஏற்படும் என்று கணக்கிடப்பட்டது. கடந்த அரசு விட்டுச்சென்ற நிதி நெருக்கடிச் சூழலிலும் இதனைத் தமிழ்நாடு அரசு ஏற்றுக்கொண்டுள்ளது. பொருளாதார வளர்ச்சியை ஊக்குவிக்கவும், கச்சா எண்ணெயின் விலை உயர்ந்ததால் ஏற்பட்ட விலைவாசி உயர்வைக் குறைக்க வேண்டியதன் அவசியத்தைக் கருத்தில்கொண்டு, பெட்ரோல், டீசல் மீது ஒன்றிய அரசால் உயர்த்தப்பட்ட வரி குறைக்கப்பட வேண்டும் என்று இந்திய ரிசர்வ் வங்கியின் நிதிக் கொள்கைக் குழுவும் (Monetary Policy Committee) வலியுறுத்திவந்தது.
பல மாநில அரசுகளும் இக்கோரிக்கையை முன்வைத்தன. இதையடுத்து, 2021 நவம்பர் 3ஆம் தேதி அன்று ஒன்றிய அரசும் பெட்ரோல் மீதான ஒன்றிய வரியை லிட்டருக்கு ரூபாய் ஐந்து எனவும், டீசல் மீதான ஒன்றிய வரியை லிட்டருக்கு ரூபாய் 10 (Central reducing Excise Duty in Petrol Diesel) எனவும் குறைத்துள்ளது. ஒன்றிய வரிவிதிப்பிற்குப் பின் 'Ad valorem' வரிகளை தமிழ்நாடு விதிப்பதால், பெட்ரோலின் சில்லறை விற்பனை விலையில் கூடுதலாக 0.65 ரூபாயும் (மொத்தம் ரூ.5.65), டீசலின் சில்லறை விற்பனை விலையில் கூடுதலாக 1.10 ரூபாயும் (மொத்தம் ரூ.11.10) குறையும்.
ஏற்றுக்கொள்ள இயலாது
இதனால், மாநில அரசிற்கு ஆண்டு ஒன்றுக்கு சுமார் ரூ.1,050 கோடி வருவாய் இழப்பு ஏற்படும். பெட்ரோல் மற்றும் டீசல் மீதான மாநில வரியை மேலும் இதற்கு நிகராகக் குறைத்துக்கொள்ள வேண்டும் என்று ஒன்றிய அரசு, மாநில அரசுகளிடம் கேட்டுக்கொண்டுள்ளது. இது, ஒரு ஏற்றுக்கொள்ள இயலாத கோரிக்கை.
ஒரு லிட்டர் பெட்ரோல் அல்லது ஒரு லிட்டர் டீசல் வாங்கும்பொழுது, அதன் சில்லறை விற்பனை விலையை நிர்ணயிப்பதில் பல அம்சங்கள் உள்ளன. அடிப்படை விலை (கச்சா எண்ணெய் மற்றும் சுத்திகரிப்பு விலையைச் சார்ந்தது), அதன்மீது ஒன்றிய அரசின் கலால் மற்றும் மேல்வரிகள் / கூடுதல் கட்டணங்கள், போக்குவரத்துச் செலவுகள், மாநில அரசின் வரிகள், முகவர் கட்டணங்கள் ஆகியவை.
2014 ஆகஸ்ட் 1ஆம் தேதி அன்று பெட்ரோல், டீசலின் அடிப்படை விலை மற்றும் உலக அளவில் இறக்குமதி விலை, ரூபாய் மதிப்பில் இன்றைய இறக்குமதி விலைக்கு நிகராக இருந்தது. பெட்ரோலின் அடிப்படை விலை லிட்டர் ஒன்றுக்கு 48.55 ரூபாய், டீசலின் அடிப்படை விலை லிட்டர் ஒன்றுக்கு 47.27 ரூபாயாக இருந்தது.
2014 - 2021 ஒப்பீடு
இந்தாண்டு, நவம்பர் 4ஆம் தேதி அன்று பெட்ரோலின் அடிப்படை விலை லிட்டருக்கு 48.36 ரூபாய், டீசலின் அடிப்படை விலை லிட்டருக்கு 49.69 ரூபாயாக இருந்தது. 1.8.2014இல், ஒன்றிய அரசின் வரிகள் பெட்ரோலைப் பொறுத்த அளவில் லிட்டர் ஒன்றுக்கு 9.48 ரூபாயும், டீசல் லிட்டர் ஒன்றுக்கு 3.57 ரூபாயும் இருந்தன. அச்சமயத்தில், மாநில அரசின் வரிகள் பெட்ரோல் மீது லிட்டர் ஒன்றுக்கு 15.47 ரூபாயும், டீசல் மீது லிட்டர் ஒன்றுக்கு 10.23 ரூபாயாகவும் இருந்தன.
ஒன்றிய அரசால் பெட்ரோல், டீசல் மீது வரி குறைப்பதற்கு முன்பாக, பெட்ரோல் மீதான ஒன்றிய அரசின் வரி லிட்டர் ஒன்றுக்கு 32.90 ரூபாயாகவும், டீசல் மீதான வரி லிட்டர் ஒன்றுக்கு 31.80 ரூபாயாகவும் இருந்தன. இதை, பெட்ரோல் மீது லிட்டர் ஒன்றுக்கு 27.90 ரூபாயாகவும், டீசல் மீது லிட்டர் ஒன்றுக்கு 21.80 ரூபாயாகவும் ஒன்றிய அரசு தற்போது குறைத்துள்ளது.
அதாவது, 2014ஆம் ஆண்டோடு ஒப்பிடும்போது, (அடிப்படை விலை ஏறத்தாழ சமமாக இருந்தபோது) பெட்ரோலுக்கு 18.42 ரூபாயும், டீசலுக்கு 18.23 ரூபாயும் கூடுதலாக இன்னும் ஒன்றிய அரசு கூடுதலாக விதித்துவருகிறது.
வரிகளின் விவரம்
தமிழ்நாட்டைப் பொறுத்தவரை, தற்பொழுது பெட்ரோல் மீதான மாநில அரசின் வரி லிட்டர் ஒன்றுக்கு ரூ.21.46 ஆகவும், டீசல் மீதான வரி லிட்டர் ஒன்றுக்கு ரூ.17.51 ஆகவும் உள்ளது. 2014ஆம் ஆண்டில் இருந்ததைவிட இந்தக் கூடுதலான வரியை (பெட்ரோல் மீது ஒரு லிட்டருக்கு 9 ரூபாய் – இதில், 3 ரூபாய் நாங்கள் ஆகஸ்ட் மாதத்தில் குறைத்தோம் மற்றும் டீசல் மீது ஒரு லிட்டருக்கு 7.25 ரூபாய்) கடந்த அதிமுக அரசுதான் செலுத்தியது.
முதலமைச்சர் மு.க. ஸ்டாலின் தலைமையிலான இந்த அரசு ஏற்கனவே பெட்ரோல் மீதான வரியை லிட்டர் ஒன்றுக்கு ரூ.3 அளவிற்கு குறைத்துள்ளது. இந்த வரி குறைப்பு 2021 ஆகஸ்ட் 14ஆம் தேதிமுதல் நடைமுறைப்படுத்தப்பட்டது.
ஒன்றிய அரசு கடந்த ஏழு ஆண்டுகளாக பெட்ரோல், டீசல் மீதான வரியைத் தொடர்ந்து அதிகரித்துவந்தது. இதை, மீண்டும் 2014இல் இருந்த அளவிற்குக் குறைத்துக்கொண்டால், மாநில அரசின் வரி விதிப்பு தானாகவே குறைந்துவிடும். ஏனென்றால், இந்த வரி விதிப்பு அடிப்படை விலை மற்றும் ஒன்றிய அரசின் வரி விதிப்பின் மீது விதிக்கப்படும் வரியாகும்.
சில்லறை விற்பனை விலையின் விவரங்கள் – 2014 ஆகஸ்ட் 1 அன்று, 2021 நவம்பர் 2 அன்று (ஒன்றிய வரி குறைப்பிற்கு முன்), 2021 நவம்பர் 4 (வரி குறைப்பிற்குப் பின்) பின்வருமாறு:
பெட்ரோல்
| பெட்ரோல் சில்லறை விலை | 01.08.2014 நிலவரம் (ரூ. மதிப்பில் ) | 02.11.2021 நிலவரம் (ரூ. மதிப்பில்) | 04.11.2021 நிலவரம் (ரூ. மதிப்பில்) |
| அடிப்படை விலை | 48.55 | 47.98 | 48.36 |
| ஒன்றிய அரசு விதிக்கும் கலால் வரி (மேல்வரி உள்பட) | 9.48 | 32.90 | 27.90 |
| மாநில அரசு விதிக்கும் மதிப்புக் கூட்டு வரி | 15.67 | 22.06 | 21.46 |
| போக்குவரத்துக் கட்டணம் | 0.00 | 0.20 | 0.20 |
| முகவர் கட்டணம் | 2.04 | 3.52 | 3.48 |
| விற்பனை விலை | 75.74 | 106.66 | 101.40 |
டீசல்
| டீசல் சில்லறை விலை | 31.08.2014 நிலவரம் (ரூ. மதிப்பில்) | 02.11.2021 நிலவரம் (ரூ. மதிப்பில்) | 04.11.2021 நிலவரம் (ரூ. மதிப்பில்) |
| அடிப்படை விலை | 47.27 | 49.72 | 49.69 |
| ஒன்றிய அரசு விதிக்கும் கலால் வரி (மேல்வரி உட்பட) | 3.57 | 31.80 | 21.80 |
| மாநில அரசு விதிக்கும் மதிப்புக் கூட்டு வரி | 10.25 | 18.61 | 17.51 |
| போக்குவரத்துக் கட்டணம் | 0.00 | 0.20 | 0.20 |
| முகவர் கட்டணம் | 1.18 | 2.26 | 2.23 |
| விற்பனை விலை | 62.27 | 102.59 | 91.43 |
இது நியாயமே இல்லை
எனவே, ஒன்றிய அரசின் வரி அளவு இன்னும் அதிகமாகத் தொடர்ந்து இருந்துவரும் நிலையில், மாநில அரசின் வரி அளவு மேலும் குறைக்கப்படுவது நியாயமும் அல்ல, சாத்தியமும் அல்ல.
இதனைக் கருத்தில்கொண்டு, 2014ஆம் ஆண்டு இருந்த அளவிற்குப் பெட்ரோல், டீசல் மீதான வரியை ஒன்றிய அரசு குறைக்க வேண்டும் என மீண்டும் வலியுறுத்துகிறேன். இதுவே, அனைவரும் பயனடையும் எளிமையான, நியாயமான ஒரே தீர்வாகும். இத்தகைய நடவடிக்கை தானாகவே மாநிலங்களின் வரியைக் குறைத்துவிடும் (பெரும்பாலான மாநிலங்கள் 'Ad valorem' வரி முறையைப் பின்பற்றுகின்றன)" எனக் குறிப்பிட்டுள்ளார்.
இதையும் படிங்க: நிபந்தனைகள் ஏதுமின்றி மாநிலங்களுக்கு கடன் வழங்குக - பிடிஆர் கோரிக்கை
