அஞ்சல் துறை வழியாக புதிய மின்னணு குடும்ப அட்டை: அமைச்சர் சக்கரபாணி

இந்திய அஞ்சல் துறை வழியாக புதிய மின்னணு குடும்ப அட்டைகளை பயனாளிகளின் இருப்பிடத்திற்கு அனுப்பப்படும் என உணவுத்துறை அமைச்சர் சக்கரபாணி சட்டப்பேரவையில் தெரிவித்தார்.

சென்னை: கூட்டுறவு, உணவு மற்றும் நுகர்வோர் பாதுகாப்பு துறை மானியக் கோரிக்கை மீதான விவாதம் நேற்று (ஏப். 8) சட்டப்பேரவையில் நடைபெற்றது.

அப்போது உணவுத்துறை அமைச்சர் சக்கரபாணி பதிலுரையில், "தற்போது புதிய மின்னணு குடும்ப அட்டைகளை பயனாளிகள் வட்ட வழங்கல் அலுவலகங்கள், உணவு பொருள் வழங்கல் மற்றும் நுகர்வோர் பாதுகாப்புத் துறையின் மண்டல அலுவலகங்கள் மூலமாக பெற்று வருகின்றனர்.

உறுதி செய்யப்பட்ட சேவையினை அளிக்கும் பொருட்டும் நேரடியான தொடர்பினை தவிர்க்கும் பொருட்டும் இந்திய அஞ்சல் துறையின் மூலம் பயனாளிகள் இருப்பிடத்திற்கு புதிய மின்னணு குடும்ப அட்டைகள் அனுப்பப்படும்" எனத் தெரிவித்தார்.

இதையடுத்து சபாநாயகர் அப்பாவு, "பொது விநியோகத் துறையில் பின்பற்றப்படும் பயோமெட்ரிக் முறையினால் பொதுமக்கள் சிரமப்படுகிறார்கள். கைரேகைகள் சரியாக பதிவாகாததால் பொதுமக்கள் பொருள்களை வாங்க முடிவதில்லை" எனத் தெரிவித்தார்.

அதற்கு பதிலளித்த உணவுத்துறை அமைச்சர் சக்கரபாணி, கைரேகை இல்லாமல் புதிய திட்டம் ஒன்றை முதலமைச்சர் மு.க. ஸ்டாலின் வகுக்க இருப்பதாகவும் அதை விரைவில் அவரே அறிவிப்பார் என்றும் தெரிவித்தார்.

இதையும் படிங்க: அமைச்சர் ஐ.பெரியசாமி மீது பதியப்பட்ட வழக்கு ரத்து - சென்னை உயர் நீதிமன்றம்