சட்டப்பேரவையில் இன்று
தமிழ்நாடு சட்டப்பேரவையில் இன்று (செப்.02) மருத்துவம் மற்றும் மக்கள் நல்வாழ்வுத்துறை, சிறு குறு தொழில் ஆகியவற்றின் மானியக் கோரிக்கை மீதான விவாதம் நடைபெறுகிறது.
ஓபிஎஸ் மனைவி உடல் பெரியகுளத்தில் அடக்கம்
அதிமுக ஒருங்கிணைப்பாளரும், முன்னாள் முதலமைச்சருமான ஓ.பன்னீர்செல்வத்தின் மனைவி விஜயலட்சுமி மாரடைப்பால் நேற்று (செப்.01) உயிரிழந்தார். அவரது உடல் இன்று (செப்.02) தேனி பெரியகுளத்தில் அடக்கம் செய்யப்படவுள்ளது.
கொடநாடு கொலை குறித்த விசாரணை
கொடநாடு கொலை, கொள்ளை தொடர்பான வழக்கின் மறு விசாரணை இன்று (செப்.02) ஊட்டி நீதிமன்றத்தின் விசாரணைக்கு வருகிறது. இதில், கொடநாடு எஸ்டேட் மேலாளர் நடராஜனிடம் விசாரணை நடத்தப்படவுள்ளது.
உயர்கல்வி வழிகாட்டி புத்தகம் வெளியீடு
சென்னையில், 12 ஆம் வகுப்பு முடித்த மாணவர்களுக்கான உயர்கல்வி வழிகாட்டி புத்தகம் இன்று (செப்.02) வெளியிடப்படுகிறது.
தெய்வத்திடம் முறையிடம் போராட்டம்
விநாயகர் சதுர்த்தி வழிபாட்டுக்கு தடை விதிக்கப்பட்டுள்ளதை எதிர்த்து, இன்று (செப்.02) மாவட்டம் முழுவதுமுள்ள கோயில்களில் முன் நின்று தெய்வத்திடம் முறையிடம் போராட்டம் நடத்தவுள்ளதாக இந்து முன்னணி அமைப்பினர் தெரிவித்துள்ளனர்.
மாற்றுத்திறனாளிகளுக்கான தேசிய அடையாள அட்டை பதிவு
திருப்பூர் தெற்கு மற்றும் வடக்கு தாலுகா அலுவலகத்தில், மாற்றுத்திறனாளிகளுக்கான தனித்துவ தேசிய அடையாள அட்டை பதிவு செய்யும் முகாம் இன்று (செப்.02) முதல் தொடங்குகிறது.
4ஆவது டெஸ்ட் போட்டி
விராட் கோலி தலைமையிலான இந்திய கிரிக்கெட் அணி இங்கிலாந்தில் சுற்றுப் பயணம் செய்து விளையாடி வருகிறது. மொத்தம் ஐந்து போட்டிகள் கொண்ட டெஸ்ட் தொடரின் நான்காவது போட்டி இன்று (செப்.02) லண்டன் ஓவல் மைதானத்தில் நடைபெறவுள்ளது.
மழை பெய்யக்கூடிய மாவட்டங்கள்
வளிமண்டல மேலடுக்கு சுழற்சி காரணமாக தமிழ்நாட்டில் இன்று (செப்.02) நீலகிரி, தேனி, திண்டுக்கல், சேலம், தர்மபுரி, கிருஷ்ணகிரி, கள்ளக்குறிச்சி ஆகிய மாவட்டங்களில் கனமழை பெய்ய வாய்ப்புள்ளதாக சென்னை வானிலை ஆய்வு மையம் தெரிவித்துள்ளது.
