’ பழுதான கட்டடங்களை இடித்துத் தருக ’ - தொடக்கக் கல்வித் துறை கடிதம்

சென்னை: தொடக்கப் பள்ளிகளில் உள்ள பழுதடைந்த கட்டடங்களை இடித்துத் தர ஊரக வளர்ச்சித் துறை இயக்குநருக்கு தொடக்கக் கல்வி இயக்குநர் கடிதம் அனுப்பியுள்ளார்.

தமிழ்நாட்டில் 24 ஆயிரத்து 321 தொடக்கப்பள்ளிகளும் ஆறாயிரத்து 966 நடுநிலைப்பள்ளிகளும் இயங்கிவருகின்றன. தொடக்க, நடுநிலைப் பள்ளிகளின் பராமரிப்பு, கட்டுமான பணிகள், ஊரக வளர்ச்சித் துறையின் மூலம் மேற்கொள்ளப்பட்டுவருகின்றன.

தொடக்கப்பள்ளி கட்டடங்கள் பழுதடைந்திருந்தால் அவற்றை இடிப்பதற்கு ஊரக வளர்ச்சித் துறைக்கு மட்டுமே அனுமதி உள்ளதால், பழுதடைந்த கட்டடங்களை இடிக்க முடியாமல் தொடக்கக் கல்வித் துறை உள்ளது. கல்வித் துறை அலுவலர்கள் பலமுறை எடுத்துக் கூறியும் நிதி இல்லை என ஊரக வளர்ச்சித் துறையினர் தட்டிக்கழிப்பதாகக் கூறப்படுகிறது.

இந்நிலையில், தொடக்கக் கல்வித் துறை இயக்குநர், அனைத்து மாவட்ட முதன்மைக் கல்வி அலுவலர்களுக்கும் அனுப்பியுள்ள கடிதத்தில், "தொடக்கக் கல்வி இயக்ககத்தின் கட்டுப்பாட்டில் செயல்படும் அரசு நகராட்சி, ஊராட்சி ஒன்றிய தொடக்க, நடுநிலைப்பள்ளிகளில் உள்ள பள்ளிக் கட்டடங்களின் மேற்கூரை, தளம், கதவு, ஜன்னல் போன்றவற்றில் ஏற்பட்டிருந்த பழுதுகளின் விவரம், மாணவர் பாதுகாப்பிற்கு அச்சுறுத்தலாக உள்ள பள்ளி கட்டடங்களின் விவரங்கள் மாவட்டங்களிலிருந்து பெறப்பட்டன.

இப்பட்டியலின் விவரம் ஊரக வளர்ச்சி முகமை இயக்குநருக்கு அளிக்கப்பட்டுள்ளது. எனவே, பள்ளிகளில் உள்ள பழுதுகளை சரி செய்வதற்கு அந்தப் பகுதி வட்டாரக் கல்வி அலுவலர்கள், மாவட்டக் கல்வி அலுவலர்கள், ஊரக வளர்ச்சித் துறையின் வட்டார வளர்ச்சி அலுவலர்கள் நேரில் சந்தித்து பழுதுபார்க்கும் பணிகளை மேற்கொள்ள நடவடிக்கை எடுக்க வேண்டும்.

மேலும், மாணவர் பாதுகாப்பிற்கு அச்சுறுத்தலாக உள்ள பயன்பாட்டில் இல்லாத வகுப்பறை கட்டடங்கள், சத்துணவு கட்டடங்களை இடிக்கவும், பழுதுகளை சரி செய்வதற்கும் தேவையான விவரங்களை மாவட்ட ஆட்சியரிடம் நேரில் அளிக்க வேண்டும். இவற்றில் ஏதேனும் சுணக்கம் ஏற்பட்டால் மாவட்ட முதன்மைக் கல்வி அலுவலர்கள் முழு பொறுப்பேற்க வேண்டும்" எனக் கூறியுள்ளார்.

இதையும் படிங்க: கல்வியோடு ஓவியத்தையும் கற்றுக்கொள்ளலமா...!