சென்னை: சென்னை மற்றும் புறநகர் பகுதிகளில் நேற்று இரவு 8 மணியில் இருந்து இடி மின்னல் மற்றும் சூறைக்காற்றுடன் பலத்த மழை கொட்டித் தீர்த்தது. இதனால் சென்னை விமான நிலையத்தில் விமான சேவைகள் பெரிதும் பாதிக்கப்பட்டன.
186 பயணிகளுடன் துபாயிலிருந்து சென்னை வந்த எமரேட்ஸ் ஏர்லைன்ஸ் விமானம், சென்னையில் தரை இறங்க முடியாமல் பெங்களூருக்கு திருப்பி அனுப்பப்பட்டது.
அதேபோல், பக்ரையினிலிருந்து 167 பயணிகளுடன் சென்னை வந்த ஃகல்ப் ஏர்வேஸ் விமானம், ஹாங்காங்கிலிருந்து 204 பயணிகளுடன் வந்த கேத்தே பசிபிக் விமானம், மும்பை மற்றும் லக்னோவிலிருந்து வந்த 5 விமானங்கள் சென்னையில் தரையிறங்க முடியாமல் பெங்களூருக்கு திருப்பி அனுப்பப்பட்டுள்ளன.
மேலும் மதுரை, பெங்களூர், ஹைதராபாத், டில்லி, மும்பை, திருச்சி, கொல்கத்தா உள்ளிட்ட இடங்களில் இருந்து வந்த விமானங்கள் தரையிறங்க முடியாமல் வானில் வட்டமடித்து தாமதமாக தரையிறக்கப்பட்டது.
இதை போல் சென்னையில் இருந்து துபாய், பக்ரைன், திருச்சி, ஹைதராபாத், கொல்கத்தா, டில்லி, மும்பை ஆகிய இடங்களுக்கு செல்லும் விமானங்களும் தாமதமாக புறப்படும் என்று அறிவிக்கப்பட்டது. இதனால் பயணிகள் இன்னல்களை எதிர்கொண்டனர்.
இதையும் படிங்க: தமிழ்நாட்டில் 5 மாவட்டங்களில் கனமழைக்கு வாய்ப்பு
