தமிழ்நாட்டின் பல்வேறு பகுதிகளிலும் டெங்கு பாதிப்பால் உடல்நலக்குறைவும் ஆங்காங்கே பச்சிளம் குழந்தைகள் முதல் பெரியவர்கள்வரை உயிரிழந்துவரும் நிலையில் டெங்கு பாதிப்பை கட்டுப்படுத்தவும் உயிரிழப்புகளை தடுக்கவும் நடவடிக்கை எடுக்கக்கோரி வழக்கறிஞர் ஏ.பி. சூரியபிரகாசம் என்பவர் பொதுநல மனு தாக்கல் செய்துள்ளார்.
அதில், சுகாதாரத் துறையிலுள்ள காலிப்பணியிடங்களை உரிய நேரத்தில் நிரப்பாததும் அதில் அரசு மெத்தனப்போக்கை காட்டுவதுதான் உயிரிழப்புக்குக் காரணமென மனுதாரர் சுட்டிக்காட்டியுள்ளார். சுகாதாரத் துறை சார்ந்த நிபுணர்கள் கொண்ட குழு ஒன்றை அமைக்க வேண்டுமெனவும் டெங்கு பாதிப்புகளை கட்டுப்படுத்த உத்தரவு பிறப்பித்து அவற்றை கண்காணிக்க வேண்டும் என்றும் மனுவில் கோரியுள்ளார்.
மேலும் டெங்கு பாதிப்பால் உயிரிழந்தோரின் குடும்பங்களுக்கு தலா 10 லட்சம் ரூபாய் இழப்பீடு வழங்க வேண்டும் என்றும் டெங்கு பாதிப்பு உள்ளவர்களுக்கு தனியார் மருத்துவமனைகளில் வழங்கப்படும் சிகிச்சைக்கு அரசு செலவிட உத்தரவிட வேண்டுமெனவும் கோரிக்கைவைத்துள்ளார்.
வழக்கறிஞர் சூரியபிரகாசம் தாக்கல் செய்துள்ள இந்த மனுவை அவசர வழக்காக விசாரணைக்கு எடுத்துக் கொள்ள வேண்டும் என நீதிபதிகள் எம். சத்யநாராயணன், என். சேஷசாயி அமர்வில் முறையீடு செய்தார். ஆனால், மனு தாக்கல் நடைமுறைகள் முடிந்து பட்டியலிடப்பட்ட பிறகே மனு விசாரிக்கப்படும் என்று தெரிவிக்கப்பட்டது.
இதையும் படிங்க:டெங்கு கொசு பரவும் வகையில் உள்ள இடங்களுக்கு போடப்பட்ட அபராதத் தொகை 27லட்சம் ! சென்னை மாநகராட்சி
