காவிரியில் விரைவில் தண்ணீர் திறக்கப்பட உள்ள நிலையில், காவிரி நீர் மூலம் சாகுபடி செய்யப்பட உள்ள டெல்டா மாவட்டங்களில் நடைபெற்று வரும் பணிகள் தொடர்பாக தமிழ்நாடு பொதுப்பணித்துறை சார்பில் வெளியிடப்பட்டுள்ள செய்திக் குறிப்பில், “தமிழ்நாட்டின் உணவு களஞ்சியமான நாமக்கல், ஈரோடு, கரூர், திருச்சி, தஞ்சாவூர், அரியலூர், திருவாரூர், நாகப்பட்டினம், புதுக்கோட்டை ஆகிய டெல்டா மாவட்டங்களில் நீர்நிலைகளை தூர்வாரும் மற்றும் செப்பனிடும் பணிகள் பெருமளவிலும், ஏனைய மாவட்டங்களில் குடிமராமத்து பணிகள் வேகமாகவும் நடைபெற்று வருகின்றன.
கடைமடைப் பகுதி வரை தண்ணீர் செல்ல கடந்த ஆண்டு சுமார் 60 கோடியே 95 லட்சம் ரூபாய் செலவில், 2629.85 கிலோ மீட்டர் தூரத்திற்கு செப்பனிடும் பணிகள் நடைபெற்றன. இது டெல்டா விவசாயிகள் இடையே மிகப்பெரிய வரவேற்பை பெற்றுள்ளது.
இதைத்தொடர்ந்து, இந்த ஆண்டு டெல்டா மாவட்டங்களை சிறப்பாக தூர்வாரும் பணிகளை செயல்படுத்த ரூ. 6724.75 லட்சம் நிதி ஒதுக்கீடு செய்யப்பட்டுள்ளது. இதன்மூலம் கடந்த ஆண்டைவிட டெல்டா மாவட்டங்களில் ஒரு லட்சம் மெட்ரிக் டன் அரிசி உற்பத்தி கூடுதலாக உற்பத்தி மேற்கொள்ள திட்டமிடப்பட்டுள்ளது.
கடந்த காலங்களில் கடைமடை வரை தண்ணீர் செல்ல 25 நாட்களாகும். ஆனால் தற்போது சிறப்பு தூர்வாரும் பணிகள் திட்டத்தினால் பத்து நாள்களில் கடைமடை வரை தண்ணீர் விரைந்து செல்லும். ஆகவே டெல்டா விவசாயிகள் குறுவை நெல் சாகுபடி பணிகளை செய்வதற்கு தயார் நிலையில் மகிழ்ச்சியுடன் உள்ளனர்” என தெரிவிக்கப்பட்டுள்ளது.
இதையும் படிங்க: காவிரி நீர் வந்துசேர குடிமராமத்துப் பணிகள் தீவிரம்!
