ஊர்க்காவல் படையினருக்கான ஊதியத்தை அரசு உயர்த்தும் - நீதிபதிகள் நம்பிக்கை

ஊர்க்காவல் படையினருக்கான ஊதியத்தை அரசு உயர்த்தும் என நம்பிக்கை தெரிவித்து, அதுதொடர்பாக பாஜக மாநிலத் தலைவர் அண்ணாமலை தொடர்ந்த வழக்கை சென்னை உயர் நீதிமன்றம் முடித்து வைத்துள்ளது.

சென்னை: காவல் துறையினருக்கு உதவும் வகையில் உருவாக்கப்பட்டது ஊர்க்காவல் படை. இதில், பணிபுரிபவர்களுக்கு ஐந்து நாள்கள் பணி நாளாக நிர்ணயித்து, நாளொன்றுக்கு 560 ரூபாய் ஊதியம் வழங்க 2007ஆம் ஆண்டு தமிழ்நாடு அரசு உத்தரவு பிறப்பித்தது. பின்னர் ஊர்க்காவல் படையினரின் தொடர் கோரிக்கைகளை ஏற்று, பணி நாள்களை மட்டும் 10 நாள்களாக அதிகரித்து, 2019ஆம் ஆண்டு பிப்ரவரி 19ஆம் தேதி உள்துறை அமைச்சகம் அரசாணை பிறப்பித்தது.

இந்த அரசாணையை ரத்து செய்யக்கோரி பாஜக மாநிலத் தலைவர் அண்ணாமலை சென்னை உயர் நீதிமன்றத்தில் பொதுநல வழக்கு ஒன்றைத் தொடர்ந்தார். நான்கு மணி நேரம் வரை பணியில் இருப்பவர்களுக்கு 280 ரூபாய் மட்டுமே ஊதியம் வழங்கப்படும் என்றும், 4 முதல் 8 மணி நேரம் வரை பணியில் இருந்தால் மட்டுமே 560 ரூபாய் வழங்கப்படும் என்று குறிப்பிட்டுள்ளதையும் அம்மனுவில் சுட்டிக்காட்டியிருந்தார்.

ஊதிய உயர்வு

இந்த வழக்கு தலைமை நீதிபதி சஞ்ஜிப் பானர்ஜி, நீதிபதி ஆதிகேசவலு அமர்வில் இன்று (செப். 21) விசாரணைக்கு வந்தது. அப்போது, மனுதாரர் அண்ணாமலை தரப்பில், ஒவ்வொரு மாதமும் 5 ஆயிரத்து 600 ரூபாய் மட்டுமே ஊர்க்காவல் படையினருக்கு கிடைப்பதாகவும், 17ஆயிரத்து 600 ஊர்க்காவல் படையினரில் 76 விழுக்காட்டினர் பட்டியலின பழங்குடியினத்தைச் சேர்ந்தவர்கள் எனவும் சுட்டிக்காட்டப்பட்டது.

மேலும் புதுச்சேரி, ஆந்திரா மாநிலங்களைப் போல தமிழ்நாடு ஊர்க்காவல் படையினருக்குப் பணி நாள்களையோ அல்லது ஊதியத்தையோ உயர்த்த வேண்டும் என வலியுறுத்தப்பட்டது.

தமிழ்நாடு அரசு தரப்பில், 10 நாள்கள் என்பது குறைந்தபட்ச பணிநாள்களாக நிர்ணயிக்கபட்டதாகவும், தேவைப்பட்டால் கூடுதல் நாள்கள் பணி வழங்கப்படுவதாகவும் தெரிவிக்கப்பட்டது. உச்ச நீதிமன்றம் உத்தரவின்படி ஊர்க்காவல் படையினரை பணிவரன் முறைப்படுத்த முடியாது எனவும், தாமாக முன்வந்து சேவை செயவர்களுக்கு கவுரவமளிக்கும் வகையில் ஊதியம் வழங்கப்படுகிறது எனவும் விளக்கம் அளிக்கப்பட்டது.

வழக்கை முடித்துவைத்த நீதிபதிகள்

இரு தரப்பு வாதத்தை கேட்ட நீதிபதிகள் கூறுகையில், "வேலைவாய்ப்பு இல்லாமல் பலர் ஊர்க்காவல் படையில் சேர்ந்து, வருவாய் ஈட்டும் நடைமுறையை மாற்றியமைக்க வேண்டும். 10 நாள்கள் பணி வழங்கப்படுவதாக அரசு கூறினாலும், பல ஊர்க்காவல் படையினர் மாதம் முழுவதும் பணியில் அமர்த்தப்படுகின்றனர். இதை முறைப்படுத்த வேண்டும். யாருக்கும் சாதகமாக செயல்படாமல் தேர்வு, பணிக்கு உரிய விதிகளை வகுக்க வேண்டும்.

ஊர்க்காவல் படையிலுள்ள ஒவ்வொருவருக்கும் குறைந்தபட்சமாக நிர்ணயிக்கபட்ட 5 ஆயிரத்து 600 ரூபாய் ஊதியம் கிடைக்கும் வகையில் பணி வழங்க வேண்டும்" என்றனர்.

மேலும், ஊர்க்காவல் படையினருக்கான ஊதியத்தை அரசு உயர்த்தும் என நம்பிக்கை தெரிவித்த தலைமை நீதிபதி அமர்வு, காவல்துறையினரின் ஊதியமும் மாற்றியமைக்கப்படும் என நம்புவதாக தெரிவித்து, பாஜக மாநிலத் தலைவர் அண்ணாமலை தாக்கல் செய்த வழக்கை முடித்துவைத்தனர்.

இதையும் படிங்க: மழை நீர் வடிகால் வழக்கு: ஆணையர், இயக்குநர் பதிலளிக்க உத்தரவு